Inap yu stori long sindaun bilong yu?

Papa bilong mi em i wanpela mekanikal ensinia. Planti taim em i save stori long mi long matematiks na saiens. Taim mi mangi yet, mi gat intres long ol plaua na animal i stap long ol liklik wara klostu long haus bilong mipela long New Paris, Ohio, Amerika. Olsem na taim mi go long Purdue University, mi laik stadi long ekoloji—olsem wanem ol plaua, diwai, ol animal na envairomen i wok wantaim.

Yu save tingim lotu?

Yes, mi save tingim lotu. Papa i strongim mi long stadi long lotu Luteran em lotu mipela i insait long en. Mi stadi long tokples Grik, Koine, em wanpela bilong ol tokples ol i bin raitim Baibel long en long pastaim. Olsem na mi gat bikpela rispek long Baibel.

Yu gat wanem tingting long tok bilong evolusen?

Lotu bilong mi i orait long en. Na ol wanwok bilong mi i bilip long en. So mi no kwestenim dispela samting. Tasol mi bilip long God tu. Mi bin ting olsem tok bilong evolusen na pasin bilong bilip long God i wok gut wantaim. Maski mi rispek long Baibel, mi no ting em i buk bilong God.

Wanem samting i senisim tingting bilong yu long Baibel?

Tupela Witnes Bilong Jehova, Steve na Sandy, ol i kam lukim mi na meri bilong mi, Debbie. Ol i soim mipela olsem ol tok bilong Baibel i stret wantaim tok bilong saiens, maski Baibel i no wanpela buk bilong saiens. Olsem, Baibel i stori long God olsem: “Bikpela tasol i sindaun long sia king bilong en antap long skai [“antap long raunpela graun,” NW].” (Aisaia 40:22) Na Baibel i tok tu: “God i bin mekim dispela graun i hangamap nating.” (Jop 26:7) Long dispela taim, mi yusim ol poto em satelait i bin kisim bilong stadi long ekoloji, olsem na mi pilim tru ol  dispela skripsa. Ol man i bin raitim ol dispela skripsa paslain tru long wanpela i bin kisim ol poto i soim olsem graun i hangamap nating. Taim mi na meri bilong mi i stadi long Baibel wantaim Steve na Sandy, mi kisim save long ol tok profet i bin kamap tru, ol skultok i helpim man, na ol gutpela bekim long ol askim bilong mi. Isi isi mi kirap bilip olsem Baibel em i Tok Bilong God.

Wanem taim yu senisim tingting long laip i kamap olsem wanem?

Bihain, Steve i soim mi ol tok bilong Baibel olsem: “Bikpela i kisim graun na em i wokim man long en.” (Stat 2:7) Dispela fes man i gat stori bilong en ol i bin raitim. Dispela i kamapim wanpela askim: Ol tok bilong Baibel i stret wantaim tok bilong saiens o nogat? Steve i kirapim mi long mekim wok painimaut long dispela samting, na mi mekim olsem.

Yu kisim wanem save long evolusen?

Mi kisim save long planti samting. Wanpela samting, tok bilong evolusen i traim long eksplenim olsem wanem ol samting i gat laip i bin kamap. Ol samting i gat laip olsem ol animal na ol man i gat ol bikpela samting olsem lewa, waitlewa, na ai. Na tu, long rot bilong maikroskop yumi inap lukim ol samting i wok gut olsem masin insait long ol sel. Husat i wokim ol dispela samting? Ol man i bilip long evolusen i tok, ol samting i gat strong na i wok gut, ol tasol inap i stap laip. Tasol dispela tok i no bekim dispela askim: Ol i kisim we dispela strong na ol i wok gut? Mi kisim save olsem planti saientis i no bilip olsem tok bilong evolusen i bekim dispela askim. Wanpela profesa i tokim mi olsem em i no bilip long ol tok bilong evolusen. Tasol em i no tokim ol narapela long dispela samting, nogut ol i pinisim em long wok.

Save bilong yu long ekoloji i strongim bilip bilong yu?

Yes, em i strongim bilip bilong mi. Long wok mi save stadi long olsem wanem ol samting i gat laip i helpim narapela narapela. Long graun, olgeta samting i gat laip i mas kisim helpim long narapela. Tingim ol plaua na binen. Kala, smel, wara, na stail bilong lip bilong ol plaua i bilong pulim ol binen na givim paura bilong ol plaua long ol. Ol binen i save pulim wara bilong plaua na karim paura bilong wanpela plaua i go long narapela plaua. Tru tumas, God i wokim ol plaua na binen bilong helpim narapela narapela.

Ol samting i stap long graun i nidim narapela narapela. I gat planti tausen narapela narapela kain animal, plaua na diwai, baktiria, na fangi. Olgeta animal i save kisim kaikai na oksijen long ol plaua na diwai, na klostu olgeta plaua na diwai i nidim ol animal bilong stap laip. Wok bilong ol dispela samting i narakain tru na ol inap stap laip inap planti handret yia. Maski polusen i bagarapim ol, taim samting i kamapim polusen i no stap moa, ol samting long graun bai kamap gutpela gen. Taim mi tingim strong bilong ol samting i gat laip, mi bilip tru olsem God i as bilong laip.

Bilong wanem yu kamap wanpela Witnes Bilong Jehova?

Mi wari tru long pasin bilong ol manmeri long bagarapim ol samting long graun. Mi save ol samting i gat laip i gat strong, tasol ol inap bagarap na pinis. Ol Witnes Bilong Jehova i tokim mi olsem, Baibel i tok God bai “bagarapim ol man i wok long bagarapim graun.” (Revelesen 11:18) Ol dispela tok i bikpela samting long mi. Taim mi wok long stadi long Baibel, isi isi mi luksave olsem gutpela tok promis bilong Baibel bai kamap tru.

Mi amamas long tokim ol narapela man long bilip bilong mi, na mi bin stadi long Baibel wantaim sampela saientis. Taim mi gat 55 krismas, mi ritaia bilong mi ken lusim bikpela haptaim moa bilong helpim ol man long save long Krieta na ol samting em i tingting pinis long mekim long dispela gutpela graun.