Namba 36:1-13
-
Lo bilong marit long ol meri i kisim graun bilong papa bilong ol (1-13)
36 Josep em i papa bilong Manase, na Manase em i papa bilong Makir+ na Makir em i papa bilong Gileat. Wanpela taim ol hetman long lain bilong Gileat i go long Moses na ol hetman, em ol arapela hetman bilong lain Israel.
2 Na ol i tok: “Jehova i bin tokim yu, bikman bilong mipela, long pilai satu* na tilim graun+ long mipela ol Israel. Na Jehova i bin tokim yu, bikman bilong mipela, long givim hap graun bilong wanblut bilong mipela Selofehat long ol pikinini meri bilong em.+
3 Sapos ol i maritim ol man bilong narapela traib bilong Israel, orait hap graun bilong ol dispela meri long lain bilong papa bilong mipela bai kamap graun bilong lain bilong ol man ol i maritim. Olsem na ol bai kisim hap graun em yupela i bin pilai satu na makim bilong mipela.
4 Na long yia bilong Jubili+ bilong ol Israel, ol bai bungim hap graun bilong ol dispela meri wantaim graun bilong ol traib bilong ol man em ol i maritim. Olsem na ol bai kisim hap graun bilong ol dispela meri long graun bilong ol traib bilong ol tumbuna papa bilong mipela.”
5 Jehova i tokim Moses long givim dispela tok long ol Israel olsem: “Tok bilong traib bilong ol pikinini man bilong Josep i stret.
6 Olsem na Jehova i tok long ol pikinini meri bilong Selofehat olsem, ‘Ol i ken maritim husat man ol i laikim, tasol ol i mas maritim ol man long traib bilong papa bilong ol.
7 Graun bilong yupela wan wan traib bilong Israel i mas stap long traib bilong yupela yet na narapela traib i no ken kisim. Olgeta Israel i mas holim graun bilong ol tumbuna papa bilong ol yet.
8 Olgeta meri i gat graun namel long ol wan wan traib bilong Israel, ol i mas maritim man long traib bilong papa bilong ol.+ Sapos yupela i mekim olsem, orait yupela ol Israel bai holim yet hap graun bilong ol tumbuna papa bilong yupela.
9 Graun bilong yupela wan wan traib bilong Israel i mas stap long traib bilong yupela yet na narapela traib i no ken kisim. Wan wan traib bilong Israel i mas holim graun bilong ol yet.’”
10 Orait ol pikinini meri bilong Selofehat i mekim olsem Jehova i bin tokim Moses.+
11 Mala, na Tirsa, na Hokla, na Milka, na Noa, em ol pikinini meri bilong Selofehat,+ ol i maritim ol man long lain bilong papa bilong ol.
12 Ol i maritim ol man long lain famili bilong Manase, pikinini man bilong Josep. Ol i mekim olsem na bai hap graun bilong ol i stap yet long traib bilong papa bilong ol.
13 Dispela em ol tok na lo Jehova i givim long ol Israel long rot bilong Moses long ples nating bilong Moap long Wara Jordan klostu long Jeriko.+
