HAP 9
Famili i Lotuim Jehova
“Lotuim dispela man husat i wokim skai na graun.”—Revelesen 14:7
Olsem yupela i lainim pinis long dispela buklet, Baibel i gat planti stiatok we inap helpim yupela na famili bilong yupela. Jehova i laik bai yupela i stap amamas. Em i tok promis olsem sapos pasin bilong lotuim em i stap namba 1 samting long laip bilong yupela, “em bai givim olgeta dispela samting long yupela.” (Matyu 6:33) Em i laik tru bai yupela i stap pren bilong em. Mekim olgeta samting bilong pas gut wantaim God. Dispela em nambawan gutpela blesing.—Matyu 22:37, 38.
1 STRONGIM PASIN BILONG PAS GUT WANTAIM JEHOVA
BAIBEL I TOK: “Jehova, God i Gat Olgeta Strong, em i tok: ‘Na mi bai i stap papa bilong yupela, na yupela bai i stap pikinini man na pikinini meri bilong mi.’” (2 Korin 6:18) God i laik bai yupela i kamap pren bilong em na pas gut wantaim em. Beten bai helpim yupela. Jehova i kirapim yupela long “beten oltaim.” (1 Tesalonaika 5:17) Em i laik tru long save long tingting na wari i stap long bel bilong yupela. (Filipai 4:6) Taim yupela i beten wantaim famili, ol bai luksave olsem yupela i tingim God olsem Man i stap tru.
Yupela i mas putim yau tu long God. Yupela inap mekim olsem taim yupela i stadi long Baibel na ol litresa em Baibel i as bilong en. (Song 1:1, 2) Tingim tingim ol save yupela i kisim. (Song 77:11, 12) Na tu, oltaim yupela i mas stap long ol miting Kristen.—Song 122:1-4.
Taim yupela i stori long ol narapela long Jehova, dispela tu bai strongim tru pasin bilong pas gut wantaim em. Taim yupela i mekim olsem planti taim, yupela bai i go klostu moa long em.—Matyu 28:19, 20.
SAMTING YU KEN MEKIM:
-
Makim taim bilong ritim Baibel na beten long olgeta de
-
Famili i mas putim wok bilong God i stap namba 1, na ol amamas samting i mas i stap namba 2
2 AMAMAS LONG FAMILI LOTU
BAIBEL I TOK: “Yupela i mas i go klostu long God, na em bai kam klostu long yupela.” (Jems 4:8) Yupela i nidim sediul na bai oltaim yupela inap bihainim gut program bilong famili lotu. (Stat 18:19) Tasol yupela i mas mekim sampela samting moa. Tingim God long ol samting yupela i mekim long olgeta wan wan de. Strongim famili long pas gut wantaim God. Yupela i mas stori long ol pasin bilong em “taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” (Lo 6:6, 7) Putim mak long kamap wankain olsem Josua, em i tok: “Mi wantaim famili bilong mi, mipela bai i lotu long Bikpela tasol.”—Josua 24:15.
SAMTING YU KEN MEKIM:
-
Wok oltaim long trenim ol wanfamili long kisim ol gutpela pasin ol i sot long en
