“EUREKA!” Mining bilong dispela tok i olsem “Mi painim pinis!” Bihain long yia 1800, ol man i painim gol long California, Amerika, na ol i mekim dispela singaut. Tasol Charles Taze Russell na ol arapela Sumatin Bilong Baibel i painim samting i gutpela olgeta—tok i tru bilong Baibel. Ol i laik tru long tokim ol narapela.

Long namel bilong yia 1914, planti milion man long ol bikpela taun i lukim piksa “Photo-Drama of Creation.” Dispela drama i longpela inap 8-pela aua, na lain Intenesenel Baibel Stiudens Asosiesen (I.B.S.A.) i wokim dispela drama. Dispela drama bilong Baibel i gat ol piksa, ol piksa slait i gat kain kain kala, rekoding bilong man i mekim gut stori, na naispela musik. Olgeta dispela samting i helpim ol man long kisim gut save long ol samting i kamap kirap long taim God i wokim ol samting na i go inap long pinis bilong Wan Tausen Yia.—Rev. 20:4. a

Olsem wanem long ol lain i stap long ol liklik taun? Lain I.B.S.A. i laik helpim olgeta man husat i laik kisim save long tok i tru, olsem na long Ogas 1914, ol i tokaut long “Eureka Drama”—em wankain olsem “Photo-Drama,” tasol em i liklik moa na i no gat ol muvi long en. I gat 3-pela narapela narapela stail bilong dispela drama, na ol i stap long planti tokples: “Eureka X” i gat rekoding bilong musik na man i mekim stori. “Eureka Y” i gat rekoding bilong olgeta tok na ol piksa slait i gat kala. “Eureka Famili Drama” i bilong ol famili long lukim long haus, na i gat rekoding bilong sampela stori na ol singsing. Ol inap yusim ol pikap masin na projekta.

Ol Sumatin Bilong Baibel i go long ol kantri sait na soim drama, na ol i no nidim projekta na skrin bilong soim muvi. Long dispela rot, ol i bringim tok bilong Kingdom i go long ol nupela teritori. Ol inap pilaim “Eureka X” long san na nait bikos em i gat rekoding bilong toktok na musik tasol. Taim ol i laik pilaim “Eureka Y,” ol i yusim wanpela kain lam bilong givim pawa long projekta. Ripot long Wastaua long tok Finlan i tok: “Mipela inap soim ol dispela piksa long olgeta kain ples.” Dispela tok em i tru olgeta!

Ol Sumatin Bilong Baibel i no rentim ol bikpela haus piksa, nogat, ol i yusim ol narapela hap we ol i no inap baim, olsem ol klasrum, ol haus kot, ples bilong kisim tren, na ol bikpela rum long haus bilong ol man. Planti taim ol i no soim piksa insait long haus, nogat. Ol i go long ol fam na hangamapim traipela  waitpela laplap long sait bilong bakstua, na yusim long soim piksa long en. Anthony Hambuch i tok: “Ol fama i save lainim ol diwai na bai ol man i ken sindaun long en na lukim drama.” Lain bilong soim “Eureka Drama” i yusim karis long karim ol samting ol bai yusim long soim drama, na ol samting ol bai yusim long sanapim kem, na ol plet na sospen samting.

Planti man tru i lukim “Eureka Drama.” Long Amerika, inap 400 man i go long taun i gat 150 man long en, na ol i yusim haus bung bilong wanpela skul long lukim drama. Long narapela hap, ol man i wokabaut 8 kilomita long i go lukim “Eureka Drama,” na ol i wokabaut 8 kilomita i go bek. Long Swiden, ol neiba bilong Charlotte Ahlberg i bung long liklik haus bilong em na harim rekoding bilong drama na ol i “pilim tru” ol tok ol i harim. Long Australia, inap olsem 1,500 man i bung long wanpela liklik taun na lukim drama. Watch Tower i kamapim ripot olsem long ol haiskul na ol kolis, “ol profesa na ol sumatin i amamas tru long lukim ol piksa na harim ol naispela rekoding bilong drama.” Na tu, ol i soim “Eureka Drama” long planti hap we i gat ol haus piksa long en.

“Eureka Drama” i kamap gutpela tul bilong kirapim Baibel stadi wantaim planti man, olsem na ol Sumatin Bilong Baibel i save salim man i go bilong kirapim ol Baibel stadi. I hatwok long save long namba bilong hamas lain i lukim “Eureka Drama.” Ol Sumatin Bilong Baibel i tilim ol yet long ol liklik grup na raun long soim “Eureka Drama.” Ol i gat 86 grup, tasol long yia 1915, 14-pela grup tasol i salim ripot long olgeta taim bilong toksave long hamas lain i bung long lukim drama. I no gat rot long save long namba stret bilong ol lain i lukim drama, tasol ripot i kamap long pinis bilong yia i tok, winim 1 milion man i bin lukim “Drama.” Inap olsem 30 tausen man i askim long kisim ol buk na nius bilong Baibel.

Ating planti man i no inap tingim “Eureka Drama,” tasol kirap long Australia i go inap long Ajentina, na kirap long Saut Afrika i go inap long ol ailan bilong Briten, India, na Karibian, planti milion man i lukim dispela drama. Planti bilong ol i kisim save long tok i tru bilong Baibel—em samting i gutpela moa winim gol—olsem na ol inap tok “Eureka!”