Ating wanpela yu laikim tru i dai? Long taim bilong bel hevi, ating yu laik save: ‘Wanem samting i painim yumi taim yumi dai? I gat hop long lukim gen ol man yumi laikim tru?’ Long dispela lesen na neks lesen, bai yumi skelim ol gutpela bekim bilong Baibel.

1. Wanem samting i painim yumi taim yumi dai?

Jisas i tok dai i kain olsem man i slip indai. Taim man i slip indai em i no save long ol samting i kamap klostu long em. Olsem wanem dai i wankain long slip? Taim man i dai, em i no save pilim pen. Em i no pilim olsem em i stap wanpis, maski em i laikim tru famili na ol pren bilong em. Baibel i tok: “Ol man i dai pinis ol i no save long wanpela samting.”—Ritim Eklisiastis 9:5.

2. Taim yumi kisim stretpela save long dai, olsem wanem dispela i helpim yumi?

Planti manmeri i pret long dai, na tu, long ol daiman! Tasol tok Baibel i mekim long dai, dispela inap mekim isi bel bilong yu. Jisas i tok: “Tok i tru bai mekim yupela i kamap fri.” (Jon 8:32) Sampela lotu i tok taim man i dai, em i gat wanpela spirit i stap laip yet, tasol Baibel i no tok olsem. Ol man i dai pinis ol i no inap pilim pen. Na tu, ol man i dai pinis ol i no save long wanpela samting, na ol i no inap bagarapim yumi. So i no gat wok long mekim isi bel bilong ol o lotuim ol, na i no gat wok long beten long helpim ol.

Sampela man i tok ol inap toktok wantaim ol daiman. Tasol dispela i no tru. Olsem yumi lainim, ol daiman “i no save long wanpela samting.” Ol man i tok ol i toktok wantaim famili bilong ol i dai pinis, tru tru ol i toktok wantaim ol spirit nogut em ol i giaman na mekim olsem ol i dispela famili i dai. So taim yumi kisim stretpela save long dai, dispela i banisim yumi na ol spirit nogut i no inap giamanim yumi. Jehova i givim tok lukaut long yumi long no ken traim long toktok wantaim ol daiman bikos em i save pasin bilong toktok wantaim ol spirit nogut bai nogutim yumi.—Ritim Lo 18:10-12.

3. Kisim stretpela save long man i dai i stap olsem wanem

Long olgeta hap bilong graun, ol man i gat narapela narapela bilip long wanem samting i painim yumi taim yumi dai. Tasol olgeta dispela bilip i no tru.

• Long hap bilong yu ol man i gat wanem bilip long ol man i dai pinis?

 4. Yumi kisim stretpela save long dai na dispela i helpim yumi

Taim yumi kisim stretpela save long dai, dispela i mekim na yumi no pret long ol man i dai pinis. Ritim Eklisiastis 9:10, na stori long dispela askim:

• Ol man i dai pinis inap mekim nogut long yumi?

Ol tok i tru bilong Baibel i banisim tu yumi, na yumi no bilipim tok giaman olsem yumi mas mekim gut bel bilong ol man i dai pinis o lotuim ol. Ritim Aisaia 8:19 na Revelesen 4:11, na stori long dispela askim:

• Yu ting Jehova i pilim olsem wanem long man i laik lotuim o i laik kisim helpim long wanpela man i dai pinis?

5. Taim yumi kisim stretpela save long dai dispela i mekim isi bel bilong yumi

Planti lotu i skulim ol man olsem taim ol i dai ol bai kisim panismen long ol pasin nogut ol i bin mekim. Tasol yumi kisim bel isi taim yumi save olsem i no gat man i kisim panismen taim em i dai—maski man i mekim pasin nogut tru, em tu i no inap kisim panismen. Ritim Rom 6:7, na stori long dispela askim:

• Olsem yumi ritim long Baibel, dai em pe bilong sin, o taim man i dai em i lusim kalabus bilong sin, so yu ting man i dai i kisim pen long ol rong em i mekim long pastaim?

Taim yumi wok long kisim save moa long Jehova, yumi luksave olsem em i no inap givim panismen long ol daiman. Ritim Lo 32:4 na 1 Jon 4:8, na stori long ol dispela askim:

• Yu ting God husat i gat ol gutpela pasin em dispela ves i kolim i amamas long givim panismen long ol daiman?

• Stretpela save yu kisim long dai dispela i mekim isi bel bilong yu? Bilong wanem?

 OL BIKPELA POIN

Taim man i dai, laip bilong em i pinis. Ol daiman i no inap pilim pen, o mekim samting bilong bagarapim man i stap laip.

Riviu

• Wanem samting i painim yumi taim yumi dai?

• Stretpela save yumi kisim long dai, olsem wanem dispela i helpim yumi?

• Stretpela save yumi kisim long dai, olsem wanem dispela i mekim isi bel bilong yumi?