Sampela yia i go pinis, ol papamama em fes lain long toktok wantaim pikinini bilong ol long samting bilong maritpasin. Na taim pikinini i go bikpela, papamama i skelim krismas bilong em na stori long ol samting em i mas save long en.

Tasol dispela pasin i senis. Buk The Lolita Effect i tok: “Taim ol pikinini i liklik, ol i save pinis long ol samting bilong maritpasin, na ol muvi na musik samting bilong ol pikinini i stori tu long dispela.” Yu ting dispela i helpim ol pikinini o nogutim ol?

Stori bilong maritpasin i stap long olgeta hap. Deborah Roffman i raitim buk Talk to Me First, na em i tok: “Toktok namel long ol man, ol edvetaismen, ol muvi, ol buk, ol musik, ol TV program, ol teks mesis, ol gem, ol sainbot, na ol fon na kompiuta samting i soim piksa bilong ol lain i gat naispela skin na ol i mekim ol tok bilong pulim tingting bilong ol man, olgeta dispela samting i mekim na planti [tineja, ol pikinini bai kamap tineja, na ol liklik pikinini] i ting maritpasin em . . . nambawan bikpela samting.”

Ol edvetaismen i gat hap asua. Ol man i wokim na salim ol klos i pas tumas o i no haitim gut skin, olsem na taim ol pikinini i liklik ol i ting lukluk bilong ol em bikpela samting. Buk So Sexy So Soon i tok: “Ol lain i salim ol samting i save olsem ol yangpela i laik bai ol wanlain i orait long ol, olsem na ol i wokim edvetaismen bilong pulim tingting bilong ol. Ol piksa na ol prodak samting ol i wokim i bilong kirapim ol pikinini long baim ol nupela samting, na i no bilong tingim maritpasin.”

Skulim pikinini long mekim gutpela disisen. Tingim, ating wanpela man i gat bikpela save long fiksim kar, tasol dispela i no makim olsem em bai kamap gutpela draiva, nogat. Olsem tasol, maski man i kisim skul long ol samting bilong maritpasin, dispela i no makim olsem em bai mekim ol gutpela disisen.

Poin em olsem: Long nau, winim olgeta taim bipo, yu mas helpim pikinini long “skelim ol samting,” na em bai “kliagut long wanem samting i stret na wanem samting i no stret.”—Hibru 5:14.

Skulim pikinini bilong yu. Ating yu pilim olsem i hatwok long toktok wantaim pikinini long samting bilong maritpasin, tasol em samting yu mas mekim.—Stiatok bilong Baibel: Sindaun 22:6.

Painim rot bilong toktok wantaim pikinini. I no olsem yu mas makim taim stret bilong stori wantaim pikinini. Painim rot bilong toktok wantaim em, olsem long taim yupela i raun long kar o mekim haus wok. Na mekim ol askim na bai pikinini i kamapim tingting bilong em. Askim em, “Yu ting wai na ol lain bilong salim ol samting i wokim kain kain edvetaismen?” Abrusim kain askim olsem, “Yu amamas long lukim ol edvetaismen i soim ol manmeri i werim ol klos i pas tumas na i no haitim gut skin?” Taim pikinini i bekim tok, yu ken askim em, “Yu gat wanem tingting long dispela?”—Stiatok bilong Baibel: Lo 6:6, 7.

Tingim krismas bilong pikinini. Taim pikinini i gat 4 o 5 krismas samting, yu ken skulim em long nem bilong ol hap bilong bodi na samting em i ken mekim taim wanpela i laik bagarapim em. Na taim em i go bikpela, tokim em long ol samting em i mas save long samting bilong maritpasin. Na long taim em i kamap tineja na ol senis i kamap long bodi bilong em, em bai save wai ol senis i kamap na em bai kliagut long ol stretpela lo bilong maritpasin.

Skulim pikinini long holim stretpela tingting. Taim pikinini i liklik yet, skulim em long ol gutpela pasin, olsem onest pasin, stap gut long narapela, na pasin rispek. Na taim yupela i toktok long ol samting bilong maritpasin, nau yu ken stori moa long ol gutpela pasin ol i ken bihainim. Kamapim klia olsem ol i mas holim stretpela tingting long maritpasin. Olsem, sapos yu tokim pikinini olsem i no stret long ol singel i mekim maritpasin, i gutpela long tokim em long risen na dispela pasin inap nogutim em. Buk Beyond the Big Talk i tok: “Planti tineja i tok papamama bilong ol i no orait long ol tineja i mekim maritpasin, ol yet i no save mekim dispela pasin.”

Stap gutpela piksa. Bihainim ol pasin yu skulim ol narapela. Olsem wanem? Yu save lap long ol tok pilai doti na werim ol klos i pulim ai bilong narapela? Yu save tok gris long ol narapela? Sapos yu skulim pikinini long abrusim ol kain pasin, tasol yu yet i mekim, em bai bihainim wankain pasin.—Stiatok bilong Baibel: Rom 2:21.

Tingim maritpasin olsem presen. God i givim maritpasin olsem presen long ol marit lain, na ol i kisim amamas long dispela rot. (Sindaun 5:18, 19) Tokim pikinini olsem taim em i marit, em bai amamas long dispela presen, na em bai no tingting planti na wari, em hevi i painim ol lain i mekim maritpasin taim ol i singel.—1 Timoti 1:18, 19.