• Pikinini man i gat pasin antap​—em i gat 10 krismas tasol!

• Em i laik bai olgeta i tingim em olsem man i gat biknem.

Yu tingting, ‘Wai na em i mekim olsem? Mi laik bai em i amamas long em yet​—tasol em i no ken ting em i gutpela moa winim ol narapela!’

Yu ting i gat rot long skulim pikinini long pasin daun na long wankain taim em i ken amamas long em yet?

Insait long ol yia i go pinis, ol papamama i bihainim laik bilong pikinini; tok amamas oltaim long pikinini maski em i no mekim gutpela samting; na ol i no stretim pasin bilong pikinini. Ol i ting dispela bai helpim em long bilip long em yet taim em i kamap bikpela. Tasol ol wok painimaut i kamapim wanem samting? Buk Generation Me i stori long pasin bilong papamama long givim biknem long pikinini na i tok: “Dispela pasin i no helpim ol pikinini long bihainim stretpela pasin na stap amamas, nogat, ol i kisim pasin bilong tingim ol yet tasol.”

Planti pikinini husat i kamap bikpela insait long famili we i tok amamas oltaim long ol, ol i no redi long karim hevi taim ol narapela i bagarapim bel bilong ol, sutim tok long ol, na ol yet i popaia. Ol i lain long tingim laik bilong ol yet tasol, olsem na taim ol i kamap bikpela, ol i no save long hau ol inap stap olsem pren na pas gut wantaim ol narapela. Dispela i mekim na ol i kisim sik bilong tingting planti na bel hevi.

Pikinini bai kisim stretpela pasin bilong rispektim em yet sapos papamama i tok amamas taim em i mekim gutpela wok, na i no tok amamas nating long olgeta samting. Pikinini i mas bilip long em yet, na em i mas mekim sampela samting moa. Pikinini i mas lain long mekim wok, prektis, na stretim popaia. (Sindaun 22:29) Na tu, em i mas helpim ol narapela long ol samting ol i nidim. (1 Korin 10:24) Pasin daun bai kirapim pikinini long mekim ol dispela samting.

Tok amamas long taim i stret. Sapos pikinini meri i kisim gutpela mak long tes bilong skul, tok amamas long em. Sapos em i no kisim gutpela mak, no ken hariap long sutim tok long tisa. Dispela i no inap skulim pikinini long pasin daun. Helpim em long luksave long ol samting em i ken mekim na bai em inap kisim gutpela mak. Tok amamas taim em i kisim gutpela mak.

Stretim em long taim i stret. No ken daunim pikinini long olgeta taim em i popaia. (Kolosi 3:21) Tasol stretim em sapos em i mekim bikpela rong. Sapos yu no stretim em, ol pasin nogut bai kamap pasin bilong em.

Ating pikinini man i kisim pasin hambak. Sapos yu no stretim em, em inap kisim pasin antap na kirap long stap longwe long ol narapela. Eksplenim olsem ol narapela i no inap laikim em sapos em i hambak, na pasin hambak inap stiaim em long mekim samting we em yet inap sem long en. (Sindaun 27:2) Eksplenim tu olsem sapos man i gat stretpela tingting long em yet, em i no inap stori long ol samting em inap long mekim. Sapos yu bihainim pasin laikim na stretim pikinini, yu bai skulim em long daunim em yet na em bai holim yet pasin bilong rispektim em yet.—Stiatok bilong Baibel: Matyu 23:12.

Redim em long ol samting tru i save kamap. Sapos papamama i bihainim olgeta laik bilong pikinini, pikinini bai pilim olsem em i gat rait long kisim olgeta samting. Sapos pikinini i laikim wanpela samting we yu no gat mani long baim, orait eksplenim olsem em i bikpela samting long yupela i mas skelim gut hau yupela i yusim mani bilong famili. Sapos yu mekim plen long kisim famili i go raun o holide na bihain yu kenselim dispela plen, orait eksplenim olsem sampela taim ol samting i no inap kamap olsem yumi laikim, na dispela em nomol samting i kamap long olgeta man. Yu ken stori long olsem wanem yu yet i save karim dispela hevi. Larim pikinini tu long pilim pen bilong ol hevi na dispela bai redim em long karim ol hevi i painim em taim em i kamap bikpela man o meri.—Stiatok bilong Baibel: Sindaun 29:21.

Kirapim em long givim samting. Helpim pikinini long luksave olsem “amamas bilong givim samting i winim amamas bilong kisim samting.” (Aposel 20:35) Yu na pikinini i ken wokim lista bilong ol lain i nidim helpim long go long stua, kisim ol long kar, o stretim sampela samting i bagarap. Kisim pikinini i go wantaim yu taim yu go helpim sampela bilong ol. Larim pikinini i lukim amamas bilong yu long helpim ol narapela. Long dispela rot, pikinini bai lukim pasin tru bilong yu, na dispela em nambawan gutpela rot bilong skulim pikinini long bihainim pasin daun.—Stiatok bilong Baibel: Luk 6:38.