1, 2. Jehova i bin raitim wanem pas long yumi? Bilong wanem em i raitim?

 OLSEM WANEM? Yu inap tingim laspela taim yu bin kisim pas long wanpela yu laikim tru na em i stap longwe? I no gat planti samting i givim bikpela amamas long yumi olsem gutpela pas yumi kisim long wanpela man yumi laikim tru. Yumi amamas long harim stori long em i stap olsem wanem, ol samting i painim em, na ol samting em i tingting long mekim. Kain pasin olsem bilong toktok wantaim i mekim na ol famili o pren i pas gut wantaim, maski narapela i stap longwe long narapela.

² Tasol i no gat narapela samting inap givim bikpela amamas long yumi olsem pas i kam long God em yumi laikim tru. Yumi ken tok Jehova i bin raitim wanpela pas long yumi—Tok bilong em long Baibel. Insait long en Jehova i tokim yumi long em i husat, em i bin mekim wanem ol samting, na ol samting em i tingting pinis long mekim, na planti samting moa. Jehova i bin givim Tok bilong em long yumi, long wanem, em i laik bai yumi stap klostu long em. God bilong yumi i gat olgeta savetingting, em i makim nambawan gutpela rot bilong toktok wantaim yumi. Ol tok i stap long Baibel na rot bilong kamapim ol dispela tok i soim nambawan gutpela savetingting.

3. Long wanem rot Jehova i givim Lo long Moses?

³ Sampela inap tok, ‘Bilong wanem Jehova i no mekim wok long wanpela narakain rot bilong toktok wantaim ol man, olsem kamapim wanpela nek long heven?’ Sampela taim Jehova i bin mekim tok long heven long rot bilong ol ensel. Em i bin mekim olsem taim em i givim Lo long lain Israel. (Galesia 3:19) Ol Israel i kirap nogut tru long nek i kam long heven—ol i pret na askim Jehova long em i no ken toktok long ol long dispela kain rot, ol i laik bai em i toktok long rot bilong Moses. (Kisim Bek  20:18-20) Olsem na Jehova i toktok long Moses na i kamapim ol wan wan tok bilong Lo i gat 600 lo long en.

4. Stori long as na pasin bilong kamapim ol lo bilong God long rot bilong maus bilong ol man i no gutpela.

⁴ Tasol olsem wanem sapos ol i no bin raitim Lo? Yu ting Moses inap tingim olgeta wan wan tok bilong ol lo na i no popaia liklik taim em i kamapim long lain Israel? Na olsem wanem long ol lain i kamap bihain? Ol i mas bilip tasol long ol tok ol i kisim long maus bilong ol man? Ating dispela i no gutpela rot long givim ol lo bilong God long ol man. Tingim wanem samting bai kamap sapos yu mas kamapim wanpela stori long planti manmeri i sanap long wanpela lain. Pastaim yu tokim man i stap long kirap bilong lain, na em i tokim narapela, na dispela man i tokim narapela, na i go i go olsem. Ating stori laspela man i harim i narapela kain long stori yu bin kamapim. Dispela hevi i no inap kamap long ol tok bilong Lo Bilong God.

5, 6. Jehova i tokim Moses long mekim wanem long ol tok bilong Em? Bilong wanem em i gutpela samting long Tok Bilong Jehova i stap long wanpela buk yumi ken ritim?

⁵ Jehova i gat savetingting, olsem na em i kirapim ol man long raitim ol tok bilong em. Em i tokim Moses olsem: “Raitim ol dispela tok, long wanem, long rot bilong ol dispela tok mi wokim kontrak wantaim yu na ol Israel.” (Kisim Bek 34:27) Dispela em i kirap bilong wok bilong raitim Baibel, long 1513 B.C.E. Insait long 1,610 yia i kamap bihain, “planti taim na long kain kain rot [Jehova] i bin givim tok” bilong em long 40 man em ol i bin raitim Baibel. (Hibru 1:1) Insait long dispela haptaim, ol gutpela sekreteri i givim bel long raitim gen na raitim stret ol tok bilong Baibel, ol i mekim olsem na bai tok bilong Baibel i ken stap longpela taim tru.​—Esra 7:6; Buk Song 45:1.

⁶ Jehova i mekim gut tru long yumi na toktok wantaim yumi long rot bilong ol tok yumi ken ritim. Olsem wanem? Yu bin kisim wanpela pas i bikpela samting tru long yu—ating pas i bin mekim gut bel bilong yu—na yu lukautim gut na ritim planti taim? Pas Jehova i salim long yumi i kain pas olsem. Jehova i  stretim rot na bai ol tok bilong em i stap long wanpela buk em yumi inap ritim oltaim na skelim long bel. (Buk Song 1:2) Yumi inap kisim sampela tok bilong “mekim isi bel bilong yumi long rot bilong Rait Holi” long ol taim we yumi nidim.​—Rom 15:4.

7. Jehova i makim ol man long raitim Baibel, olsem wanem dispela i kamapim savetingting bilong em?

⁷ Jehova i bihainim savetingting na i makim ol man long raitim Tok bilong em. Tingim: Sapos Jehova i bin makim ol ensel long raitim Baibel, yu ting bai yumi amamas long ritim? Tru, ol ensel i stap long ples antap, olsem na ol inap kamapim tingting bilong ol yet long Jehova i wanem kain, na tokaut long pasin bilong ol long givim bel long em, na stori long ol wokman bilong God i stap gut long em. Tasol yu ting yumi inap pilim tru tingting bilong ol ensel, em ol i gutpela olgeta, na save na strong bilong ol i winim tru save na strong bilong yumi?​—Hibru 2:6, 7.

8. Olsem wanem ol man inap yusim save bilong ol yet na raitim Baibel? (Lukim tu futnot.)

⁸ Long rot bilong ol man i raitim Baibel, Jehova i givim yumi ol samting yumi mas kisim—em ol tok ‘God i as’ bilong en, tasol em ol tok yumi inap pilim tru. (2 Timoti 3:16) Olsem wanem em i mekim dispela? Planti taim em i larim ol man i raitim Baibel long ol i ken yusim save bilong ol yet long makim “ol gutpela tok” na raitim “stret ol tok i tru.” (Eklisiastis 12:10, 11) Long dispela as ol tok bilong Baibel i gat kain kain stail; ol tok i kamapim sindaun na pasin bilong man i raitim tok. a Tasol “holi spirit i kirapim ol long autim ol tok God yet i bin givim long ol.” (2 Pita 1:21) Olsem na tok ol i raitim, tru tru em i “tok bilong God.”​—1 Tesalonaika 2:13.

9, 10. Ol man i bin raitim Baibel, bilong wanem dispela i mekim na ol man i laikim na pilim tru ol tok bilong en?

⁹ Ol man bilong graun i bin raitim Baibel na dispela i mekim  na ol man i laikim na pilim tru ol tok bilong en. Ol dispela man i wankain olsem yumi. Ol i no gutpela olgeta, olsem na ol traim na hevi i painim ol i wankain olsem i save painim yumi. Sampela taim spirit bilong Jehova i kirapim ol long raitim ol tok i kamapim bel bilong ol na ol hevi ol i karim. (2 Korin 12:7-10) Olsem na ol tok ol i raitim i olsem ol yet i toktok, em ol tok ol ensel i no inap kamapim.

¹⁰ Tingim King Devit bilong Israel. Bihain long em i bin mekim sampela bikpela rong, Devit i raitim song i kamapim tru bel bilong em, na i askim God long lusim tingting long ol rong bilong em. Em i tok: “Rausim sin bilong mi na mekim mi i kamap klin. Mi save mi mekim rong pinis, na mi no inap lusim tingting long sin bilong mi. Taim mama i karim mi, mi bon wantaim sin, na taim mi stap yet long bel bilong mama, mi man bilong mekim sin. No ken rausim mi i go longwe long yu; na yu no ken rausim holi spirit bilong yu long mi. Man em bel bilong em i hevi tru long sin bilong em, dispela i olsem sakrifais em i mekim long God na God i amamas long dispela; O God, yu no save givim baksait long man em bel bilong em i bagarap na em i pilim nogut tru.” (Buk Song 51:2, 3, 5, 11, 17) Yu inap pilim bel hevi bilong man i raitim dispela tok? Man i gat sin em tasol inap kamapim kain tingting olsem i stap long bel bilong em.

11. Wanem kain ol trupela stori i stap long Baibel “bilong skulim yumi”?

¹¹ I gat narapela samting tu i mekim na ol man i laikim tok bilong Baibel. Baibel em i buk i stori long ol manmeri—ol manmeri i bin stap tru—ol man i bin mekim wok bilong God na ol man i no bin mekim. Yumi ritim stori bilong ol samting i bin painim ol, hevi bilong ol, na amamas ol i kisim. Yumi lukim ol rot ol i makim bilong bihainim na ol samting dispela i kamapim. Ol dispela stori i stap “bilong skulim yumi.” (Rom 15:4) Long rot bilong ol dispela trupela stori, Jehova i skulim yumi long pasin em yumi inap pilim tru long bel. Tingim sampela stori olsem.

12. Ol stori bilong Baibel long ol man i no bin stap gut long narapela i helpim yumi olsem wanem?

 ¹² Baibel i stori long ol samting i painim ol man nogut na ol man i no bin stap gut long God. Long ol dispela stori, yumi inap lukim ol samting pasin nogut bilong ol man i kamapim, na dispela i helpim yumi long luksave gut long pasin i no stret. Olsem: Judas i no stap gut long Jisas, olsem na em i putim Jisas long han bilong ol birua. Dispela i skulim yumi gut olsem yumi no ken bihainim pasin bilong i no stap gut long narapela. (Matyu 26:14-16, 46-50; 27:3-10) Ol stori olsem i go insait tru long bel na tingting bilong yumi, na dispela i helpim yumi long luksave long ol pasin nogut na sakim ol.

13. Olsem wanem Baibel i helpim yumi long save gut long ol gutpela pasin?

¹³ Baibel i stori tu long planti wokman bilong God i bin stap gut long em. Yumi ritim stori long pasin bilong ol long givim bel tru na stap gut long God. Yumi lukim ol man i stap olsem gutpela piksa long ol pasin yumi mas kamapim na bai yumi ken go klostu long God. Tingim pasin bilong bilip. Baibel i kamapim klia bilip em wanem samting na i tokim yumi olsem bilip i bikpela samting sapos yumi laik bai God i amamas long yumi. (Hibru 11:1, 6) Na tu, Baibel i gat ol stori long ol samting bilip i kirapim man long mekim. Tingim bilip Abraham i kamapim taim em i redi long kilim i dai Aisak olsem ofa. (Stat, sapta 22; Hibru 11:17-19) Ol dispela kain stori i mekim na dispela tok “bilip” i gat bikpela insait moa bilong en na i no hatwok long save gut long mining bilong en. Jehova i bihainim savetingting na em i kirapim yumi long kisim ol gutpela pasin, na tu, em i kamapim stori bilong ol man i bihainim ol dispela pasin!

14, 15. Baibel i tok wanem long wanpela meri i kam long tempel? Dispela stori i skulim yumi long wanem samting bilong Jehova?

¹⁴ Ol stori bilong Baibel long ol samting tru tru i bin kamap i skulim yumi long sampela pasin bilong Jehova. Tingim stori bilong wanpela meri em Jisas i lukim long tempel. Jisas i sindaun klostu long boks mani, na em i lukluk long ol manmeri i putim mani insait long boks. Planti maniman i kam na “putim ekstra mani bilong ol.” Tasol Jisas i lukluk long wanpela wido meri.  Em i givim “tupela liklik koin i gat liklik pe tru.” b Em laspela mani em i holim. Jisas i save kamapim wankain tingting stret olsem bilong Jehova, em i tok: “Mani dispela wido meri i stap rabis i putim, em i winim mani olgeta arapela i putim long boks mani.” Ol dispela tok i kamapim olsem dispela wido meri i putim bikpela mani moa long boks, winim mani olgeta narapela i putim wantaim.​—Mak 12:41-44; Luk 21:1-4; Jon 8:28.

¹⁵ Tingim dispela: Planti man i kam long tempel long dispela de, tasol Baibel i stori long dispela wido meri tasol. Long rot bilong dispela stori Jehova i skulim yumi olsem em i God i save pilim tru ol samting man i givim em. Taim yumi givim ol samting yumi inap tru long givim, maski em i no wankain olsem ol narapela i givim, Jehova i amamas long kisim. Em nau, Jehova i painim nambawan gutpela rot bilong skulim yumi long dispela gutpela tok i tru, a?

16, 17. Jehova i no kamapim olgeta samting long Tok bilong em, olsem wanem dispela i kamapim savetingting bilong em?

¹⁶ Taim yu raitim pas i go long man yu laikim em tru, yu no inap stori long olgeta samting. Olsem na yu skelim gut ol samting yu laik raitim. Na olsem tasol, long Baibel Jehova i kamapim stori bilong sampela man tasol na long sampela samting i bin kamap. Tasol Baibel i no kamapim ol liklik liklik samting bilong olgeta dispela stori. (Jon 21:25) Olsem: Taim Baibel i stori long kot bilong God, ating ol tok Baibel i mekim long dispela i no bekim olgeta askim bilong yumi. Yumi inap lukim olsem Jehova i bihainim savetingting taim em i no kamapim olgeta samting long Baibel. Olsem wanem yumi inap save long dispela?

¹⁷ Ol tok i stap long Baibel i save kamapim ples klia samting i stap long bel bilong yumi. Hibru 4:12 i tok: “Tok bilong God i gat laip na i wok strong i stap na em i sap moa, winim bainat i  gat tupela sap. Em i go insait tru long man na i kamapim ples klia insait bilong man na ausait bilong man . . . Em inap kamapim klia tingting na laik i stap long bel bilong man.” Tok bilong Baibel i go insait tru long bel na kamapim klia tingting tru bilong yumi na as tru bilong ol samting yumi mekim. Ol man i ritim Baibel bilong painim sampela popaia, planti taim ol i kisim tingting kranki long ol stori i no tokim ol long olgeta samting ol i laik save long en. Ol kain man olsem i ting Jehova i no gat pasin laikim, savetingting, na stretpela pasin.

18, 19. (a) Bilong wanem yumi no ken tingting planti sapos wanpela stori bilong Baibel i kamapim ol askim em yumi no inap painim hariap bekim bilong en? (b) Yumi mas i gat wanem samting bilong save gut long Tok Bilong God? Olsem wanem dispela i kamapim bikpela savetingting bilong Jehova?

¹⁸ Tasol taim yumi stadi long Baibel wantaim gutpela bel, bai yumi kisim save long Jehova olsem Baibel i stori long em. Olsem na yumi no tingting planti sapos wanpela stori i kamapim sampela askim em yumi no inap painim hariap bekim bilong ol. Taim yumi stadi long Baibel, isi isi yumi kisim save long Jehova i wanem kain God. Maski sapos pastaim yumi no kliagut long wanpela stori o save long olsem wanem dispela stori i stret wantaim pasin bilong God, pasin bilong yumi long stadi long Baibel i lainim yumi pinis long planti samting bilong Jehova na yumi inap save olsem em i God bilong pasin laikim, pasin i fea, na stretpela pasin.

¹⁹ Olsem na bilong save gut long Tok Bilong God, bel na tingting bilong yumi i mas gutpela taim yumi ritim na stadi long en. Dispela i kamapim bikpela savetingting bilong Jehova, a? Ol man tingting bilong ol i sap, ol inap raitim ol buk em “ol man i gat savetingting na ol klevaman” tasol inap kisimgut tok bilong en. Tasol bilong kamapim wanpela buk em ol man i gat gutpela bel tasol inap kisimgut tok bilong en—savetingting bilong God tasol inap kamapim kain buk olsem!​—Matyu 11:25.

20. Bilong wanem Jehova wanpela tasol inap tokim yumi long nambawan gutpela rot long bihainim? Wanem ol tok i stap long Baibel em inap helpim yumi?

²⁰ Long Baibel, Jehova i tokim yumi long nambawan gutpela  rot long bihainim. Em i Man Bilong Wokim yumi, olsem na em i save long ol samting yumi mas kisim, winim yumi yet. Na ol samting ol man i mas kisim i no senis. Olsem: Ol i laik bai narapela i laikim ol, ol i laik stap amamas, na stap gut wantaim ol narapela. Baibel i gat planti tok i kamapim “ol savetingting” bilong helpim yumi long stap amamas na stap gut. (Provep 2:7) Olgeta wan wan seksen bilong dispela stadi buk i gat wanpela sapta i soim olsem wanem yumi ken bihainim savetingting i stap long Baibel, tasol nau yumi ken skelim wanpela tok olsem.

21-23. Wanem gutpela tok inap helpim yumi long lusim pasin bilong kros na bel nogut long narapela?

²¹ Olsem wanem? Sampela taim yu bin lukim olsem ol man husat i save bel nogut long narapela, planti taim dispela i bagarapim ol yet? Pasin bilong bel nogut long narapela i wanpela bikpela hevi long karim. Taim yumi bel nogut i stap, yumi tingting long dispela samting tasol, yumi no stap bel isi, na yumi no amamas. Ol saientis i kisim save olsem pasin bilong kros inap mekim na yumi kisim sik bilong klok na planti narapela bikpela sik. Paslain tru long ol saientis i skelim dispela samting, Baibel i mekim dispela gutpela tok: “Yu no ken belhat, na yu mas lusim pasin bilong belhat nogut tru.” (Buk Song 37:8) Tasol olsem wanem yumi inap mekim olsem?

²² Tok Bilong God i kamapim dispela gutpela tok: “Gutpela tingting bilong man i save pasim em long belhat kwik, na taim em i no tingim rong narapela i mekim long em, em i mekim gutpela pasin tru.” (Provep 19:11) Gutpela tingting i makim olsem man inap skelim gut as bilong ol samting, em ol samting i no stap long ples klia. Gutpela tingting i kamapim pasin bilong pilim tingting bilong narapela, long wanem, em i ken helpim yumi long save long i gat wanem as na narapela i mekim wanpela kain tok o pasin. Taim yumi wok strong long save long tingting tru bilong man, na tingting i stap long bel bilong em, na sindaun bilong em, dispela inap helpim yumi long rausim ol tingting olsem em i no gutpela man.

²³ Baibel i gat dispela gutpela tok: “Wok yet long karim hevi narapela i putim long yupela na amamas long fogivim narapela.”  (Kolosi 3:13) Dispela tok “wok yet long karim hevi narapela i putim long yupela” i makim olsem yumi mas isi long ol narapela na no ken les long ol, maski ol i gat sampela pasin i save sikirapim bel bilong yumi. Kain pasin olsem i helpim yumi na yumi no bel nogut long narapela long ol liklik samting. Dispela tok “fogivim narapela” i makim olsem yumi lusim pasin bilong bel nogut long narapela. God bilong yumi i gat savetingting na em i save olsem yumi mas fogivim ol narapela taim i gat as bilong mekim olsem. Dispela i helpim ol, na tu, tingting na bel bilong yumi yet bai stap isi. (Luk 17:3, 4) Tru tumas, Baibel i gat savetingting long en!

24. Wanem samting i kamap taim yumi bihainim savetingting bilong God?

²⁴ Jehova i gat bikpela pasin laikim, olsem na em i gat laik long toktok wantaim yumi. Em i makim nambawan gutpela rot bilong mekim olsem—wanpela pas em holi spirit i stiaim ol man long raitim. Olsem na savetingting bilong Jehova i stap long dispela buk. Na yumi “inap trastim tru” savetingting bilong em. (Buk Song 93:5) Taim yumi bihainim na lainim ol narapela long en, dispela i pulim yumi i go klostu long God i gat olgeta savetingting. Long neks sapta bai yumi toktok long narapela samting i kamapim savetingting bilong Jehova: em save bilong em long tokaut long ol samting bai kamap bihain na kamapim ol samting em i tingting pinis long mekim.