Jehova i Lukautim Yumi Bilong Kisim Bek Yumi

“God i lukautim [yupela] long rot bilong strong bilong em, long wanem, yupela i gat bilip. God i lukautim yupela bilong kisim bek yupela, na dispela pasin bilong kisim bek yupela em bai kamap ples klia long taim bilong pinis.”—1 PITA 1:5.

WANEM BEKIM BILONG YU?

Olsem wanem Jehova i bin kirapim yumi long kam insait long lotu i tru?

Olsem wanem yumi ken larim tok kaunsel bilong Jehova i stiaim yumi?

Jehova i save strongim yumi long wanem rot?

1, 2. (a) Olsem wanem yumi save God bai helpim yumi long stap gut long em i go inap long pinis? (b) Jehova i gat wanem save long yumi wan wan?

 “MAN i sanap strong i go inap long pinis, dispela man bai abrusim bagarap.” (Mat. 24:13) Dispela tok bilong Jisas i kamapim klia olsem sapos yumi laik stap laip yet taim graun bilong Satan i bagarap, yumi mas stap gut long Jehova i go inap long pinis. Tasol dispela i no makim olsem Jehova i ting yumi mas bilip long savetingting na strong bilong yumi yet long helpim yumi long sanap strong. Nogat. Baibel i tok promis olsem: “God i save bihainim ol tok bilong em, na em i no inap larim wanpela traim i kamap long yupela i winim strong bilong yupela. Nogat. Taim traim i painim yupela, em bai wokim rot bilong helpim yupela long sanap strong na bai traim i no inap daunim yupela.” (1 Kor. 10:13) Yumi kisim wanem skul long dispela tok?

² Jehova i no save larim wanpela traim i kamap long yumi i winim strong bilong yumi. Jehova inap mekim olsem, long wanem, em i save long olgeta samting bilong yumi, ol hevi bilong yumi, pasin bilong yumi, na strong bilong yumi long karim hevi. Tru tru, God i save gut long yumi olsem? Yes. Baibel i tok olsem Jehova i save long olgeta samting bilong yumi wan wan. Em i save long ol wok na pasin yumi save mekim long olgeta de. Em i save tu long tingting na bel bilong yumi.—Ritim Song 139:1-6.

3, 4. (a) Olsem wanem pasin Jehova i mekim bilong tingim Devit i soim olsem Jehova i save tingim yumi olgeta wan wan? (b) Jehova i save mekim wanem bilong soim olsem em i tingim yumi long nau?

³ Yu ting God i Gat Olgeta Strong bai tingim yumi ol man nating? Man bilong raitim song, Devit, i bin tingting long dispela samting. Em i tokim Jehova: “Taim mi lukim skai . . . mun na olgeta sta yu bin putim i stap antap, mi save ting olsem. Mipela man i wanem samting na yu save tingting long  mipela? Mipela i samting nating.” (Sng. 8:3, 4) Ating pasin bilong Jehova long tingim em i bin kirapim Devit long mekim ol dispela askim. Taim Devit, laspela pikinini bilong Jesi, i stap mangi yet na i lukautim sipsip, Jehova i tingim em olsem “gutpela man i save bihainim pasin Bikpela i laikim” na i makim em long kamap lida bilong Israel. (1 Sml. 13:14; 2 Sml. 7:8) Maski Devit em i wanpela mangi nating i lukautim sipsip, Krieta bilong heven na graun i save long tingting na filings bilong em. Tingim samting Devit i pilim taim em i luksave long dispela samting!

⁴ Na long nau tu yumi kirap nogut long pasin bilong Jehova long tingim yumi. Em i wok long bungim ol manmeri “bilong olgeta lain man” husat i stap olsem “gutpela samting” long ai bilong em. Em i bungim ol bilong lotu long em. (Hag. 2:7, NW) Na tu, em i wok long helpim ol man i lotuim em long ol i ken stap gut long em. Jehova i mekim olsem wanem? Paslain long yumi bekim dispela askim, yumi laik stori long pasin bilong Jehova long kirapim ol man long i kam long lotu i tru.

GOD I KIRAPIM YUMI LONG KAM

5. Olsem wanem Jehova i save kirapim ol man long i kam long Pikinini bilong en? Stori long wanpela eksampel.

⁵ Jisas i tok: “I no gat man inap kam long mi sapos Papa, husat i bin salim mi i kam, i no kirapim em long kam long mi.” (Jon 6:44) Dispela tok i soim olsem bilong kamap disaipel bilong Krais, God i mas helpim yumi. God i mas kirapim yumi long i go long Pikinini bilong en. Em i mekim olsem wanem? Em i yusim wok autim tok na holi spirit. Olsem, taim Pol na ol wanwok misineri i stap long Filipai, ol i bungim wanpela meri, em Lidia. Baibel i tok taim ol i kirap autim gutnius long em, “Jehova i opim bel bilong em long kisim ol tok Pol i autim.” God i yusim holi spirit bilong helpim Lidia long kliagut na kisim tok i tru. Dispela i mekim na Lidia na ol wanhaus i kisim baptais.—Apo. 16:13-15.

6. Olsem wanem God i bin kirapim yumi long i kam long lotu i tru?

⁶ Yu ting dispela samting i kamap long Lidia tasol? Nogat. Sapos yu wanpela Kristen i dediket pinis, God i bin kirapim yu long i kam long lotu i tru. Olsem Papa bilong yumi long heven i bin lukim gutpela samting long bel bilong Lidia, em i bin lukim gutpela samting long yu tu. Taim yu kirap harim gutnius, Jehova i yusim holi spirit bilong helpim yu long kliagut na kisim tok i tru. (1 Kor. 2:11, 12) Taim yu wok long bihainim tok bilong Baibel yu bin lainim, em i blesim hatwok bilong yu. Taim yu dediket long em, bel bilong em i amamas. Na tru tru, taim yu kirap long lotuim em, Jehova i bin helpim yu na em i wok yet long helpim yu.

7. Olsem wanem yumi save God bai helpim yumi long stap gut long em?

⁷ Jehova i bin helpim yumi long kirap lotuim em, so yumi ken bilip olsem em bai helpim yumi long stap gut long em. Em i save yumi no kam insait long tok i tru long strong bilong yumi yet, na yumi no inap stap yet insait long tok i tru long strong bilong yumi yet. Aposel Pita i tokim ol Kristen God i bin makim olsem, “God i lukautim [ol] long rot bilong strong bilong em,” o was long ol, na bai ol inap stap gut yet long em. (1 Pita 1:4, 5) Tok bilong Pita i stret long olgeta Kristen. Olsem wanem Jehova i lukautim yumi long nau? Yumi laik save long bekim bilong dispela askim,  long wanem, yumi mas kisim helpim long God na bai yumi inap stap gut long em.

GOD INAP PASIM YUMI LONG MEKIM RONG

8. Wanem samting inap kirapim yumi long mekim bikpela rong?

⁸ Ol hevi bilong wan wan de na pasin kranki bilong yumi yet inap pasim yumi long holim wankain tingting olsem bilong Jehova. Dispela inap kirapim yumi long mekim bikpela rong na yumi no luksave long en. (Ritim Galesia 6:1.) Kain samting olsem i bin kamap long Devit.

9, 10. Olsem wanem Jehova i bin pasim Devit long mekim bikpela rong? Jehova i mekim wanem bilong helpim yumi long nau?

⁹ Devit i bosim gut bel taim King Sol i wok long ranim em. Maski Devit inap bekim rong long Sol, em i no mekim. (1 Sml. 24:2-7) Tasol bihain liklik, Devit i no bosim gut bel bilong em. Devit wantaim ol soldia bilong em i sot long kaikai na wara, olsem na long pasin rispek, em i askim Nabal, wanpela man Israel, long helpim ol. Nabal i mekim tok i daunim Devit na i no laik helpim em. Nau Devit i belhat tru na em laik bekim pe nogut long Nabal na olgeta man long lain bilong em. Devit i no luksave olsem sapos em i kilim i dai ol dispela man i no gat asua, orait Jehova bai kotim em. Tasol Abigel, meri bilong Nabal, i pasim Devit long mekim dispela bikpela rong. Devit i luksave olsem Jehova i bin yusim Abigel bilong lukautim em, so em i tokim Abigel: “God, Bikpela bilong yumi Israel, i bin salim yu i kam nau, na yu bungim mi. Olsem na mi . . . litimapim nem bilong en. Mi tenkyu long God long gutpela tingting na tok bilong yu, na em i ken mekim gut tru long yu. Long wanem, nau yu bin pasim mi na mi no kilim i dai sampela man na bekim rong bilong Nabal long han bilong mi yet.”—1 Sml. 25:9-13, 21, 22, 32, 33.

¹⁰ Yumi kisim wanem skul long dispela stori? Jehova inap pasim yumi long mekim bikpela rong. Tasol yumi no ken ting olsem long olgeta taim yumi laik mekim bikpela rong, Jehova bai salim wanpela i kam bilong stopim yumi. Na tu, yumi no save long ol samting God bai mekim, o em bai larim wanem samting i kamap bilong inapim samting em i tingting pinis long mekim. (Sav. 11:5) Tasol yumi save gut olsem oltaim Jehova i save long ol samting i kamap long yumi na em bai helpim yumi long i stap gut yet long em. Em i tokim yumi olsem: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” (Sng. 32:8) Jehova i skulim yumi olsem wanem? Olsem wanem dispela skul i ken helpim yumi? Bilong wanem yumi ken save gut olsem Jehova i stiaim lain bilong em long nau? Orait yumi ken skelim olsem wanem Buk Revelesen i bekim ol dispela askim.

TOK KAUNSEL I LUKAUTIM YUMI

11. Yu ting Jehova i save gut long ol samting i kamap insait long ol kongrigesen bilong lain bilong en? Stori long dispela.

¹¹ Long visen em Revelesen sapta 2 na 3 i stori long en, King Jisas Krais i lukim ol samting i wok long kamap insait long 7-pela kongrigesen i stap long Esia Maina. Krais i lukim gut tru olgeta samting bilong ol dispela kongrigesen. Long dispela visen, em i kolim ol samting stret i wok long kamap na em i kolim nem bilong ol manmeri i insait long ol dispela kongrigesen. Na tu, em i givim gutpela tok amamas o tok kaunsel em ol wan wan kongrigesen i nidim. Dispela visen i mekim wanem long yumi? Dispela 7-pela kongrigesen i makim ol Kristen God i bin makim ol long holi spirit husat i stap bihain long 1914. Tru dispela tok kaunsel em bilong ol Kristen God i bin makim, tasol olgeta kongrigesen bilong God long nau ol inap kisim helpim long en. Olsem na yumi ken tok Jehova i wok long yusim Pikinini bilong en long stiaim ol manmeri bilong Em long nau. Yumi larim Jehova i stiaim yumi olsem wanem?

12. Olsem wanem yumi ken larim Jehova i stiaim yumi?

¹² Wanpela rot we yumi larim Jehova i stiaim yumi em taim yumi mekim stadi bilong yumi yet. Jehova i givim planti tok kaunsel long yumi  long rot bilong ol buk na nius em wokboi i gat savetingting i redim. (Mat. 24:45) Tasol sapos yumi laik bai ol dispela tok i helpim yumi, orait yumi mas lusim haptaim long stadi na bihainim ol tok yumi lainim. Taim yumi mekim stadi bilong yumi yet, yumi larim Jehova long lukautim yumi na bai yumi no mekim rong. (Jut 24) Ating yu bin ritim wanpela tok insait long ol buk samting bilong yumi na ting olsem, ‘Ol i raitim dispela tok bilong helpim mi tasol.’ Yu mas tingim olsem dispela tok i kam long Jehova bilong stretim yu. Olsem wanpela pren i tatsim yu bilong kirapim yu long lukluk long em, Jehova i ken yusim holi spirit bilong helpim yumi long luksave olsem yumi mas senisim sampela samting long wokabaut o pasin bilong yumi. Taim yumi larim holi spirit i stiaim yumi, i olsem yumi larim Jehova i stiaim yumi. (Ritim Song 139:23, 24.) Yumi laik stori moa long taim na strong yumi lusim long mekim stadi bilong yumi yet.

13. Bilong wanem em i savetingting long tingim taim na strong yumi lusim bilong mekim stadi bilong yumi yet?

¹³ Sapos yumi lusim bikpela haptaim long painim amamas, bai yumi no gat taim long mekim stadi bilong yumi yet. Wanpela brata i tok em isi long larim kain samting olsem i kamap. Bilong wanem i olsem? Em i tok: “Long nau i gat planti samting moa ol man i ken mekim bilong kisim amamas, winim long bipo. Na pe bilong ol amamas i no bikpela tumas. Yu ken lukluk long TV, kompiuta, na long mobail fon. Ol samting bilong amamas i stap long olgeta hap.” Sapos yumi no was gut, bai yumi lusim bikpela hap taim moa long painim amamas na yumi no gat taim long stadi gut long ol strongpela tok. (Efe. 5:15-17) Yumi olgeta i mas askim yumi yet olsem: ‘Planti taim mi stadi long ol strongpela tok bilong Baibel o olsem wanem? Mi save mekim long taim mi mas redim wanpela tok o wanpela hap bilong miting, na em tasol?’ Sapos olsem, ating yumi ken mekim gutpela wok moa long taim yumi makim bilong mekim Famili Lotu o stadi bilong yumi yet. Yusim dispela taim long stadi strong na painim savetingting bilong Jehova long Baibel, wankain olsem man i wok strong long painim silva. Dispela savetingting inap lukautim yumi na helpim yumi long stap gut long God i go inap long pinis.—Snd. 2:1-5.

OL SAMTING BILONG STRONGIM YUMI

14. Olsem wanem Baibel i soim olsem Jehova i tingim samting yumi pilim?

¹⁴ Planti samting i kamap long laip bilong Devit we i mekim em i bel hevi na i givim presa long em. (1 Sml. 30:3-6) Baibel i soim olsem Jehova i save long ol samting Devit i pilim. (Ritim Song 34:18; 56:8.) God i save tu long ol samting yumi pilim. Em i luksave long yumi gat hevi na yumi pilim nogut tru, dispela i mekim gut bel bilong yumi. Na dispela i bin mekim gut bel bilong Devit, em i singsing olsem: “Yu sori long mi oltaim, olsem na mi amamas long yu. Yu lukim dispela hevi bilong mi, na yu save long olgeta trabel i kamap long mi.” (Sng. 31:7) Tasol Jehova i no luksave tasol long ol hevi bilong yumi, nogat. Em i helpim yumi long sanap strong long rot bilong mekim gut bel bilong yumi na strongim yumi. Wanpela rot em i mekim olsem em long ol miting Kristen.

15. Samting i bin painim Asap i givim wanem skul long yumi?

¹⁵ Samting i bin painim Asap i helpim yumi  long kliagut long as na em i gutpela samting long yumi go long ol miting. Asap i wok long tingim olsem ol stretpela man i karim hevi, tasol ol man nogut i stap gut, na dispela i mekim em i bel hevi. Em i kisim tingting olsem pasin bilong lotuim Jehova i no gat as bilong en. Em i stori olsem: “Tingting bilong mi i kirap nogut, na bel bilong mi i pilim nogut tru.” Olsem na klostu em i lusim wok bilong Jehova. Wanem samting i bin helpim Asap long kisim stretpela tingting? Em i tok: “God . . . mi go insait long haus bilong yu.” Em inap stretim tingting bilong em taim em i poroman wantaim ol arapela man husat i lotuim Jehova. Asap i luksave olsem ol man nogut bai stap gut inap sotpela taim tasol na Jehova bai bekim pe i stret long pasin nogut ol i bin mekim. (Sng. 73:2, 13-22) Sampela taim yumi inap pilim olsem Asap. Ol pasin i no stret yumi lukim long dispela graun bilong Satan inap givim presa long yumi na mekim yumi bel hevi. Tasol taim yumi bung wantaim ol bratasista, yumi kisim strong na helpim yumi nidim bilong mekim yet wok bilong Jehova wantaim amamas.

16. Olsem wanem stori bilong Hana inap helpim yumi?

¹⁶ Tasol olsem wanem sapos wanpela samting i kamap insait long kongrigesen i mekim na yu hatwok long go long ol miting? Ating yu mas lusim sampela wok insait long kongrigesen yu bin holim na yu sem. O ating hevi i kamap namel long yu na narapela brata o sista. Sapos kain samting olsem i painim yu, orait stori bilong Hana inap helpim yu. (Ritim 1 Samuel 1:4-8.) Penina, narapela meri bilong man bilong Hana, i save bagarapim tru bel bilong Hana. Dispela i givim hatwok moa long Hana taim famili i go long olgeta yia long Silo bilong ofaim ol sakrifais long Jehova. Hana i pilim nogut tru na i save ‘krai na i no save kaikai.’ Tasol Hana i go yet long hap we em inap lotuim Jehova, em i no lusim. Long ai bilong Jehova pasin bilong Hana long stap gut long em i bikpela samting na em i blesim em.—1 Sml. 1:11, 20.

17, 18. (a) Olsem wanem ol miting bilong kongrigesen i save strongim yumi? (b) Yu pilim olsem wanem long ol samting Jehova i save mekim bilong lukautim yumi?

¹⁷ Ol Kristen long nau i mas bihainim pasin bilong Hana na go oltaim long ol miting. Yumi olgeta i bin kisim strong long ol miting. (Hib. 10:24, 25) Long ol miting, yumi pilim pasin laikim bilong ol bratasista na dispela i mekim gut bel bilong yumi. Ating yumi pilim tru bekim bilong wanpela brata o sista, o tok wanpela brata i mekim. O ating wanpela brata o sista i amamas long harim stori bilong yumi o ol i mekim sampela tok i mekim yumi stap bel isi. (Snd. 15:23; 17:17) Na taim yumi bungim nek wantaim na singsing long Jehova, yumi save kisim strong na yumi amamas. Taim yumi tingting planti long ol hevi, yumi nidim moa yet ol gutpela tok yumi kisim long ol miting. Long ol dispela miting Jehova i save “mekim bel bilong [yumi] i stap isi,” na dispela i helpim yumi long sanap strong na stap gut long em.—Sng. 94:18, 19.

¹⁸ Yumi stap bel isi aninit long lukaut bilong God, na yumi pilim wankain olsem Asap, husat i singsing long Jehova olsem: “Yu save holim han bilong mi. Yu save givim mi gutpela tok bilong stiaim wokabaut bilong mi.” (Sng. 73:23, 24) Yumi amamas tru olsem Jehova i save lukautim yumi bilong kisim bek yumi!

[Askim Bilong Stadi]

[Piksa long pes 28]

Jehova i bin kirapim yu tu long i kam long em

[Piksa long pes 30]

Yumi bihainim tok kaunsel bilong God na dispela i lukautim yumi

[Piksa long pes 31]

Ol gutpela tok i helpim yumi long sanap strong