Long Los Angeles, California ol i programim klostu 4,500 trafik lait we i karamapim olsem 1,215 kilomita na ol i wok gut na bai i no gat planti trafik. Nius The New York Times i tok Los Angeles em “fes bikpela siti long graun olgeta long mekim olsem.”

Wanpela wok painimaut bilong helt ol i mekim long graun olgeta i soim olsem namel long 1990 na 2010, namba bilong ol man i pat tumas i go antap olsem 82 pesen. Planti man i save dai long pat tumas winim namba bilong ol man i nogat inap kaikai na ol i dai, tasol long planti kantri ol man i karim yet hevi bilong sot long kaikai. Saveman Majid Ezzati i tok: “Inap 20 yia i go pinis ol man i sot long kaikai, tasol long nau i gat planti kaikai, na tu, ol kaikai i no gutpela long helt bilong ol man i mekim ol i sik, dispela hevi i stap tu long ol kantri i stap rabis.”

Wanpela ripot i stori long “wanpela pisin i bin stap longtaim tru” em pisin Laysan albatros, em i bin putim planti kiau na wanpela bilong ol i bruk. Dispela mama pisin i gat hamas krismas? Long 1956 taim dispela pisin i gat 5-pela krismas, ol i pasim wanpela teg long lek bilong em na bai ol i ken bihainim ron bilong em, nau dispela pisin i winim 60 krismas pinis. Long laip olgeta bilong em, ating dispela pisin albatros i flai longwe tru inap 3 o 4 milion kilomita samting—em wankain long raun bilong ol man i go long mun na kam bek long graun inap 4-pela o 6-pela taim.

Wanpela wok painimaut i tok 75 pesen bilong ol meri long Saut Afrika i save yusim ol sop na krim samting bilong mekim kala bilong skin i go wait. Ol kain marasin olsem inap bagarapim skin bilong ol man, olsem na sampela kantri i putim tambu long yusim ol dispela marasin. Ol man inap kisim kain kain sik kensa, kidni i bagarap, sik bilong bel hevi, tingting planti, na ol liklik buk buk na kain kain mak i kamap long skin.