Aisaia 35:1-10
35 Ples nating na ples em graun i drai, ol bai amamas,+Na ples drai nating bai amamas na ol plaua bai karamapim ples olsem plaua safron.*+
2 Tru tumas, em bai kamapim planti plaua;+Em bai amamas na singaut.
Em bai kisim glori bilong Lebanon,+Naispela bilas bilong Karmel+ na bilong Saron.+
Ol bai lukim glori bilong Jehova, naispela bilas bilong God bilong yumi.
3 Strongim ol han i no gat strong,Na strongim ol skru i wok long guria.+
4 Tokim ol man husat i tingting planti:*
“Strongim bel. No ken pret.
Harim! God bilong yupela bai bekim rong bilong ol birua bilong yupela,God bai kam bilong mekim save long ol.+
Em bai kam na seivim yupela.”+
5 Long dispela taim, ai bilong ol aipas bai lukluk,+Na yau bilong ol yaupas bai harim toktok.+
6 Long dispela taim, ol lek nogut bai kalap olsem dia,+Na tang bilong ol mauspas bai singaut na amamas.+
Ol wara bai sut i kam aut long ples nating,Na ol hanwara bai ron long ples drai nating.
7 Graun i hat na drai nogut tru bai kamap raunwara,Na graun i no gat wara, ol hanwara bai ron.+
Long ol ples we ol jekol* i malolo long en,+Bai i gat ol grinpela gras, ol pitpit na longpela gras.
8 Na bai i gat wanpela bikrot long dispela hap,+Yes, wanpela rot ol i kolim Bikrot Bilong Pasin Holi.
I no gat wanpela man i doti bai wokabaut long en.+
Em bilong man husat i bihainim dispela rot;I no gat wanpela longlong man bai wokabaut long en.
9 I no gat laion bai stap long en,Na i no gat ol wel animal bai wokabaut long dispela rot.
Ol bai no stap long en;+Ol man em God i baim bek ol, ol tasol bai wokabaut long dispela rot.+
10 Ol man em Jehova i kisim bek* ol, ol bai kam bek+ na kam long Saion wantaim bikpela amamas.+
Amamas bai stap oltaim oltaim olsem kraun long het bilong ol.+
Yes, ol bai kisim bikpela amamas tru,Na bel hevi na sori bai i no stap moa.+
Ol Futnot
^ O, “plaua krokus.”
^ O, “tingting planti long bel.”
^ Jekol em wanpela kain wel dok.
^ Hib., “baim bek.”
