TUPELA yia paslain long dispela hevi i kamap, mi na Evelyn Trabert, em poroman bilong mi long wok misineri, i grediuet long namba 4 klas bilong Wastaua Baibel Skul Bilong Gileat, klostu long Ithaca, New York. Mitupela i kisim asainmen long mekim wok misineri long Santa Ana. Mi laik stori liklik long wok misineri mi bin mekim klostu olsem 29 yia, tasol mi laik stori pastaim long risen bilong mi long mekim dispela wok.

Mi bon long 1923, na long dispela taim papamama bilong mi, John na Eva Olson, i stap long Spokane, Washington long Amerika. Ol i bilong lotu Luteran, tasol ol i no bilip long tok bilong helpaia, long wanem, ol i pilim olsem dispela tok i no stret wantaim bilip bilong ol olsem God i gat pasin laikim. (1 Jon 4:8) Papa i mekim wok mani long haus bilong kukim bret, na wanpela nait wanpela wanwok i tokim em olsem Baibel i no tok olsem hel em ples bilong kisim bikpela pen. I no longtaim, Papa na Mama i stadi wantaim ol Witnes Bilong Jehova na ol i kisim stretpela save bilong Baibel long samting i save painim man taim em i dai.

Mi gat 9-pela krismas long dispela taim, tasol mi tingim yet amamas bilong papamama taim ol i stori long ol nupela tok i tru bilong Baibel ol i lainim. Amamas bilong ol i kamap bikpela moa taim ol i kisim save long nem bilong God tru, Jehova, na ol i lusim  bilip bilong God Triwan—dispela bilip i bin paulim tingting bilong ol. Mi amamas tru long kisim save long ol dispela ‘tok i tru i mekim yumi i kamap fri.’ (Jon 8:32) Olsem na mi no les long pasin bilong stadi long Baibel, nogat, olgeta taim mi save amamas long skelim ol tok bilong en. Maski mi meri bilong sem, mi save go wantaim papamama long autim tok. Long 1934, tupela i kisim baptais. Long 1939, taim mi gat 16 krismas, mi tu mi kisim baptais na mekim wok bilong Jehova.

Long 1940, papamama i salim haus na mipela 3-pela i mekim wok painia long Coeur d’Alene, Idaho. Mipela i rentim wanpela flet antap long stua bilong stretim ol kar. Mipela i mekim ol miting long flet bilong mipela. Long dispela taim bipo, planti kongrigesen i no gat Haus Kingdom, olsem na ol i save mekim miting long haus bilong ol brata o rentim sampela haus.

Long 1941, mi na papamama i go long kibung long Saint Louis, Missouri. Sande em “De Bilong Ol Pikinini,” olsem na ol yangpela em krismas bilong ol i stap namel long 5 na 18 krismas, ol i sindaun long fran bilong pletfom. Brata Joseph F. Rutherford i givim tok long mipela ol yangpela na klostu long pinis bilong tok, em i tok: “Yupela olgeta . . . pikinini . . . husat i wanbel long bihainim tok bilong God na King bilong em, plis yupela i ken sanap!” Mipela olgeta i kirap sanap. Brata Rutherford i tok: “Lukim, nau i gat 15 tausen nupela witnes bilong Kingdom!” Long dispela taim stret, mi pasim tok olsem wok painia bai i stap olsem nambawan wok long laip olgeta bilong mi.

Sampela mun bihain long kibung long Saint Louis, mipela famili i go sindaun long sauten California. Mipela i stap long taun Oxnard, na mipela i kisim asainmen bilong kirapim wanpela kongrigesen. Mipela i stap long liklik haus kar na i gat 1-pela bet tasol. Long olgeta nait, mi save wokim bet bilong mi antap long tebol—em narapela kain long rum slip bilong mi long bipo!

Paslain liklik long taim mipela i kamap long California, Japan i tromoi bom long Pearl Harbor long Hawaii, long Disemba 7, 1941. Long de bihain, Amerika i go insait long Wol Woa 2. Gavman i tambuim lait bilong pawa long nait, olsem na long nait mipela i ofim olgeta lait. Ol sabmarin bilong Japan i patrol long solwara klostu long nambis bilong California, na tudak i pasim ol long sutim bom i go stret long samting ol i laik bagarapim long bikples.

Sampela mun bihain, long Septemba 1942, mipela i go long kibung New World Theocratic Assembly long Cleveland, Ohio. Mipela i putim yau taim Brata Nathan H. Knorr i mekim tok, “Gutaim—Em Bai Stap o Nogat?” Em i skelim Revelesen sapta 17. Dispela sapta i stori long wanpela “wel animal . . . bipo em i bin stap, na nau em i no stap, tasol klostu em bai lusim hul i no gat as na i kam antap.” (Rev. 17:8, 11) Brata Knorr i tok dispela “wel animal” em Lig ov Nesen, na em i pinis long 1939. Baibel i tok profet olsem Lig ov Nesen bai i gat senis bilong en, na sotpela haptaim bai kamap we ol man bai i stap bel isi. Olsem na long 1945, Wol Woa 2 i pinis. Bihain, dispela “animal” i kamap gen na kisim nem olsem Yunaitet Nesen. Ol Witnes Bilong Jehova i mekim wok autim tok i kamap bikpela na i go long olgeta hap bilong graun, na kirap long dispela taim na i kam inap long nau, planti manmeri moa i bihainim lotu i tru!

Dispela tok profet i helpim mi long luksave long ol samting bai kamap bihain. Ol i tokaut olsem Skul Gileat bai kirap long yia antap, na dispela i kirapim laik bilong mi long mekim wok misineri. Long 1943, ol i makim mi long mekim wok painia long Portland, Oregon. Long dispela taim bipo, mipela i yusim pikap long pilaim ol rekoding bilong ol tok bilong Baibel na bai ol man i ken harim, na bihain mipela i save  soim ol buk na nius bilong Baibel i stori long Kingdom Bilong God. Long dispela yia olgeta, mi tingting tasol long wok misineri.

Long 1944, mi amamas tru long kisim invatesen bilong i go long Gileat wantaim gutpela pren bilong mi, Evelyn Trabert. Inap 5-pela mun, ol tisa i soim mipela long olsem wanem mipela inap kisim amamas long stadi long Baibel. Ol i bihainim pasin daun, na mipela i pilim tru dispela pasin. Taim mipela i kaikai, sampela taim ol dispela brata yet i stap olsem weita na bringim kaikai i kam long tebol. Mipela i grediuet long skul long Janueri 22, 1945.

Long Jun 1946, mitupela Evelyn, wantaim Leo na Esther Mahan, i go kamap long ples wok bilong mipela long El Salvado. Long dispela hap, mipela i luksave olsem “kaikai i redi pinis” long mipela i mas bungim. (Jon 4:35) Dispela hevi mi stori long en long kirap bilong dispela stori i soim olsem ol pris i belhat tru long mipela. Wanpela wik paslain long dispela hevi, mipela i bin mekim fes kibung sekit bilong mipela long Santa Ana. Mipela i toksave long planti man long pablik tok bai kamap, na mipela i amamas tru olsem klostu 500 manmeri i kam long harim pablik tok. Mipela i no pret na lusim taun, nogat; mipela i tingting strong moa long i stap na helpim ol manmeri i gat gutpela bel. Ol pris pasto i tok lukaut long ol manmeri olsem ol i no ken ritim Baibel, na planti man i no gat mani long baim Baibel, tasol planti manmeri i hangre long harim tok i tru. Ol i amamas long mipela i wok strong long lainim tok Spen bambai mipela inap skulim ol long Jehova, em God tru, na gutpela tok promis bilong em long kamapim bek Paradais long graun.

Rosa Ascencio em wanpela bilong ol fes lain mi bin stadi wantaim ol. Taim em i stadi long Baibel, em i lusim man em i bin stap wantaim em. Bihain, dispela man i stadi long Baibel. Tupela i marit, na tupela i kisim baptais, na ol i kamap strongpela Witnes Bilong Jehova. Rosa em fes asples meri bilong Santa Ana long mekim wok painia. *

Rosa i gat liklik stua bilong salim kaikai. Taim em i go autim tok, em i save pasim stua na bilip olsem Jehova bai lukautim em long ol samting em i nidim. Sampela aua bihain, em i save opim gen stua na planti kastama i save go long baim kaikai. Em i lukim stret truim bilong Matyu 6:33, na em i stap gut long God i go inap long taim em i dai.

Mipela 6-pela misineri i rentim haus bilong wanpela man, na wanpela taim pris i go lukim dispela man na tok lukaut olsem, sapos em i larim mipela i rentim yet haus bilong em, ol bai rausim em na meri bilong em long lotu bilong ol. Tasol papa bilong haus em bikpela bisnisman, na em i les pinis long pasin bilong ol pris pasto, olsem na em i no pret long tok lukaut bilong pris. Em i tokim pris olsem em i no wari sapos ol i rausim em long lotu. Em i tokim mipela olsem em i no inap rausim mipela, olsem na mipela i ken i stap yet long dispela haus.

Long biktaun San Salvador, narapela misineri sista i stadi wantaim meri bilong wanpela ensinia, nem  bilong em Baltasar Perla. Dispela man i gat gutpela bel, tasol em i no bilip moa long God bikos em i lukim pasin giaman bilong ol bikman bilong lotu. Taim ol brata i laik sanapim wanpela brens ofis, Baltasar i no kisim yet tok i tru, tasol em i tok em bai wokim disain bilong dispela brens ofis na em i no inap askim ol brata long baim em.

Long taim bilong konstraksen, Baltasar i bung wantaim lain bilong Jehova na em i bilip olsem em i painim pinis lotu i tru. Em i kisim baptais long Julai 22, 1955, na bihain liklik, meri bilong em Paulina i kisim baptais. Ol i gat 2-pela pikinini, na 2-pela wantaim i stap gut long mekim wok bilong Jehova. Pikinini man bilong em, Junior Baltasar, i mekim wok inap 49 yia pinis long Brooklyn Betel na em i helpim wok autim tok i kamap long olgeta hap. Nau em i memba bilong Brens Komiti bilong Amerika. *

Taim mipela i kirap long mekim ol kibung long San Salvador, Brata Perla i helpim mipela long kisim tok orait bilong yusim wanpela bikpela haus long mekim kibung. Pastaim mipela i no yusim olgeta sia long dispela haus, tasol Jehova i blesim wok bilong mipela, na long olgeta yia planti man moa i kam joinim mipela. Olsem na mipela i yusim olgeta sia long dispela haus, na bihain haus i no inap moa long mipela! Long ol dispela kibung, mi save lukim gen ol manmeri mi bin stadi wantaim ol long Baibel. Mi save kisim bikpela amamas tru taim ol dispela olpela sumatin i tokim mi long bungim ol “bubu pikinini”—em ol lain i baptais nupela na ol dispela olpela sumatin bilong mi i bin stadi wantaim ol!

Long wanpela kibung, wanpela brata i kam na tokim mi olsem em i laik tokaut long wanpela rong em i bin mekim. Mi no luksave long em, olsem na mi tingting planti. Em i tok: “Mi wanpela bilong ol mangi i bin tromoi ston long yu long Santa Ana.” Nau em i wok wantaim mi long mekim wok bilong Jehova! Man! Bel bilong mi i pulap tru long amamas! Mi luksave olsem fultaim sevis em nambawan wok tru i winim olgeta narapela wok yumi inap mekim.

Mi mekim wok misineri klostu 29 yia long El Salvado, pastaim long biktaun Santa Ana, na bihain long en Sonsonate, na bihain Santa Tecla, na laspela ples em San Salvador. Long 1975, mi beten na skelim ol samting mi mas mekim, na mi mekim disisen long lusim wok misineri na go bek long Spokane. Papa na  Mama i stap gut long Jehova na ol i lapun pinis, olsem na mi mas i go helpim ol.

Papa i dai long 1979, na mi lukautim Mama, na isi isi strong bilong em i pinis. Em i stap inap 8-pela yia moa na em i dai taim em i gat 94 krismas. Insait long dispela haptaim, mi pilim hatwok tru long lukautim em na dispela i mekim na mi kisim sik i gat bikpela pen long en, ol i kolim shingles. Tasol mi beten oltaim na Jehova i lukautim mi na strongim bel bilong mi, na mi inap karim hevi bilong dispela traim i painim mi. Olsem Jehova i tok, ‘inap yu lapun pinis na i gat waitpela gras, bai mi karim yu na lukautim yu na kisim bek yu.’—Ais. 46:4.

Long 1990, mi go stap long Omak, Washington. Mi autim tok long ol lain i mekim tok Spen, na sampela Baibel sumatin bilong mi i kisim baptais. Long Novemba 2007, mi no inap moa long lukautim haus bilong mi long Omak, olsem na mi lusim dispela hap na mi go stap long wanpela flet klostu long taun Chelan long Washington. Kongrigesen bilong tok Spen long dispela hap i save lukautim mi gut, na mi tenkyu tru long dispela pasin bilong ol. I no gat narapela lapun Witnes long kongrigesen, olsem na ol bratasista i amamas long kolim mi olsem “bubu meri” bilong ol.

Mi bin mekim disisen olsem mi no inap marit na kamapim pikinini, long wanem, mi laik mekim bikpela wok moa long autim tok na “i no gat wanpela samting i pulim nabaut tingting.” (1 Kor. 7:34, 35) Tasol mi gat planti pikinini long sait bilong bilip. Mi skelim olsem, long dispela haptaim yumi stap long en, mi no inap mekim olgeta samting mi laik mekim. Olsem na mi larim ol bikpela samting i stap namba 1 samting long laip bilong mi—mi tingim dediket bilong mi long givim bel olgeta long mekim wok bilong Jehova. Long nupela taim, yumi bai i gat bikpela haptaim tru long kisim amamas long mekim olgeta kain gutpela samting. Wanpela skripsa mi save laikim tru em Song 145:16 (NW ), em i tok Jehova bai “inapim laik bilong olgeta samting i gat laip.”

Long nau mi gat 91 krismas, na mi no save sik tumas, olsem na mi mekim yet wok painia. Wok painia i helpim mi long i stap yangpela yet long tingting na mi pilim olsem laip bilong mi i gat as bilong en. Taim mi kam namba 1 taim long El Salvado, wok autim tok i bin kirap nupela. Maski Satan i birua moa yet long ol Witnes, long nau i gat planti pablisa long dispela kantri, winim 39,000. Dispela i strongim tru bilip bilong mi. Dispela i soim klia tru olsem holi spirit i strongim lain bilong Jehova long olgeta wok ol i mekim!