Yumi Mas Amamas Wantaim!

PLANTI man i pilim olsem i hatwok moa yet long stap amamas na belgut. Planti man i hatwok tru long mekim gutpela tok long ol arapela. Laip long nau, moa yet long ol bikpela siti, i kirapim ol manmeri long tingim ol yet tasol na stap longwe long ol arapela.

Wanpela profesa bilong skelim pasin bilong ol man, Alberto Oliverio, i tok: ‘Planti man i pilim olsem ol i stap wanpis. Na tru tumas pasin bilong i stap long ol bikpela siti i kirapim ol man long stap longwe long ol arapela. Dispela i mekim na planti man i no tingim tumas sindaun na laip bilong wanpela wanwok, neiba, o man i wok long stua long hap ol i stap long en.’ Kain pasin olsem inap mekim man i bel hevi.

Sindaun na pasin bilong ol wanbilip Kristen i no olsem. Aposel Pol i tok: “Oltaim yupela i mas amamas i stap.” (1 Tes. 5:16) I. gat planti as long yumi stap amamas na belgut wantaim. Yumi lotuim God Antap Tru, Jehova; yumi kliagut long tok i tru bilong Baibel; yumi wetim God i kisim bek yumi na kisim laip oltaim; na yumi inap helpim ol arapela long kisim ol  dispela blesing.​—⁠Sng. 106:​4, 5; Jer. 15:16; Rom 12:⁠12.

Pasin bilong stap belgut na kamapim amamas bilong yumi long ol arapela, em pasin bilong ol Kristen tru. Olsem na yumi no kirap nogut long Pol i bin rait long ol Filipai olsem: “Mi belgut na amamas wantaim yupela olgeta. Na long wankain pasin yupela tu i mas belgut na amamas wantaim mi.” (Fili. 2:​17, 18) Long dispela sotpela tok, tupela taim Pol i stori long pasin bilong stap amamas na belgut wantaim ol arapela.

Tasol ol Kristen i mas was gut na sakim pasin bilong stap longwe long ol arapela. Man i stap longwe long ol arapela i no inap amamas wantaim ol wanbilip. Orait olsem wanem yumi ken bihainim tok bilong Pol long “amamas yet long Bikpela” wantaim ol brata bilong yumi?​—⁠Fili. 3:⁠1.

Amamas Wantaim Ol Wanbilip

Taim Pol i raitim pas i go long ol Filipai, ating em i stap kalabus long Rom long wok autim tok em i bin mekim. (Fili. 1:7; 4:22) Tasol pasin bilong stap kalabus i no daunim laik bilong em long autim tok. Em i amamas long givim bel olgeta long wok bilong Jehova na long stap “olsem ofa bilong wain em ol i kapsaitim.” (Fili. 2:17) Pasin bilong Pol i soim olsem maski man i stap olsem wanem, dispela i no as bilong amamas bilong em. Maski em i stap kalabus, em i tok: “Bai mi amamas yet.”​—⁠Fili. 1:⁠18.

Pol i bin kamapim kongrigesen long Filipai na em i laikim tru ol brata long dispela hap. Em i save olsem pasin bilong kamapim amamas bilong em long lotuim Jehova bai strongim bel bilong ol tu. Olsem na em i tok: “Ol brata, mi laik bai yupela i save olsem ol samting i bin kamap long mi i no bin pasim wok bilong gutnius, nogat, em i helpim dispela wok i go bikpela moa. Olsem na Lain Gad Bilong Sisar na olgeta arapela i kisim save olsem mi kalabus, long wanem, mi bilip long Krais.” (Fili. 1:​12, 13) Taim Pol i kamapim dispela gutpela ekspiriens, em i soim olsem em i belgut na amamas wantaim ol brata bilong em. Na ating ol Filipai i amamas wantaim Pol. Tasol bilong stap amamas, ol Filipai i no ken bel hevi long Pol i stap kalabus, nogat. Ol i mas bihainim pasin bilong Pol. (Fili. 1:14; 3:17) Ol Filipai inap tingim yet Pol long beten bilong ol na givim helpim long em.​—⁠Fili. 1:19; 4:​14-16.

Olsem wanem? Yumi save kamapim wankain pasin bilong amamas olsem Pol? Yumi traim long tingim ol gutpela samting long laip bilong yumi na wok autim tok bilong yumi? Taim yumi bung wantaim ol brata, i gutpela  long yumi amamas long wok autim bilong yumi. Yumi no ken ting yumi mas wet inap long yumi gat wanpela gutpela ekspiriens tru. Ating yumi bin mekim sampela tok i kirapim tru tingting bilong man na em i putim yau long gutnius bilong Kingdom. O ating yumi bin stori gut wantaim wanpela man long wanpela ves bilong Baibel. O ating ol man long teritori i luksave olsem yumi ol Witnes Bilong Jehova, na dispela i givim biknem long Jehova. Taim yumi kamapim ol kain ekspiriens olsem, dispela em wanpela rot we yumi ken amamas wantaim.

Planti wokboi bilong Jehova i bin lusim ol samting bilong ol yet bilong inapim dispela wok bilong autim tok. Ol painia, ol wasman raun, ol lain i wok long Betel, ol misineri, na ol intenesenel sevan i save givim taim na strong bilong ol long mekim fultaim sevis na ol i mekim wantaim amamas. Olsem wanem? Yumi save belgut na amamas wantaim ol? Sapos olsem, yumi mas kamapim olsem yumi tenkyu tru long ol dispela ‘wanwok i mekim wok bilong kingdom bilong God.’ (Kol. 4:11) Taim yumi bung wantaim long ol miting bilong kongrigesen o long ol kibung Kristen, yumi ken strongim bel bilong ol. Na tu, yumi ken bihainim pasin bilong ol long givim bel tru long wok. Na yumi ken mekim gut long ol, ating yumi ken singautim ol i kam kaikai wantaim yumi, na long dispela rot yumi ken harim ol ekspiriens na ol gutpela tok bilong ol.​—⁠Fili. 4:⁠10.

Amamas Wantaim Ol Man i Karim Hevi

Pol i bin sanap strong taim ol man i mekim nogut long em na em i winim ol hevi, na dispela i bin strongim em long stap gut long Jehova. (Kol. 1:24; Jems 1:​2, 3) Em i save olsem ol brata long Filipai bai bungim ol kain hevi olsem, na pasin bilong em long sanap strong bai strongim ol. Dispela i mekim em i belgut na amamas wantaim ol. Olsem na em i tok: “Yupela i kisim gutpela samting, olsem yupela i ken bilip long Krais, na tu, yupela i ken karim pen na hevi long nem bilong en. Yupela i gat wankain pait olsem yupela i lukim mi tu i gat.”​—⁠Fili. 1:​29, 30.

Na i wankain long nau tu, ol Kristen i mekim wok autim tok na long dispela as ol man i birua long ol. Sampela taim ol birua i paitim ol, tasol planti taim ol birua i mekim nogut long ol long narapela rot. Ating ol apostet i sutim tok giaman long ol, o ol famili i birua long ol, o ol wanwok na wanskul i tok bilas long ol. Jisas i tok lukaut olsem yumi no ken kirap nogut o bel hevi long ol kain hevi olsem, nogat. Ol i samting bilong amamas. Em i tok: “Sapos nem bilong mi i stap long yupela na ol man i krosim yupela na mekim nogut long yupela na giaman na sutim kain kain tok nogut long yupela, orait yupela i ken amamas. Yupela i ken belgut na amamas tru, long wanem, pe bilong yupela long heven bai i bikpela tru.”​—⁠Mat. 5:​11, 12.

Yumi no ken pret taim yumi harim olsem ol birua i mekim nogut tru long ol brata bilong yumi long sampela kantri. Nogat. Yumi mas amamas long ol i sanap strong. Yumi ken beten askim Jehova long helpim ol long holimpas bilip na helpim ol long sanap strong. (Fili. 1:​3, 4) Yumi no inap mekim planti samting moa bilong helpim ol dispela brata, tasol yumi inap helpim ol bratasista long kongrigesen bilong yumi yet husat i karim hevi. Yumi inap tingim ol na sapotim ol. Yumi inap amamas wantaim ol long rot bilong singautim ol i kam mekim Famili Lotu wantaim yumi, autim tok wantaim ol, na mekim ol samting bilong amamas wantaim ol.

I gat planti as na yumi amamas wantaim! Yumi mas sakim pasin bilong ol manmeri bilong dispela graun long i stap wanpis, na yumi mas wok yet long amamas wantaim ol brata bilong yumi. Long dispela rot yumi bai strongim pasin laikim na pasin wanbel insait long kongrigesen, na tu, bai yumi amamas tru long insait long bikpela lain brata Kristen. (Fili. 2:​1, 2) Yes, “amamas oltaim long Bikpela,” olsem Pol i tok: “Yupela i mas amamas!”​—⁠Fili. 4:⁠4.

[Piksa long pes 6]

Globe: Courtesy of Replogle Globes