Bipo Mi Pret Long Dai​​—Nau Mi Wet Long Laip i Gutpela Tru

Stori bilong Piero Gatti

KRAI bilong ol balus i wok long kamap bikpela moa. Bihain long en ol belo i krai bilong givim toksave long ol man long ol i mas painim ples hait. Orait nau i gat bikpela nois bilong ol bom i pairap na i bagarapim ples, pairap i bikpela tru na i bagarapim yau.

Dispela i kamap long Milan, Itali, long 1943 na 1944. Mi yangpela soldia na mi bin i stap long dispela hap. Planti taim ol i tokim mi long bungim bodi bilong ol man husat i bin stap insait long ol strongpela haus taim ol bom i pundaun, na bodi bilong ol i bruk bruk na stap nabaut na i hatwok long luksave long ol. Mi lukim ol man i dai, na sampela taim klostu mi tu i dai. Long ol kain taim olsem, mi save beten na tok promis long God olsem sapos mi abrusim dai, bai mi mekim laik bilong em.

Mi No Pret Moa Long Dai

Mi kamap bikpela long wanpela ples i stap klostu long boda bilong Swiselan, em i stap inap 10-pela kilomita longwe long Como, Itali. Taim mi yangpela yet, mi karim hevi bilong krai sore na pret long dai. Bikpela sik kus bilong Spen i kilim i dai tupela susa bilong mi. Na long 1930, taim mi gat 6-pela krismas mama bilong mi, Luigia, i dai. Mi kamap bikpela insait long lotu Katolik, olsem na mi bin bihainim ol lo bilong lotu na go long Misa long olgeta wik. Tasol sampela yia bihain long wanpela hap bilong katim gras bilong man​—⁠i no long wanpela haus lotu⁠—​mi lusim pasin bilong pret long dai.

Long 1944, long taim bilong Wol Woa 2, planti manmeri i wok long dai. Mi wanpela bilong planti tausen soldia bilong Itali husat i bin ranawe lusim ples pait na i go long Swiselan, we ol man i no insait long woa. Taim mipela kamap long hap, ol i kisim mipela i go long ol refiuji kem. Ol i salim mi i go long wanpela kem klostu long Steinach, long hap not is bilong kantri. Long dispela hap, mipela i stap fri liklik. Man bilong katim gras long Steinach i nidim wanpela long helpim em inap sotpela taim. Mi stap wantaim em na wok wantaim em inap wanpela mun tasol, na insait long dispela haptaim mi bungim wanpela man na dispela i senisim laip bilong mi.

Wanpela kastama em Adolfo Tellini, em man Itali na em i sindaun long Swiselan. Em i wanpela Witnes Bilong Jehova. Mi no bin save long dispela lain, long wanem, long dispela taim i bin i gat 150 Witnes tasol long Itali. Adolfo i tokim mi long ol gutpela tok i tru bilong Baibel, long ol tok promis bilong bel isi na laip i gutpela tru. (Jon 10:10; Rev. 21:​3, 4) Mi amamas tru long dispela stori bilong nupela taim bihain we i no gat moa dai na woa. Taim mi go bek long refiuji kem, mi kamapim dispela gutpela tok long wanpela yangpela man Itali, em Giuseppe Tubini, na em tu i pilim tru. Sampela taim Adolfo na ol narapela Witnes i save kam lukim mipela long kem.

Adolfo i kisim mi i go long Arbon, em 10⁠-⁠pela kilomita longwe long Steinach, we wanpela  liklik grup bilong ol Witnes i save mekim ol miting long tokples Itali. Mi pilim tru ol tok mi harim, olsem na long wik bihain mi wokabaut i go gen long dispela hap. Bihain, mi go long wanpela kibung bilong ol Witnes i kamap long wanpela haus kibung long Zurich. Mi kirap nogut long ol piksa ol i soim, em ol piksa bilong ol banis kalabus nogut we ol bodi bilong ol daiman i hip i stap. Mi kisim save olsem planti Witnes bilong Jemani i bin i dai, long wanem, ol i holimpas bilip bilong ol. Long kibung, mi bungim Maria Pizzato. Gavman Fasis bilong Itali i tok em i mas kalabus inap 11-pela yia, long wanem, em i mekim wok olsem wanpela Witnes.

Taim woa i pinis, mi go bek long Itali na bung wantaim wanpela liklik kongrigesen long Como. Mi no bin stadi gut long Baibel, tasol mi kliagut long ol bikpela tok i tru. Maria Pizzato tu i stap long dispela kongrigesen. Em i tokim mi long mi mas kisim baptais olsem ol Kristen i save mekim, na em i tokim mi long go lukim Marcello Martinelli, husat i stap long Castione Andevenno, long provins Sondrio. Marcello em wanpela brata Kristen God i bin makim, na gavman Fasis i tok em i mas kalabus inap 11-pela yia. Mi mas raun long baisikol inap 80 kilomita bilong go lukim em.

Marcello i yusim Baibel long stori long ol mak man i mas winim bilong kisim baptais, na bihain mipela i beten na go long wara Adda, na mi kisim baptais. Em long Septemba 1946. Dispela em wanpela spesel de! Mi amamas tru long disisen bilong mi long mekim wok bilong Jehova, na long bilip na wetim gutpela samting bai kamap bihain, olsem na long dispela nait, mi no luksave olsem mi bin raun long baisikol inap 160 kilomita long dispela de!

Long Me 1947, namba wan kibung bihain long woa i kamap long Itali, em long Milan. Inap olsem 700 i bung, na planti bilong ol em ol lain i bin karim bikpela hevi long han bilong gavman Fasis. Narapela kain samting i kamap long dispela kibung. Giuseppe Tubini, em man mi bin autim tok long en long refiuji kem, em i mekim tok bilong baptais​—⁠na bihain long tok em yet i kisim baptais!

Long dispela kibung, mi bungim Brata Nathan Knorr bilong Brooklyn Betel. Em i strongim mi na Giuseppe long yusim laip bilong mipela long mekim wok bilong God. Mi wokim disisen olsem insait long wanpela mun bai mi bai kirap mekim fultaim sevis. Taim mi kamap long haus, mi tokim famili long disisen bilong mi na ol i traim long senisim tingting bilong mi. Tasol mi strong long mekim. Olsem na wanpela mun bihain, mi kirap mekim wok long Betel long Milan. I gat 4-pela misineri i wok long Betel: Giuseppe (Joseph) Romano na meri bilong em, Angelina, na Carlo Benanti na meri bilong em, Costanza. Namba 5 memba bilong famili Betel em Giuseppe Tubini, i no longtaim em i bin kam, na mi namba 6.

Mi stap wanpela mun tasol long Betel na ol i makim mi long kamap wasman sekit​—⁠mi namba wan asples man Itali long mekim dispela wok. Brata George Fredianelli, em namba wan misineri bilong Amerika i kam long Itali long 1946, em i insait pinis long wok sekit. Em i bin trenim mi inap sampela wik, na bihain mi yet i kirap long raun. Mi inap tingim namba wan kongrigesen mi bin visitim, em Faenza. Tingim! I kam inap long dispela taim, mi no bin mekim yet wanpela tok long kongrigesen! Maski i olsem, mi bin strongim odiens, na planti yangpela, long tingting long insait long fultaim sevis. Bihain, sampela bilong ol dispela yangpela i kisim ol asainmen long mekim ol bikpela wok tiokratik long Itali.

Mi kirap long mekim dispela gutpela wok olsem wasman raun. Taim mi mekim dispela wok, i gat ol hatwok na amamas bilong en, ol samting mi kirap nogut long en, na mi mas senisim sampela tingting na pasin bilong mi, na tu, mi pilim tru bikpela pasin laikim bilong ol bratasista.

Ol Lotu Lain Bihain Long Woa

Mi laik stori long ol samting bilong lotu long Itali long dispela taim. Misin Katolik i bosim  strong ol man long sait bilong lotu. Nupela konstitiusen i kamap long 1948, tasol lo bilong gavman Fasis i tambuim ol Witnes long autim tok i no pinis inap long 1956. Ol pris i mekim na planti taim ol man i bagarapim ol kibung sekit. Tasol sampela taim wok bilong ol pris i lus nating, olsem i kamap long 1948 long Sulmona, em wanpela liklik taun long sentral Itali.

Kibung i kamap long haus tieta. Mi mekim wok siaman long Sande moning, na Giuseppe Romano i mekim pablik tok. Bikpela lain tru i bung. Long dispela taim namba bilong ol pablisa long kantri olgeta i no winim 500, tasol 2,000 manmeri i bung long tieta. Long pinis bilong tok, wanpela yangpela man i kalap i kam long pletfom. Tupela pris i stap long odiens i kirapim em long mekim olsem. Em i laik bagarapim kibung, olsem na em i singaut bikmaus. Wantu mi tokim em, “Sapos yu laik mekim sampela tok, orait rentim wanpela haus bung, na yu ken mekim wanem wanem tok yu laikim.” Odiens i no amamas long em, na singaut bilong ol i mekim na ol man i no inap harim nek bilong dispela man, so em i lusim pletfom na i go.

Long dispela taim, wok bilong raun i gat hatwok bilong en. Sampela taim mi wokabaut long wanpela kongrigesen i go long narapela, raun long baisikol, o raun long ol olpela bas i pulap long ol manmeri, o raun long tren. Sampela taim mi slip long haus bilong animal o haus bilong putim ol tul samting. Nau tasol woa i pinis, na planti lain bilong Itali i stap rabis. I no gat planti brata, na ol i no gat planti samting bilong skin. Tasol maski i olsem, pasin bilong mekim wok bilong Jehova fultaim i gutpela tru.

Kisim Trening Long Skul Gileat

Long 1950, ol i singautim mi na Giuseppe Tubini long insait long namba 16 klas bilong Skul Gileat bilong ol misineri. Taim skul i kirap, mi luksave olsem em bai hatwok tru long mi long lainim tok Inglis. Mi traim bes bilong mi, tasol em i hatwok tru. Mipela i mas ritim Baibel olgeta long tok Inglis. Bilong mekim olsem, sampela taim mi no go kaikai lans na bai mi ken prektis long rit. Orait taim bilong mi long mekim tok i kamap. Mi inap tingim yet tok tisa i mekim: “Yu wokim gut han na givim bel long mekim tok, tasol mipela i no inap kliagut liklik long tok Inglis bilong yu!” Maski i olsem, mi inap pinisim gut skul. Bihain, ol i makim mi na Giuseppe long go bek long Itali. Skul mitupela i bin kisim i helpim mipela long mekim gut moa wok bilong helpim ol brata.

Long 1955, mi maritim Lidia. Inap 7-pela yia paslain long dispela, mi bin mekim tok bilong baptais bilong em. Papa bilong em, Domenico, i wanpela gutpela brata husat i bin helpim olgeta  7-pela pikinini bilong em long kisim tok i tru, maski gavman Fasis i bin mekim nogut long em na salim em i go kalabus long narapela ples inap 3-pela yia. Lidia tu i wok strong long stap gut long tok i tru. Paslain long lo i orait long mipela i ken autim tok long ol haus, Lidia i bin kot inap 3-pela taim. Taim mipela i bin marit inap 6-pela yia, namba wan pikinini man bilong mipela, Beniamino, i bon. Long 1972, Lidia i karim narapela pikinini man, Marco. Mi amamas tru long tupela pikinini wantaim famili bilong ol i givim bel long mekim wok bilong Jehova.

Mekim Yet Wok Bilong Jehova

Insait long dispela wok bilong helpim ol narapela, planti samting i bin painim mi em mi inap tingim yet. Olsem, long 1982 samting, tambu papa bilong mi i raitim pas i go long presiden bilong Itali long dispela taim, em Sandro Pertini. Taim gavman Fasis i bosim kantri, tambu papa na presiden i bin kalabus long ailan Ventotene, we ol i kalabusim ol man em ol i ting ol i birua long gavman. Tambu papa i askim long kisim tok orait long bungim presiden na toktok wantaim em, em i laik autim tok long em. Taim em i kisim tok orait, mi go wantaim em, na presiden i welkamim mipela long gutpela pasin​—⁠em pasin planti man i no bin mekim long mipela. Presiden i holimpasim tambu papa bilong mi. Mipela i stori long bilip bilong mipela na givim sampela buk na nius long em.

Long 1991, taim mi bin stap olsem wasman raun inap 44 yia pinis, mi lusim wok sekit; mi bin visitim ol kongrigesen long olgeta hap bilong Itali. Bihain long dispela, inap 4-pela yia mi lukautim ol wok bilong wanpela Haus Kibung, tasol bihain sik i mekim na mi no inap mekim bikpela wok. Tasol bikpela pasin helpim bilong Jehova i mekim na mi stap yet insait long fultaim sevis. Mi traim bes bilong mi long autim gutnius na lainim ol man, na nau mi save lukautim sampela Baibel stadi. Ol brata i save tok yet olsem taim mi mekim tok, mi strong na givim bel tru long mekim. Mi tenkyu long Jehova long mi gat strong i stap yet maski krismas bilong mi i go antap.

Taim mi yangpela, mi pret tru long dai, tasol stretpela save mi kisim long Baibel i mekim na mi bilip na wet long kisim laip oltaim​—⁠em ‘laip i pulap tru’ olsem Jisas i bin tok. (Jon 10:10) Nau mi wet long kisim dispela samting​—⁠laip i gat bel isi, gutpela sindaun, na amamas long en, na planti blesing i kam long Jehova. Olgeta ona i ken i go long Krieta bilong yumi, em yumi amamas tru long nem bilong em i stap long yumi.​—⁠Sng. 83:⁠18.

[Mep long pes 22, 23]

SWISELAN

BERN

Zurich

Arbon

Steinach

ITALI

ROM

Como

Milan

Wara Adda

Castione Andevenno

Faenza

Sulmona

Ailan Ventotene

[Piksa long pes 22]

Taim mipela i go long Gileat

[Piksa long pes 22]

Mi na Giuseppe long Gileat

[Piksa long pes 23]

Long de mitupela i marit

[Piksa long pes 23]

Gutpela meri bilong mi i bin sapotim mi winim 55 yia