Yu gat wanpela pren husat i no poroman marit bilong yu na em i save pilim gut tingting bilong yu. Yutupela i save toktok long olgeta kain samting. Yu tokim yu yet olsem: ‘Mipela i gutpela pren tasol.’ Tasol ating poroman marit bilong yu i gat narapela tingting long dispela taim em i painimaut olsem yutupela i save stori longpela taim.

Dispela i makim olsem pasin pren bilong yu i abrusim mak na yu mas luksave na stopim dispela pasin. Tasol pastaim, tingim as na yu gat kain pren olsem.

Belgut na amamas. Yumi amamas taim wanpela man o meri i laikim yumi. Yumi pilim gut taim wanpela i tingim tru yumi na dispela i mekim yumi pilim olsem yumi luk nais long ai bilong ol narapela. Yu marit nau inap sampela haptaim na nau wanpela pren i gat laik long yu na ating dispela i mekim yu belgut na amamas. Tasol tingim dispela: Sapos yu kisim amamas long kain rot olsem, orait lukaut, hevi inap kamap long dispela. Taim yu prenim wanpela husat i no poroman marit bilong yu na bel na tingting bilong yu i stap wantaim em, yu wok long daunim pasin bilong pas gut wantaim poroman marit bilong yu. Taim yu mekim olsem, yu tekewe dispela pasin laikim em yu mas soim long poroman marit bilong yu tasol.

• Askim yu yet, ‘Wanem ol amamas mi kisim insait long dispela pasin pren we i stret mi kisim insait long marit bilong mi?’

Bel i no gat strong. Baibel i tok ol manmeri husat i marit bai “karim pen na hevi.” (1 Korin 7:28) Sampela taim ating yu pilim olsem poroman marit i no tingim yu, o i no mekim ol samting bilong soim olsem em i laikim yu, o ating yu bel kros yet long sampela hevi em yutupela i no bin stretim. Ating poroman marit bilong yu i no laik toktok long ol dispela samting, na dispela i mekim yu bel hevi na yu hatwok long sakim narapela man o meri taim em i soim olsem em i tingim yu tru. Sampela saveman i tok taim man na meri marit i sem long toktok long ol bikpela hevi bilong ol, dispela i soim olsem i no gat amamas insait long marit na inap opim rot bilong divos.

 • Askim yu yet, ‘I gat sampela hevi insait long marit i mekim na nau mi hatwok long sakim pasin bilong prenim wanpela husat i no poroman marit bilong mi?’

Luksave long hevi inap kamap. Baibel i tok: “Sapos yu holim paia klostu long bros bilong yu, orait ating siot bilong yu i no inap paia, a?” (Sindaun 6:27) Sapos yu marit pinis na yu kirap laikim wanpela husat i no poroman marit bilong yu, dispela inap kamapim bikpela hevi. (Jems 1:14, 15) No ken tingim tasol ol samting bai kamap long dispela. Tingim samting i kamap pinis. Taim yu laikim narapela, yu tekewe pasin em yu mas mekim long poroman marit bilong yu tasol—em long laikim na tingim tru em.

No ken giamanim yu yet. Pasin bilong prenim wanpela man o meri inap mekim na yu tingting long laip bilong yu bai olsem wanem sapos yu bin maritim em. Taim yu mekim olsem, yu skelim ol gutpela pasin bilong pren bilong yu wantaim ol popaia bilong poroman marit bilong yu—dispela samting yu mekim em i no stret! Na tu, tingim, dispela strongpela laik yu gat long man o meri yu prenim, em dispela wankain filings bipo yu bin gat long man o meri nau i stap poroman marit bilong yu.—Stiatok bilong Baibel: Jeremaia 17:9.

Putim sampela mak. Ol man i save putim ol sekiuriti alam long haus o kar bilong ol bambai ol man i no ken stilim samting. Yu ken mekim samting i wankain olsem insait long marit bilong yu. Baibel i tok: “Was gut tru long tingting bilong yu.” (Sindaun 4:23) Olsem wanem yu ken mekim olsem? Traim mekim ol dispela samting:

• Soim olsem yu marit pinis na yu laikim tru poroman marit bilong yu long rot bilong putim poto bilong em long ples wok bilong yu.—Stiatok bilong Baibel: Stat 2:24.

• Makim wanem samting yu bai mekim na wanem samting yu no inap mekim taim yu stap wantaim wanpela i no poroman marit bilong yu. Olsem, i no stret long toktok wantaim kain pren olsem long ol hevi bilong marit bilong yu o go aut na dring wantaim wanpela man o meri wanwok.

• Sapos yu wok long prenim na i gat laik long wanpela husat i no poroman marit bilong yu, stopim dispela pasin. Sapos yu hatwok long mekim olsem, askim yu yet wai na yu pilim olsem. No ken strongim sait bilong yu na pren bilong yu, sapotim poroman marit bilong yu na mekim ol samting bilong lukautim marit bilong yutupela.—Stiatok bilong Baibel: Sindaun 5:18, 19.