Long olgeta taim i gat wanpela kros pait i kamap, yu na poroman marit bilong yu i save sutim olkain tok long narapela narapela. Planti taim insait long marit yutupela i save mekim ol tok i bagarapim bel bilong poroman na nau dispela i kamap olsem nomol pasin bilong toktok.

Sapos dispela i kamap insait long marit bilong yu, yu inap daunim dispela pasin. Tasol pastaim, yu mas skelim as na dispela samting i kamap na bilong wanem yu gat laik long mekim ol senis.

Bekgraun bilong famili. Planti man na meri marit i kamap bikpela insait long famili we pasin bilong mekim tok i bagarapim bel bilong narapela i save kamap olgeta taim. Wanpela poroman marit o tupela wantaim inap kamapim ol tok em ol i bin harim long papamama bilong ol.

Ol amamas i stiaim tingting. Ol film na ol piksa wokabaut long TV i mekim ol tok nogut i kamap olsem samting bilong lap tasol, na i givim tingting long ol man i lukim olsem dispela i no inap bagarapim man o em i pani tasol.

Kalsa. Sampela kalsa i skulim ol man olsem “ol man tru” i save bosim strong ol narapela o ol meri i mas i gat hatpela pasin bilong soim olsem ol i gat strong. Long taim ol i kros pait, poroman marit i gat dispela kain pasin bai tingim poroman bilong em olsem wanpela birua na i no wanpela pren na em inap mekim ol tok i bagarapim bel na i no mekim gut bel.

Maski i gat wanem as na tok bilong bagarapim bel i kamap, dispela inap kamapim pasin bilong brukim marit, na tu, dispela inap nogutim helt bilong ol. Sampela man i tok ol tok inap mekim man i bel hevi moa yet, winim pasin bilong pait. Olsem, wanpela meri em man bilong em i save toknogutim em na paitim em, em i tok: “Mi hatwok long karim hevi bilong ol tok nogut em i mekim long mi, winim pasin bilong em long paitim mi. Mi no wari tumas sapos em i paitim mi, tasol mi no laik tru long em i mekim ol tok nogut i bagarapim tru bel bilong mi.”

Yu ken mekim wanem sapos yu na poroman marit bilong yu i mekim ol tok i bagarapim bel na yupela i no pas gut wantaim?

Kamapim pasin sori. Pilim samting em poroman marit bilong yu i pilim, na traim long kliagut long poroman bilong yu i pilim olsem wanem long ol tok yu mekim long em. Sapos inap, tingim stret wanpela hevi i bin kamap na poroman marit bilong yu i bin pilim olsem tok bilong yu i bagarapim bel bilong em. No ken tingim tumas tok yu bin mekim; bikpela samting tingim poroman marit bilong yu i pilim olsem wanem long tok yu mekim. Olsem wanem? Yu inap tingim sampela rot we yu ken kamapim ol gutpela tok na bai yu no ken mekim ol dispela tok i bin bagarapim bel? Baibel i tok: “Sapos man i belhat long yu, orait bekim tok isi long em, na bai belhat bilong en i dai. Tasol sapos yu rabisim narapela man long tok bilong yu, bai yu mekim em i belhat nogut tru long yu.”—Sindaun 15:1.

Lukim gutpela pasin rispek bilong ol narapela marit. Sapos ol man i no stap gutpela piksa i bin stiaim pasin bilong yu long toktok, orait lukluk long ol man i stap olsem ol gutpela eksampel. Harim toktok bilong ol marit em pasin bilong ol long toktok i gutpela long bihainim.—Stiatok bilong Baibel: Filipai 3:17.

Tingim ol gutaim bilong yutupela long bipo. Planti taim ol tok bilong bagarapim bel i kam long tingting i stap long bel na i no long maus tasol. Olsem na wok strong long kisim stretpela tingting na filings long poroman marit bilong yu. Tingim bek ol samting yutupela i bin amamas long mekim wantaim. Lukim ol poto bilong bipo. Wanem ol samting i mekim yu lap? Wanem ol pasin i kirapim yutupela long laikim narapela narapela?—Stiatok bilong Baibel: Luk 6:45.

Kirapim tok olsem “Mi.” No ken sutim tok long poroman marit bilong yu, kamapim samting yu pilim long bel na ol samting tok bilong em i mekim long yu. Olsem, “Mi pilim olsem tingting bilong mi i no bikpela samting taim yu wokim ol disisen na yu no askim mi pastaim,” dispela kain tok inap kamapim gutpela samting winim kain tok olsem “Em pasin tru bilong yu—olgeta taim yu no save askim mi paslain long yu mekim ol disisen!”—Stiatok bilong Baibel: Kolosi 4:6.

Save long taim yu mas pasim maus. Sapos yu luksave olsem belhat bilong yu i wok long i go bikpela na yu no inap bosim ol tok bilong yu, em gutpela long makim narapela taim long toktok. Sapos kros i go bikpela, orait lusim haus na go wokabaut na bihain yupela i ken stretim hevi long pasin isi.—Stiatok bilong Baibel: Sindaun 17:14.