1, 2. (a) Jona i mekim wanem na hevi inap painim em na ol boskru bilong sip? (b) Hau stori bilong Jona inap helpim yumi?

 JONA i no laik harim ol dispela bikpela nois. Strongpela win i meknaisim ol sel na rigin bilong sip na ol i pairap strong; na ol traipela weiv i bruk na paitim sait bilong sip na mekim olgeta plang bilong sip i pairap. Na tu, nois i nogut moa long yau bilong Jona em singaut bilong kepten na ol boskru, taim ol i wok strong long stiaim sip na bai i no ken sink. Jona i save olsem ol dispela man bai i dai, na em asua bilong em!

² Wanem samting i mekim na Jona i bungim dispela bikpela hevi? Em i bin mekim wanpela bikpela popaia long sakim tok bilong God bilong em, Jehova. Em i bin mekim wanem? Em inap stretim dispela bikpela popaia? Bekim bilong ol dispela askim inap skulim yumi long planti samting. Olsem: Stori bilong Jona i helpim yumi long save, maski ol man i gat strongpela bilip ol tu inap popaia—na ol inap stretim pasin bilong ol.

3-5. (a) Ol man i save tingim wanem samting taim ol i tingim Jona? (b) Wanem bekgraun bilong Jona? (Lukim tu futnot.) (c) Wai na wok bilong Jona olsem profet i hatwok?

³ Taim ol man i tingim Jona, planti taim ol i save tingim ol pasin kranki bilong em, olsem bikhet long God na het bilong em i strong. Tasol i gat planti samting moa long Jona em yumi mas save long en. Tingim, Jehova God i bin makim Jona long mekim wok olsem profet bilong em. Jehova i no inap makim em long mekim kain bikpela wok sapos em i no bin stap gut long God o bihainim stretpela pasin.

⁴ Baibel i no stori planti long bekgraun bilong Jona. (Ritim 2 King 14:25.) Jona i bilong Gat-hefer, olsem 4 kilomita longwe long Nasaret, em taun we Jisas Krais bai go bikpela long en, inap 800 yia samting bihain. a Jona i mekim wok profet long taim King Jeroboam  Namba 2 i bosim 10-pela traib kingdom bilong Israel. Elaija i stap paslain tru long dispela taim; senis bilong em, Elisa, i bin i dai long taim papa bilong Jeroboam i stap king. Jehova i yusim Elaija na Elisa long rausim lotu bilong Bal long Israel, tasol ol Israel i bikhet na lusim gen rot. Nau Israel i stap aninit long king husat i “wok yet long mekim ol pasin nogut long ai bilong Jehova.” (2 Kin. 14:24) Olsem na wok bilong Jona i gat hatwok long en. Tasol em i stap gut long dispela wok.

⁵ Tasol wanpela taim, bikpela senis i kamap long laip bilong Jona. Em i kisim wanpela asainmen long Jehova na em i pilim hatwok tru long mekim. Jehova i tokim em long mekim wanem?

6. Jehova i givim wanem asainmen long Jona? Wai na dispela asainmen i gat hatwok?

⁶ Jehova i tokim Jona: “Yu kirap, na go long dispela bikpela taun Ninive, na tokaut long kot bai painim ol, long wanem, mi lukim pinis pasin nogut ol i mekim.” (Jna. 1:2) I no hatwok long save long as na Jona i tingting planti long mekim dispela asainmen. Ninive i stap longwe olsem 800 kilomita long hap is, na em i mas wokabaut long lek inap wanpela mun samting bilong kamap long en. Tasol ating Jona i no tingting tumas long hatwok bilong wokabaut long dispela longwe rot. Long Ninive, em i mas autim tok long kot bilong Jehova long bagarap bai painim ol Asiria, em ol i save mekim ol pasin nogut tru long bagarapim ol man. Sapos lain bilong God yet i no harim tok Jona i autim, hau bai ol dispela haiden man i harim tok bilong em? Olsem wanem wanpela wokman tasol bilong Jehova inap mekim wok long dispela bikpela taun Ninive, bihain ol kolim “taun we blut bilong planti man i bin kapsait”?​—Nah. 3:1, 7.

7, 8. (a) Jona i tingting strong long ranawe long asainmen Jehova i givim long em so em i mekim wanem? (b) Wai na yumi no ken skelim Jona olsem em i man bilong pret?

⁷ Ating Jona i bin kisim ol dispela kain tingting. Yumi no save. Tasol yumi save olsem em i bin ranawe. Jehova i bin tokim em long go long hap is; tasol Jona i laik ranawe i go longwe long hap wes. Em i go kamap long taun Jopa i stap long nambis, na em i kalap long wanpela sip i laik i go long Tarsis. Sampela saveman i tok Tarsis i stap long Spen. Sapos olsem, orait Jona i laik i go long hap i stap longwe long Ninive inap olsem 3,500 kilomita. Bilong mekim dispela kain raun i go longwe tru long narapela sait bilong Bikpela Solwara, ating sip bai raun inap wanpela yia olgeta! Jona i tingting strong long ranawe long dispela asainmen Jehova i bin givim long em!​—Ritim Jona 1:3.

⁸ So yu ting yumi ken tok Jona em man bilong pret? Yumi no ken hariap long skelim em. Bai yumi kisim save long ol narapela samting em i bin mekim i soim olsem em i gat strongpela bel. Wankain olsem yumi, Jona em wanpela sinman na em i gat planti pasin kranki  we em i hatwok tru long daunim. (Sng. 51:5) Yumi olgeta i save pret na yumi hatwok long daunim, laka?

9. Sampela taim yumi inap pilim olsem wanem long asainmen Jehova i givim long yumi? Yumi mas tingim wanem tok i tru long kain taim olsem?

⁹ Sampela taim i luk olsem God i tokim yumi long mekim wanpela samting yumi ting i hatwok long mekim, o yumi no inap tru long mekim. Ating yumi pret liklik long autim gutnius bilong Kingdom Bilong God, em wok ol Kristen i mas mekim. (Mat. 24:14) Em isi tru long yumi inap lusim tingting long wanpela tok i tru Jisas i bin mekim: “God inap mekim olgeta samting.” (Mak 10:27) Sapos sampela taim yumi lusim tingting long dispela tok i tru, ating yumi inap pilim hatwok bilong Jona. Tasol taim Jona i ranawe, wanem ol hevi i painim em?

10, 11. (a) Ating Jona i hop long wanem samting taim kago sip i lusim wof? (b) Wanem hevi i painim sip na ol boskru?

¹⁰ Yumi ken piksaim long tingting Jona i sindaun long sip, ating em kago sip bilong ol Fonisia. Em i lukluk i stap taim kepten na ol boskru i hariap hariap long mekim ol samting bambai ol i ken lusim wof na seil i go. Isi isi ol i no moa lukim nambis, na ating Jona i hop olsem em i abrusim pinis dispela taim nogut em i bin tingting planti long en. Tasol wantu weda i senis.

¹¹ Strongpela win i kirapim solwara na i raf nogut tru, na ating ol weiv i go antap tru winim ol sip bilong nau. I no longtaim na dispela sip ol i wokim long plang i luk liklik tru na i no gat strong, em i lus namel long ol traipela weiv i go antap tru na i go daunbilo gen. Yu ting long dispela taim Jona i save pinis long samting bihain em i raitim—olsem “Jehova i mekim strongpela win i kamap long solwara”? Yumi no save. Tasol em i lukim ol boskru i singaut long ol god bilong ol, na em i save olsem ol dispela god i no inap helpim ol. (Wkp. 19:4) Stori em i raitim i tok: “Klostu bagarap i laik painim sip.” (Jna. 1:4) Hau bai Jona inap beten long dispela God em i bin ranawe long en?

12. (a) Wai na yumi no ken skelim kwik Jona bikos em i slip taim strongpela win i sakim sip? (Lukim tu futnot.) (b) Olsem wanem Jehova i kamapim klia as bilong hevi?

¹² Jona i pilim olsem em i no inap mekim wanpela samting, olsem na em i go daun aninit long dek bilong sip na painim ples bilong slip, na em i slip indai olgeta. b Kepten i painim Jona na i kirapim  em na tokim em long beten long god bilong em, olsem ol narapela i mekim. Ol boskru i pilim olsem strong bilong wanpela god i mekim na dispela strongpela win i kirap, olsem na ol i pilai satu bilong lukim olsem husat namel long ol i gat asua na dispela hevi i kamap. Ating lewa bilong Jona i sut taim em i lukim olsem isi isi ol i wok long rausim nem bilong wan wan man. I no longtaim na ol i luksave long as bilong hevi. Jehova i stiaim dispela strongpela win, na tu, ol satu, na i makim stret wanpela man—Jona!​—Ritim Jona 1:5-7.

13. (a) Jona i tokaut long wanem samting long ol boskru? (b) Jona i tokim ol boskru long mekim wanem, na bilong wanem?

¹³ Jona i tokim ol boskru long olgeta samting. Em i wokman bilong God i gat olgeta strong, Jehova. Em dispela God em Jona i ranawe long en na i mekim em i bel hevi, olsem na nau dispela bikpela bagarap i laik painim ol. Ol man i kirap nogut; Jona inap lukim olsem ol i pret nogut tru. Ol i askim em long samting ol i mas mekim na bai ol i seivim ol yet wantaim sip. Orait Jona i tok wanem? Ating em i guria stret taim em i tingting long em bai draun long solwara i kol, na i raf nogut tru. Tasol olsem wanem em bai larim ol dispela man i dai taim em i save pinis long samting em inap mekim bilong seivim ol? Olsem na em i tok: “Apim mi na tromoi mi i go daun long solwara, na solwara bai stap isi; long wanem, mi save olsem mi yet mi as na dispela strongpela win na ren i kamap long yupela.”​—Jna. 1:12.

14, 15. (a) Olsem wanem yumi inap bihainim bilip bilong Jona? (b) Ol boskru i mekim wanem taim Jona i askim ol long tromoi em long solwara?

¹⁴ Sapos em i man bilong pret em inap tok olsem? Ating bel bilong Jehova i amamas tru taim em i lukim Jona i strongim bel, na redi long i dai bilong helpim ol arapela long dispela taim nogut. Nau yumi lukim strongpela bilip bilong Jona. Yumi inap bihainim pasin bilong em taim yumi putim wok bilong helpim ol narapela man i go pas long laik bilong yumi yet. (Jon 13:34, 35) Taim yumi lukim wanpela man i nidim helpim long ol samting bilong skin, taim tingting na bel i bagarap, o long strongim pasin bilong em long pas gut yet wantaim God, yumi save daunim laik bilong yumi yet bambai yumi inap helpim em? Jehova i amamas taim yumi mekim olsem!

¹⁵ Ating ol boskru i pilim tok bilong Jona, long wanem, pastaim ol i no laik bihainim tok bilong em, na ol i wok strong long stiaim sip i go namel long strongpela win—tasol hatwok bilong ol i lus nating. Strongpela win i go nogut tru. Nau ol i lukim olsem ol i no gat narapela rot. Ol i singaut long God bilong Jona, em Jehova, long marimari long ol, na ol i apim Jona na tromoi em i go daun long solwara.​—Jna. 1:13-15.

16, 17. Stori long samting i kamap long Jona taim ol i tromoi em i go aut long sip. (Lukim tu ol piksa.)

¹⁶ Jona i pundaun i go insait long ol weiv i raf moa. Ating Jona i taitim bun long swim na bai em i no ken draun, na em i lukim sip i brukim solwara na muv kwiktaim i go longwe. Tasol bikpela weiv i bruk i kam antap long em na subim em i go insait long solwara. Em i wok long sink i go daun moa, na em i pilim olsem i no gat rot moa long abrusim bagarap.

¹⁷ Bihain Jona i stori long samting em i pilim long dispela taim. Insait long dispela sotpela haptaim, em i tingim planti samting long laip bilong em. Em i bel hevi olsem em i no inap lukim moa dispela naispela tempel bilong Jehova long Jerusalem. Em i pilim olsem em i wok long go daun insait tru long solwara, long as bilong ol maunten, na gras bilong solwara i raunim het bilong em. I luk olsem dispela ples bai kamap matmat bilong em.​—Ritim Jona 2:2-6.

18, 19. Wanem samting i kamap long Jona taim em i stap insait tru long solwara? Wanem kain pis i daunim em? Husat i mekim ol dispela samting i kamap? (Lukim tu futnot.)

¹⁸ Tasol lukim! Wanpela samting i wok long muv i kam klostu —em i traipela tru, blakpela, na i gat laip. Em i kam klostu, na wantu i sut i kam long Jona. Wanpela traipela maus i op, na i daunim em!

¹⁹ Ating Jona i ting, nau em bai i dai. Tasol em i kirap nogut! Em i stap laip yet! Ol bun bilong em i no brukbruk, na bodi bilong em i no meme, na em i pulim win yet. Em i stap laip yet, maski em i stap long hap we i stret long kamap matmat bilong em. Isi isi tingting bilong Jona i kamap klia. Yumi save, God bilong em, Jehova, i “salim wanpela traipela pis i kam na dispela pis i daunim Jona.” c—Jna. 1:17.

20. Yumi inap kisim wanem skul long Jona long beten em i mekim insait long bel bilong traipela pis?

²⁰ Sampela minit i lus, na bihain sampela aua i lus. Long dispela ples i tudak nogut tru em Jona i no bin save long en, tingting bilong em i stap isi na em i beten long Jehova God. Yumi inap kisim planti skul long beten bilong Jona, olsem i stap long sapta 2 bilong Buk Jona. Dispela beten i kamapim klia olsem Jona i gat bikpela save long ol Skripsa bikos planti taim em i kolim ol tok bilong Buk Song. Na beten bilong Jona i soim tu gutpela pasin bilong em: tok tenkyu. Jona i pinisim beten olsem: “Tasol mi yet, bai mi tok tenkyu long yu na bai mi mekim sakrifais long yu. Samting mi bin tok promis long en, bai mi mekim. Yu wanpela tasol i save kisim bek ol man, O Jehova.”​—Jna. 2:9.

21. Jona i kisim wanem skul long pasin bilong God long kisim bek man? Yumi mas tingim wanem gutpela skul?

²¹ Long dispela narakain ples—“insait long bel bilong pis”—Jona i kisim save olsem Jehova inap kisim bek ol man maski ol i stap we o long wanem taim. Long dispela ples tu, Jehova i painim na seivim wokman bilong em husat i karim hevi. (Jna. 1:17) Jehova wanpela tasol inap helpim man long stap laip inap 3-pela san na 3-pela nait insait long bel bilong traipela pis. Long nau, i gutpela long tingim olsem Jehova em “dispela God i gat strong long bosim laip bilong yu.” (Dan. 5:23) God yet i as bilong laip bilong yumi na yumi stap laip. Yumi save  tenkyu long em? Yumi gat dinau long Jehova, so yu ting yumi mas bihainim ol tok bilong em?

22, 23. (a) Olsem wanem traim i kamap long pasin bilong Jona long tok tenkyu? (b) Taim yumi mekim ol popaia, yumi inap kisim wanem skul long pasin bilong Jona?

²² Olsem wanem long Jona? Yu ting em i lain long soim tenkyu bilong em long Jehova long rot bilong bihainim tok? Yes, em i bin mekim olsem. Bihain long 3-pela san na 3-pela nait, pis i kisim Jona i go stret long nambis na “trautim Jona long nambis.” (Jna. 2:10) Tingim—Jona i no gat wok long swim i go long nambis! Tasol em i mas painim rot long lusim dispela nambis, na go long hap em i laik go. I no longtaim, na traim i kamap long pasin bilong em long tok tenkyu. Jona 3:1, 2 i tok: “Tok bilong Jehova i kam long Jona long namba 2 taim, olsem: ‘Yu kirap, na go long dispela bikpela taun Ninive, na autim dispela tok mi bin tokim yu long en.’” Jona bai mekim wanem?

²³ Jona i no wet. Baibel i tok: “Orait Jona i bihainim tok bilong Jehova na em i kirap na go long Ninive.” (Jna. 3:3) Yes, em i bihainim tok. I klia tru olsem, em i kisim skul long ol popaia bilong em. Long dispela samting tu, yumi mas bihainim bilip bilong Jona. Yumi olgeta i save mekim sin; yumi olgeta i save popaia. (Rom 3:23) Tasol yumi save givap, o yumi kisim skul long ol popaia bilong yumi, na kirap long bihainim tok na mekim wok bilong God?

24, 25. (a) Jona i kisim wanem blesing long taim em i stap laip yet? (b) Em bai kisim wanem ol blesing long bihain?

²⁴ Yu ting Jehova i bin blesim Jona long pasin bilong em long bihainim tok? Tru tumas, em i blesim Jona. Wanpela samting em olsem, bihain Jona i kisim save olsem ol dispela boskru i bin abrusim bagarap. Bihain long Jona i tok na ol i tromoi em i go long solwara, wantu strongpela win i dai, na ol boskru “i pret tru long Jehova” na mekim sakrifais long em, na ol i no mekim long ol god giaman bilong ol.​—Jna. 1:15, 16.

²⁵ Na bihain tru, Jona bai kisim bikpela blesing moa. Jisas i yusim taim we Jona i stap insait long bel bilong traipela pis bilong makim tok profet i stori long taim bilong em yet long stap insait long matmat, o Sheol. (Ritim Matyu 12:38-40.) Jona bai amamas tru long kisim save long dispela blesing taim em i kirap bek na stap laip gen long graun! (Jon 5:28, 29) Jehova i laik givim blesing long yu tu. Olsem Jona, bai yu kisim skul long ol popaia bilong yu na kamapim pasin bilong bihainim tok, daunim laik bilong yu yet na helpim ol narapela?