Ol man i no bel nogut tasol long ol man bilong narapela lain, skin, traib, o tokples, nogat, ol i bel nogut tu long ol man bilong narapela lotu, man o meri, o ol man i gat narapela sindaun. Sampela i save skelim ol man long krismas, ediukesen, man i gat bagarap long bodi, o lukluk bilong man. Maski i olsem ol i tok ol i no bel nogut long narapela lain.

Ating yu kisim pasin bilong bel nogut long narapela lain? Planti bilong yumi inap luksave olsem wanpela i gat pasin bilong bel nogut long narapela lain. Tasol i hatwok long luksave olsem yumi yet i gat dispela pasin. Tru tru yumi olgeta i save mekim dispela pasin. Taim ol man i tingting kranki long wanpela lain na bihain ol i bungim wanpela bilong dispela lain, profesa David Williams i tok “ol bai mekim narapela kain pasin long dispela man na ol i no save olsem ol i mekim dispela pasin.”

Olsem, long kantri Bolkan we Jovica i stap, i gat wanpela liklik lain i stap. Em i tok: “Mi ting i no gat wanpela long dispela liklik lain i gutpela man. Tasol mi no ting mi bel nogut long ol. Mi tokim mi yet olsem ‘mi save gut long ol, na dispela em tru.’”

Planti gavman i putim ol lo long stopim pasin bilong bel nogut long ol narapela skin kala na ol narapela pasin bilong luk daun long narapela lain. Tasol dispela pasin i stap yet. Bilong wanem? Bikos ol dispela lo i stopim tasol pasin man i mekim. Ol dispela lo i no inap bosim tingting na filings bilong man. Na pasin bilong bel nogut long narapela i kirap long tingting na bel. So yu ting ol man inap daunim dispela pasin? Yu ting i gat wanpela rot bilong pinisim?