SIK bilong gam em wanpela sik bilong maus em planti man long olgeta hap i save kisim. Taim man i kisim dispela sik, i hatwok long luksave long ol mak bilong en. Nius International Dental Journal i tok ol sik bilong tit na gam em “wanpela bikpela hevi long helt bilong ol man.” Dispela nius i tok moa olsem sik bilong gam i save putim “hevi long ol man, olsem ol i pilim pen, ol i no inap kaikai gut na dispela inap mekim na ol i no amamas long laip bilong ol.” Bai yumi stori long ol hevi dispela sik i save kamapim, na dispela bai helpim yu long abrusim sik bilong gam.

Namba wan samting i kamap taim man i kisim sik bilong gam, em gam i sua na solap, na sampela taim blut i kamap long gam. Ol i kolim dispela olsem gingivitis. Blut inap kamap taim man i brasim o klinim tit. Na tu, taim ol dentis i sekim gam na luksave olsem gam i blut, dispela i soim olsem man i gat gingivitis.

Taim sik bilong gam i go bikpela, ol i kolim dispela olsem periodontitis. Dispela sik i save bagarapim ol bun na mit bilong gam em ol i stap bilong strongim tit. Yu no inap luksave long ol mak bilong periodontitis i go inap long taim em i go bikpela. Sampela mak bilong periodontitis em olsem ol spes i kamap namel long ol tit, tit i lus, maus i smel, gam i blut, na gam i surik i go daun, dispela i mekim na ol tit i luk longpela.

I gat planti samting i save kamapim sik bilong gam. Wanpela bilong ol dispela samting em plek, em wanpela liklik binatang jem i save pas long tit. Sapos yu no rausim plek, dispela binatang jem inap mekim gam i solap. Taim dispela i kamap, gam i stat long seperet long tit na dispela bai opim rot long binatang plek long gro long gam. Taim dispela binatang i go long olgeta hap bilong gam, dispela i mekim na sua i kamap na  i bagarapim ol bun na mit bilong gam. Binatang plek i stap long gam inap go strong olsem simen (tartar). Ol inap pas strong long tit na i hatwok long rausim. Olsem na binatang plek bai wok yet long bagarapim gam.

I gat ol narapela samting tu inap mekim na yu kisim sik bilong gam. Olsem, yu no brasim na klinim gut tit, kisim ol marasin i daunim wok bilong imiun sistem, kisim sik long rot bilong ol vairas samting, presa, planti suga long bodi, dring planti alkohol, pasin bilong smok tabak, na senis i kamap long bodi taim meri i kisim bel.

Sik bilong gam inap givim ol narapela hevi tu long yu. Olsem gam i pen o tit i lus na dispela i mekim na yu hatwok long kaikai gut. Yu no inap toktok gut na pes na lukluk bilong yu bai senis. Ol wok painimaut i soim olsem pasin bilong lukautim gut tit na gam inap helpim helt bilong yu.

Hau bai yu save olsem yu gat sik bilong gam? Yu inap luksave long sampela mak em yumi stori long en long dispela atikol. Sapos yu luksave olsem yu gat sik bilong gam, i gutpela yu lukim wanpela dentis husat inap helpim yu long stretim dispela hevi.

Yu ting i gat rot bilong pinisim sik bilong gam? I gat rot long mekim olsem taim sik i kamap nupela. Sapos periodontitis i kamap, yu mas mekim sampela samting long daunim na bai em i no inap long bagarapim bun na mit bilong gam. Ol dentis inap yusim ol spesel tul bilong rausim plek na ol samting olsem simen i pas long tit na long gam.

Sapos yu no inap long lukim wanpela dentis bilong helpim yu, orait yu inap mekim sampela samting long abrusim dispela sik. Namba wan rot em long brasim na klinim gut tit long olgeta taim.