OL MAN i ting inap olsem 2.5 milion man long graun olgeta i gat sik sklirodema. Mining bilong dispela tok sklirodema i makim skin i go strong. Planti taim sik localized sklirodema i save kamap long ol pikinini. Dispela sik i mekim na skin bilong ol i go kamap strong.

Taim Elisa i gat 10-pela krismas, em i kisim sik systemic sklirodema. Dispela sik i save bagarapim skin bilong man, na ol hap bilong bodi olsem kidni, klok, waitlewa, na rop bilong bel. Ol dokta i ting ol marasin samting Elisa i kisim i bilong helpim em long stap laip inap 5-pela yia. Tasol Elisa i stap laip inap 14 yia nau. Maski sik bilong em i no pinis, em i holim stretpela tingting long ol samting i painim em. Nius Kirap! i toktok wantaim Elisa long sik bilong em na olsem wanem em i karim dispela hevi.

 Wanem namba 1 taim yu luksave olsem yu gat bikpela sik?

Taim mi gat 9-pela krismas, mi kisim bagarap long elbo na sua i kamap. Dispela sua i no inap pinis na dispela i givim bikpela pen long mi. Olsem na mipela i go lukim dokta na ol i sekim blut bilong mi na painimaut olsem mi gat sik systemic sklirodema. Helt bilong mi i wok long go nogut, olsem na mipela i mas painim wanpela dokta i gat ekspiriens long helpim ol man i gat sik sklirodema.

Yupela i bin painim wanpela dokta bilong helpim yu?

Mipela i painim dokta bilong helpim ol man i gat sik long ol masol na join bilong bun. Dispela dokta i tokim papamama bilong mi olsem sapos mi kisim marasin kimoterapi, dispela bai helpim mi long stap laip inap 5-pela yia moa, na tu, ating dispela marasin bai daunim sik bilong mi. Tasol marasin kimoterapi inap kamapim sampela hevi tu, olsem imiun sistem long bodi bilong mi i no inap wok gut. Olsem na sapos mi kisim liklik sik olsem kus samting, mi inap long i dai.

Tasol yu stap laip yet.

Yes, mi amamas olsem mi stap laip yet! Taim mi gat 12 krismas samting, long olgeta de mi save pilim bikpela pen long bros bilong mi inap olsem 30 minit samting. Dispela inap kamap 1-pela o 2-pela taim long wanpela de. Mi save pilim bikpela pen tru, olsem na mi save singaut.

Wanem samting i as bilong ol dispela pen?

Ol dokta i painimaut olsem mak bilong hemoglobin long blut bilong mi i go daun, na klok bilong mi i wok strong tru long salim blut i go long kru bilong mi. Mi kisim ol marasin samting, na insait long sampela wik mi kamap orait liklik. Maski i olsem, sik bilong mi i stap yet. Olsem na mi pilim olsem mi no inap mekim wanpela samting long helpim mi yet.

Yu karim dispela hevi inap 14 yia pinis. Tasol olsem wanem long nau?

Mi save pilim pen yet na mi gat ol narapela hevi long bodi em sik sklirodema i kamapim. Ol kain hevi olsem ol sua i kamap insait long waitlewa na ol narapela hap bilong bodi, na tu, mi save kisim hat-ben. Maski mi karim dispela hevi, i gat planti narapela samting mi save mekim, olsem na mi no tingim hevi bilong sik bilong mi.

Yu save mekim wanem ol samting?

Mi save amamas long droim ol piksa, samapim ol klos, na wokim ol nekles na yauring samting. Tasol bikpela samting moa em olsem mi wanpela Witnes Bilong Jehova na mi save skulim ol man long tok bilong Baibel. Maski mi no inap wokabaut i go long haus bilong ol man, mi inap helpim ol narapela Witnes long mekim ol Baibel stadi wantaim ol man i stap klostu long hap mi stap long en. Na tu, mi gat ol Baibel sumatin bilong mi yet. Wok bilong skulim ol narapela long tok bilong Baibel i mekim na laip bilong mi i gat as bilong en.

Bilong wanem yu save mekim dispela wok maski yu gat ol hevi bilong yu yet?

Mi save olsem ol tok mi skulim ol man long en i bikpela samting na inap long helpim ol. Na tu, mi save amamas taim mi givim bel long helpim ol arapela. Na insait long dispela liklik haptaim mi pilim olsem mi stap helti na mi nogat sik!

Olsem wanem Baibel i helpim yu long stap amamas?

Ol tok bilong Baibel i helpim mi long tingim olsem ol pen na hevi i painim yumi i bilong sotpela taim tasol. Long Baibel, Revelesen 21:4 i tok long taim God i makim em “bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen.” Ol kain gutpela tok olsem i strongim bilip bilong mi long ol tok promis bilong God. Em i tok promis olsem ol man bai i no sik na ol pen na hevi bai pinis.