Long nau, teknoloji i mekim na yumi inap putim nem bilong ol man long kompiuta o fon samting na long dispela rot yumi gat planti handret o tausen pren long rot bilong Intenet. Sapos yumi no laik stap pren bilong ol, yumi save rausim nem bilong ol long fon o kompiuta. Maski i olsem, samting i painim dispela meri long Briten i kamapim klia olsem planti man i no save wanem samting i makim gutpela pren. Maski planti man i save toktok gut wantaim, wanpela wok painimaut i kamapim olsem namba bilong ol man husat i stap olsem gutpela pren bilong yumi i wok long go daun.

Yu bai wanbel long tok bilong planti man olsem em i bikpela samting long i gat ol gutpela pren. I gat planti samting yu mas mekim bilong i stap olsem gutpela pren, yu no inap stap pren long rot bilong kompiuta na smat fon tasol. Yu laik bai pren bilong yu i gat wanem ol pasin? Hau bai yu stap olsem gutpela pren? Yu mas mekim wanem na bai dispela pasin pren bilong yu i stap oltaim?

Skelim dispela 4-pela stiatok, na tingim olsem wanem tok bilong Baibel inap helpim yu long stap gutpela pren bilong ol narapela.

Bilong stap olsem gutpela pren, yu mas givim taim na strong bilong yu long helpim narapela. Yumi ken tok, gutpela pren bai pilim olsem em i mas mekim ol samting bilong helpim yu, na em i save tingim tru yu. Bilong i gat kain pren olsem, yutupela wantaim i mas wok strong long lusim sampela samting bilong helpim narapela narapela. Tasol yupela i mas wok strong long mekim olsem na bai yupela inap stap ol gutpela pren. Askim yu yet, ‘Mi redi long daunim mi yet, lusim taim bilong mi, na ol samting mi gat bilong helpim pren bilong mi?’ Tingim, bilong yu ken i gat gutpela pren, pastaim yu yet i mas stap olsem gutpela pren.

PASIN YU LAIK BAI PREN BILONG YU I MEKIM

Irene: “Wankain olsem man i planim naispela gaden, yu mas lusim bikpela haptaim long i stap pren bilong narapela na lukautim gut dispela pasin pren. Pastaim yu yet i mas stap olsem gutpela pren. Yu mas soim olsem yu laikim ol narapela na yu tingim tru ol. Na redi long lusim haptaim bilong yu long helpim ol taim ol i nidim helpim.”

Luis Alfonso: “Long nau ol manmeri i kirapim ol narapela long tingim ol yet tasol, na i no tingim laik bilong narapela. Olsem na em i bikpela samting taim wanpela i soim olsem em i tingim tru yu, na em i no mekim olsem bikos em i laik yu bai givim em wanpela presen.”

BAIBEL I TOK WANEM?

“Ol pasin yupela i laik bai ol man i mekim long yupela, yupela i mas mekim wankain pasin long ol. Bihainim pasin bilong givim ol samting long ol man, na ol bai givim ol samting long yupela.” (Luk 6:31, 38) Jisas i kamapim klia olsem pasin bilong givim samting na tingim tru ol narapela i bikpela samting. Taim yu mekim olsem, bai yu stap olsem gutpela pren. Sapos yu gat pasin bilong helpim narapela na yu no ting olsem ol i mas bekim ol samting yu givim long ol, dispela bai mekim na ol bai amamas long i stap pren bilong yu.

Bilong stap yet olsem gutpela pren, yu na pren bilong yu i mas toktok gut wantaim. Olsem na toktok wantaim em long ol samting yu gat laik long mekim. Putim yau long tok bilong pren bilong yu na rispektim tingting bilong em. Na taim i gat rot long mekim, tok amamas na mekim ol tok bilong strongim em. Sampela taim, pren bilong yu i nidim edvais o tok bilong stretim em, na ating i hatwok long mekim olsem. Tasol gutpela pren inap tokim yu long ol popaia bilong yu na em inap givim ol tok bilong helpim yu.

PASIN YU LAIK BAI PREN BILONG YU I MEKIM

Juan: “Gutpela pren bai kamapim tingting bilong em, tasol em bai no bel hevi taim yu no wanbel long tingting bilong em.”

Eunice: “Mi laik bai pren bilong mi i redi long lusim haptaim long putim yau long tok bilong mi, moa yet long taim mi gat hevi.”

Silvina: “Gutpela pren bai kamapim tingting tru bilong em bikos em i laik helpim yu, maski em i save olsem yu bai bel hevi.”

BAIBEL I TOK WANEM?

“Olgeta man i mas putim yau kwik long harim tok, na ol i no ken hariap long mekim toktok. Na ol i no ken belhat hariap.” (Jems 1:19) Ol gutpela pren bai amamas long putim yau long tok bilong yu. Sapos yu toktok planti, dispela inap mekim na pren bilong yu bai pilim olsem yu no pilim tingting bilong em i olsem bikpela samting. Olsem na yu mas redi long putim gut yau taim pren bilong yu i kamapim ol tingting i stap long bel bilong em. Na no ken bel hevi sapos em i kamapim tingting tru bilong em long wanpela samting. Sindaun 27:6 i tok: “Ol pren tru i save givim pen long yu bilong helpim yu.”

Taim yu pas gut wantaim wanpela pren, yu inap luksave long ol pasin kranki bilong en. Ol pren bilong yumi i no gutpela olgeta, na yumi tu i no gutpela olgeta. Olsem na yumi no ken ting ol pren bilong yumi bai bihainim stretpela pasin long olgeta taim, nogat. Yumi mas tok amamas long ol gutpela pasin bilong ol na no ken tingim ol pasin kranki bilong ol.

PASIN YU LAIK BAI PREN BILONG YU I MEKIM

Samuel: “Planti taim yumi laik ol narapela i mas bihainim stretpela pasin, tasol yumi no tingim pasin yumi yet i save mekim. Sapos yumi luksave long ol pasin kranki bilong yumi na yumi laik bai ol narapela i fogivim yumi, orait yumi bai redi long fogivim narapela.”

Daniel: “Tingim olsem sampela taim ol pren bilong yu bai popaia. Taim wanpela hevi i kamap, yumi mas hariap long stretim na lusim tingting long dispela samting.”

BAIBEL I TOK WANEM?

“Planti taim yumi olgeta i save popaia. Sapos man i no popaia long tok em i mekim, orait dispela man i gutpela olgeta, na em inap bosim gut bodi olgeta bilong em.” (Jems 3:2) Taim yumi tingim dispela tok, dispela bai helpim yumi long pilim hevi bilong ol pren bilong yumi. Na dispela inap helpim yumi long lusim ol rong na popaia bilong ol maski yumi bel hevi. Baibel i tok: “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela. . . . Na i no ol dispela samting tasol. Yupela i mas werim pasin laikim olsem yupela i werim klos, long wanem, pasin laikim em i nambawan gutpela rot bilong mekim ol man i kamap wanbel.”—Kolosi 3:13, 14.

Tru yumi laik makim gut ol pren bilong yumi. Tasol dispela i no makim olsem yumi mas pren wantaim ol lain i gat wankain krismas o i stap bilong ol i wankain olsem bilong yumi. Taim yumi soim olsem yumi tingim ol narapela maski ol i gat wanem krismas na ol i bilong narapela narapela kantri na sindaun, dispela inap mekim na yumi stap amamas.

PASIN YU LAIK BAI PREN BILONG YU I MEKIM

Unai: “Taim yu pren tasol wantaim ol wankrismas na ol man i gat wankain laik olsem yu, dispela i kain olsem yu pasim klos i gat feiveret kala bilong yu long olgeta taim. Maski yu laikim tru dispela kala, ating bihain bai yu pilim olsem yu les long dispela kala.”

Funke: “Taim mi stap pren bilong olgeta, dispela i helpim mi long wokim tingting olsem meri i bikpela pinis. Mi lain long stap pren wantaim ol man i gat kain kain krismas na ol man bilong narapela narapela sindaun na ples, na dispela i helpim mi long toktok gut wantaim olgeta na redi long mekim sampela senis. Taim mi mekim olsem, ol pren bilong mi i amamas.”

BAIBEL I TOK WANEM?

“Mi toktok long yupela olsem yupela i pikinini bilong mi. Yupela tu i mas mekim pasin laikim bilong yupela i go bikpela moa.” (2 Korin 6:13) Baibel i kirapim yumi long stap pren bilong olgeta kain man. Taim yu stap pren bilong olgeta, dispela inap mekim na yu stap amamas, na tu, ol arapela inap laikim yu.