MI BON long 1965 long Noten Aialan long wanpela famili i stap rabis. Mi kamap bikpela long Distrik Deri long taim bilong “Troubles” em haptaim we pait i bin stap namel long ol Katolik na ol Protestan winim 30 yia. Liklik lain Katolik long dispela hap i pilim olsem bikpela lain Protestan i daunim ol na sutim tok long ol olsem ol i save brukim lain long taim bilong ileksen, kamapim ol strongpela lo tumas, raitim nem bilong ol man i no ken tru kisim wok mani, na givim haus long sampela lain tasol, na sampela, nogat.

Mi lukim olsem i no gat stretpela pasin na pasin fea long olgeta hap. Mi no inap tingim hamas taim ol polis na ol soldia i bin paitim mi, pulim mi i kam ausait long kar na makim gan long mi, o givim planti askim long mi na sekim mi. Mi pilim olsem ol i mekim nogut long mi na mi ting: ‘Mi ken orait long dispela o mi ken bekim rong!’

Mi insait long Bloody Sunday mats bilong tingim indai bilong 14-pela man em ol soldia bilong Briten i bin kilim ol i dai long 1972, na mats bilong onarim ol kalabusman em ol i straik na i dai long hangre long 1981. Mi sanapim fleg em gavman i tambuim na raitim ol tok bilong daunim  Briten long olgeta hap. Planti taim wanpela samting nogut i kamap o ol i kilim i dai wanpela Katolik na nau protes i mas kamap. Liklik lain tasol i save kirap mats na bihain dispela i save kirapim bikpela raiot.

Taim mi stap long yunivesiti, mi joinim ol sumatin long mekim ol protes bilong envairomen. Bihain mi go sindaun long London, na mi insait long mats bilong lain soselis long rausim lo bilong gavman i helpim tasol ol man i gat namba na i nogutim ol rabisman. Mi insait long straik bilong treid yunion long gavman i bin katim pe bilong ol wokman, na mi joinim protes bilong daunim teks long 1990, long dispela taim ol man bilong protes i bin bagarapim tru Trafalgar Square.

Tasol bihain mi bel hevi na givap nating. Protes i no kamapim wanpela gutpela samting, em i save strongim tasol pasin heitim.

Long dispela taim wanpela pren bilong mi i bringim mi i go bungim ol Witnes Bilong Jehova. Ol i skulim mi long ol tok bilong Baibel olsem God i tingim ol pen na hevi yumi karim na em bai pinisim tru olgeta pen na hevi ol man i kamapim. (Aisaia 65:17; Revelesen 21:3, 4) Maski ol man i tingting long helpim ol narapela, ol i no inap kamapim stretpela pasin na pasin fea. Yumi mas larim God i stiaim yumi, na tu, yumi mas kisim strong i kam long Em bilong yumi ken winim strong bilong ol spirit i as bilong ol hevi i kamap long graun.—Jeremaia 10:23; Efesus 6:12.

Nau mi pilim olsem pasin bilong protes long kamapim stretpela pasin, i olsem mi laik stretim ol sia antap long wanpela sip i wok long sink. Mi amamas tru long kisim save olsem wanpela taim bai kamap we stretpela pasin tasol bai i stap, na olgeta man bai i gat wankain sindaun.