NAU em 100 yia bilong “Photo-Drama of Creation,” em muvi ol i wokim bilong kirapim man long bilip olsem Baibel em Tok Bilong God. Long dispela taim bipo, ol man i bilip long evolusen, ol i gat pasin bilong sutim tok, na ol i holim 2-pela tingting long ol samting, olsem na planti man i bin lusim bilip, tasol “Photo-Drama” i bin litimapim nem bilong Jehova olsem Man Bilong Wokim olgeta samting.

Charles T. Russell i go pas long ol Sumatin Bilong Baibel, na oltaim em i wok long painim nambawan gutpela rot bilong helpim planti man moa long kisim save kwik long tok i tru bilong Baibel. Paslain long ol i wokim “Photo-Drama,” ol Sumatin Bilong Baibel i bin yusim ol buk na nius bilong Baibel winim 30 yia. Nau ol i tingim wanpela nupela rot​—⁠ol i laik yusim muvi long autim tok i tru bilong Baibel.

Bihain long 1890, ol man i stat long wokim ol muvi i no gat toktok long en. Long 1903, ol i soim wanpela muvi bilong lotu long wanpela haus lotu long New York City. Long 1912, ol bisnis i kirap nupela long wokim muvi, na long dispela taim tu Brata Russell i redim ol samting bilong wokim “Photo-Drama.” Em i luksave olsem tok i stap long pepa inap helpim ol man long kisim save long tok i tru bilong Baibel, tasol muvi em gutpela rot moa bilong helpim ol man.

“Photo-Drama” i longpela inap 8-pela aua, na i gat 4-pela hap bilong en, na i gat 96 tok i kain olsem pablik tok em ol i bin rekodim​—⁠man i mekim ol dispela tok em man we planti manmeri long dispela taim i save long em. Naispela musik i kamap wantaim ol piksa bilong dispela muvi. Sampela brata i pilaim ol rekoding bilong toktok na musik, na long wankain taim ol i pilaim ol piksa slait na film bilong ol stori bilong Baibel em planti man i save long en.

Ol brata i baim planti piksa bilong film na ol piksa slait long sampela kampani. Ol atis long Philadelphia, New York, Paris, na London i penim olgeta wan wan freim bilong ol piksa slait na ol film. Ol lain long Betel tu i bin mekim bikpela wok bilong penim ol piksa slait na mekim ol nupela slait bilong senisim ol slait i  bruk. Na tu, ol yet i wokim sampela film. Sampela long famili Betel i go long taun Yonkers, New York, na ektim stori bilong Abraham, Aisak, na ensel husat i bin pasim Abraham long givim pikinini man bilong em olsem ofa.​—⁠Stt. 22:​9-12.

Wanpela wanwok bilong Brata Russell i tokim ol niuslain olsem dispela muvi bai “kirapim laik bilong planti tausen manmeri long save long tok bilong Baibel, winim ol narapela samting ol lotu i bin mekim long bipo.” Yu ting ol pris pasto bai amamas long dispela nupela samting bilong helpim planti man husat i hangre long kisim save long tok bilong Baibel? Nogat tru! Ol wokman bilong Kristendom i tok kros long “Photo-Drama,” na sampela i giaman na mekim ol pasin trik long pasim ol manmeri long lukim dispela muvi. Long wanpela ples bung, ol wokman bilong lain Kristendom i stretim rot long kilim i dai pawa taim ol man i wok long lukim “Photo-Drama.”

Maski i olsem, em fri long ol man i ken lukim “Photo-Drama,” olsem na planti manmeri tru i save pulap long ol haus piksa. Long olgeta wan wan de long Amerika, ol i save soim “Photo-Drama” long ol manmeri long planti siti, klostu olsem 80 siti. Planti manmeri i kirap nogut long lukim namba 1 muvi i gat saun long en. Sampela piksa i kamap kwiktaim bihain long narapela narapela, olsem na odiens inap lukim gut olsem wanem kiau i bruk na pikinini kakaruk i kam ausait long sel, na wanpela plaua i op isi isi. Ol dispela piksa i kamapim klia olsem Jehova i gat savetingting. Olsem mipela i kamapim pinis long kirap bilong dispela atikol, taim wanpela man i lukim Brata Russell long muvi na Brata Russell i mekim tok long kirap bilong “Photo-Drama,” dispela man i tok “man long muvi i luk moa olsem Brata Russell winim Brata Russell yet!”

Tim Dirks, em wanpela man bilong raitim ol buk na wokim ol muvi, em i tok “Photo-Drama” em “fes muvi i gat saun (toktok ol i bin rekodim), ol piksa i soim ol samting i muv, na ol piksa slait i gat kala long en.” Long ol muvi ol i bin wokim paslain long “Photo-Drama,” ol i bin yusim sampela bilong ol dispela samting, tasol ol i no bungim na yusim olgeta long wankain taim, na moa yet long muvi i stori long tok bilong Baibel. Na i no gat narapela muvi we planti manmeri tru i bin lukim​—⁠insait long namba 1 yia ol i soim dispela muvi, inap olsem 9 milion manmeri i lukim dispela muvi long Not Amerika, Yurop, Australia, na Nu Silan!

Ol i soim “Photo-Drama” long namba 1 taim long Janueri 11, 1914, long New York City. Inap 7-pela mun bihain, bikpela hevi tru i bin kamap, em Wol Woa 1. Tasol planti manmeri long olgeta hap bilong graun i go bung long lukim “Photo-Drama,” na ol i kisim bel isi taim ol i lukim ol naispela piksa bilong ol blesing em Kingdom bai kamapim. Yia 1914 em wanpela yia we “Photo-Drama” i bin winim tru olgeta narapela muvi em ol i bin soim long dispela taim.