BAIBEL I TOK WANEM?
Death
Ol man i dai pinis i stap we?
“Mi bin wokim yu long graun, na bai yu go bek gen long graun.”—Stat 3:18, 19.
OL MAN I TOK
Ol man i dai pinis i go stap long wanpela ples, olsem heven, helpaia, klinpaia o Limbo. Ol narapela i bilip olsem taim man i dai, em i kamap animal o binatang samting. Sampela husat i no bilip long ol tingting bilong lotu i ting olsem taim man i dai, dispela em pinis bilong laip bilong em.
BAIBEL I TOK
Saveman 9:10 i tok: “Yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” Baibel i stori tu long samting i painim ol man na ol animal taim ol i dai. Em i tok: ‘God i bin kisim graun na wokim ol, olsem na taim ol i dai bai ol i kamap olsem graun gen.’—Saveman 3:20.
Wanem samting i painim ol man i dai pinis?
“Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.”—Song 146:4.
OL MAN I TOK
Planti lotu i skulim ol man olsem pasin man i mekim taim em i stap laip inap makim samting bai painim em bihain long em i dai. Sapos em i mekim ol gutpela pasin em bai go stap long wanpela gutpela ples na stap amamas oltaim, na sapos em i mekim ol pasin nogut em bai go stap long wanpela ples bilong kisim pen inap oltaim. Ol man i tok tu olsem bihain long man i dai, em i mas kamap gutpela olgeta bilong i go sanap long pes bilong God. Na sapos man i no kamap klin orait em bai kisim pen inap oltaim.
BAIBEL I TOK
Ol man i dai pinis i no stap amamas o pilim pen long wanpela ples. Ol i no inap wokim tingting, ol i no inap pilim wanpela samting, na ol i no inap helpim o bagarapim ol man i stap laip. Saveman 9:4-6 i tok: “Ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting . . . Taim ol manmeri i dai, laik na kros na mangal bilong ol i pinis olgeta, na ol dispela manmeri i no inap mekim wanpela samting moa long graun.”
I gat gutpela samting bai painim ol man i dai pinis?
“Ol manmeri i dai pinis, ating ol i no inap kisim laip gen. . . . Bai mi wet i stap inap long taim yu makim bilong mi i stap long dispela ples, em i pinis.”—Jop 14:13, 14.
OL MAN I TOK
Planti man i bilip olsem taim man i go long helpaia, em bai kisim strafe inap oltaim, na em i no inap abrusim dispela strafe. Tasol ol man i stap long klinpaia ol inap go long heven bihain long ol i kamap klin.
BAIBEL I TOK
Pikinini Bilong God bai kirapim bek ol man i dai pinis na ol bai stap laip long graun. Baibel i tok: “No ken kirap nogut long dispela, long wanem, taim i laik kamap na olgeta man i stap long matmat ol bai harim nek bilong Pikinini na kam ausait.” (Jon 5:26, 28, 29) Sapos man i mekim ol gutpela pasin, orait em bai kisim laip oltaim. a
a Bilong kisim sampela save moa long tok Baibel i mekim long ol man i dai pinis bai kirap bek, lukim sapta 7 bilong buk Tru Tru Baibel i Tok Wanem? em ol Witnes Bilong Jehova i Wokim, na i stap tu long Web-sait www.isa4310.com/tpi.
Ating Yu Bai Laikim Tu
BEKIM BILONG OL ASKIM BILONG BAIBEL
Hel Em Wanpela Ples i Stap Tru? Baibel i Tok Hel Em Wanem Samting?
Planti manmeri i bilip olsem hel em ples we ol man nogut i kisim pen inap oltaim. Tasol tru tru Baibel i tok wanem?
