Ol saveman long Milan long Itali i mekim wok painimaut na ol i tok, ol bebi em mama i karim hariap tumas na ol i stap long haus sik i kisim helpim taim ol dokta i pasim wanpela liklik masin long han bilong ol. Dispela liklik masin i helpim bebi long harim nek bilong mama wankain olsem long taim bebi i stap yet long bel. Wok painimaut i tok: “Taim ol dispela bebi i harim nek bilong mama, dispela i lukautim helt bilong ol.”

BAIBEL I TOK: “Mi sindaun gut na mi bel isi. Mi stap olsem pikinini i slip i stap long han bilong mama bilong em yet.”—Song 131:2.

Long Netelan, ol i mekim wok painimaut long 565 pikinini. Na ol pikinini em papamama bilong ol i tok ol i “winim ol arapela pikinini” na ol i “gat rait long kisim helpim,” planti bilong ol i gat pasin bilong tingim ol yet, ol i ting ol i winim ol narapela, na ol i ting ol i mas kisim olgeta samting ol i laikim. Wanpela man i raitim buk long dispela wok painimaut i tok: “Ol pikinini i save bilipim tok bilong papamama olsem ol i winim ol narapela. Tasol dispela i no helpim ol pikinini na ol famili.”

BAIBEL I TOK: “Mi tok long olgeta man wan wan i stap namel long yupela, yu no ken ting yu nambawan tru. Tasol yupela i mas wokim tingting long pasin i soim olsem yupela i gat gutpela tingting.”—Rom 12:3.

Ol saveman long Heidelberg University long Jemani i mekim wok painimaut na ol i tok, ol man i gat 100 krismas i gat bikpela laik long stap laip, maski ol i sik na ol i nogat strong. Long olgeta 4-pela man i gat 100 krismas em ol i intaviuim, 3-pela bilong ol i tok ol i mekim ol samting bilong i stap amamas. Ol i amamas olsem ol inap mekim ol samting ol i laik mekim, ol i pilim olsem laip i gat as bilong en, na tu, ol i givim bel long go long lotu na bihainim ol stretpela pasin.

TINGIM DISPELA: Tok bilong Baibel long Saveman 3:11 i tok yumi gat laik long i stap laip oltaim na dispela i kamapim klia wanem samting?