Yu bin skul long wanem ol samting?

Long skul mi kisim save long bilip bilong evolusen, tasol ol tisa i no stori long hau ol samting i gat laip i kamap. Taim papamama bilong mi i insait long lotu Tao, mi save harim ol tisa bilong lotu i skulim ol, olsem na mi givim planti askim long ol. Tasol ol inap bekim sampela askim bilong mi.

Bilong wanem yu kamap saveman bilong matematiks?

Taim mi stap long elementri skul, mi amamas long kisim save long matematiks. Olsem na taim mi go long yunivesiti, mi insait long ol kos bilong matematiks. Mi save amamas tru long kisim save long ol wok painimaut bilong matematiks.

Wanem samting i kirapim yu long kisim save long Baibel?

Long 1978 taim mipela i stap long Amerika, meri bilong mi Jinghuei i kirap long stadi long Baibel wantaim ol Witnes Bilong Jehova, sampela taim mi sindaun wantaim ol long taim bilong stadi. Long dispela taim, Jinghuei i grediuet long yunivesiti na kisim setifiket olsem savemeri bilong fisiks. Na mi skul long matematiks long Purdue University long Indiana.

Yu gat wanem tingting long Baibel?

Mi amamas long kisim save long olsem wanem God i redim graun bilong ol man i ken stap laip long en. Long Baibel, Buk Stat i stori olsem God i wokim  olgeta samting insait long 6-pela de, dispela i narakain long ol stori tumbuna bilong ol man. a Tasol inap planti yia mi no bilip olsem i gat Krieta.

Bilong wanem yu no bilip long Krieta?

Mi holim strong bilip mi gat inap planti yia. Mi ting sapos mi bilip long Krieta, i olsem mi sakim bilip mi gat taim mi liklik yet. Lotu Tao i no skulim ol man olsem i gat God o Krieta i stap.

Tasol bilong wanem yu senisim tingting bilong yu?

Mi tingim olsem wanem ol samting i gat laip i kamap, na dispela i strongim bilip bilong mi olsem namba 1 samting God i wokim i mas narakain tru. Olsem, ol samting i gat laip i gat DNA na dispela i helpim ol long kamapim pikinini i luk wankain olsem ol. Na tu, ol liklik sel i nidim ol molekiul long kamapim ol nupela sel, na helpim sel long stap strong na bai em i ken mekim ol wok bilong en. Olsem wanem ol sel na molekiul samting i kamap nating long ol samting i nogat laip? Olsem wanpela saveman bilong matematiks, mi luksave olsem i mas i gat Man i bin wokim ol dispela samting.

Wanem samting i kirapim yu long kisim sampela save moa long ol bilip bilong ol Witnes Bilong Jehova?

Mi bin stadi wantaim ol Witnes, tasol mi no givim bel tumas. Long 1995, taim mi go long Taiwan mi bin sik, olsem na mi mas go long haus sik. Maski meri bilong mi i stap long Amerika, em i toksave long ol Witnes Bilong Jehova long Taiwan long bungim mi. Ol i kam bungim mi long haus sik. Mi taiet nogut tru na mi stap ausait, long wanem, i no gat planti bet bilong ol sikman. Wanpela bilong ol dispela Witnes i kisim mi i go long wanpela hotel na bai mi ken malolo. Bihain long mi malolo liklik, em i kisim mi go long haus sik bilong kisim marasin samting.

Mi pilim tru gutpela pasin bilong em na ol narapela Witnes Bilong Jehova husat i save tingim tru famili bilong mi. Mi luksave olsem bilip bilong ol i helpim ol long stap narakain. Olsem na mi orait long ol i ken stadi gen wantaim mi long Baibel. Wanpela yia bihain mi kisim baptais.

Bilip bilong yu i pait wantaim save yu kisim long yunivesiti?

Nogat tru! Inap planti yia nau mi mekim wok painimaut bilong matematiks long helpim ol saientis husat i stadim wok bilong DNA. Wok painimaut bilong DNA i helpim yumi long luksave olsem Man i wokim ol dispela samting i gat bikpela save tru.

Yu laik stori long wanpela eksampel.

Tingim hau ol samting i gat laip i kamapim pikinini. Sampela binatang olsem ol amoeba i gat wanpela sel, na i no olsem i mas i gat man na meri bilong kamapim pikinini. Sel bilong ol dispela binatang i save bruk i go tupela hap bilong kamapim pikinini. Ol saveman i kolim dispela olsem asexual reproduction. Tasol planti animal na diwai samting i save kamapim pikinini taim sel bilong man na meri i bung wantaim. Bilong wanem dispela kain pasin bilong kamapim pikinini i narakain tru?

I no stret long ting olsem pasin bilong ol sel long bruk i go tupela hap i senis i go long ol samting we i gat sel bilong man na meri bilong kamapim samting i gat laip. Taim yumi tingim pasin bilong ol animal na diwai samting long bungim sel bilong man na meri bilong kamapim samting i gat laip, em narakain samting tru. Na i hatwok long ol man i bilip long evolusen i kliagut long en. Olsem na mi ting, pasin bilong man na meri long kamapim pikinini i soim olsem God i gat bikpela save tru.