Bakumaofesi mapati aa Bakamboni ba Jehova balipakamene kuswiilila mbwaayenda makani aajatikizya bulwazi bwa coronavirus naa kuti COVID-19. Tulizyi kuti businsimi bwamu Bbaibbele butondezya kuti zilwazi zinooli cibeela cazitondezyo zyamazuba aamamanino. (Luka 21:11) Ikuti kwabbuka malwazi, cilayandika kubweza ntaamu zyeelede kutegwa tulikwabilile akukwabilila bamwi.—Tusimpi 22:3.

Ibamwi balakonzya kubuzya kuti naa bali buti bakwesu bali mumasena aajatikizyidwe. Bakwesu bali kumitabi alimwi ambungano zyaku Italy, Japan, South Korea akumasi aamwi bajatikizyigwa kapati. Mumasena aamwi, mane buya baofesi yamutabi baimika basikuswaya alimwi abeenzu. Mumasi aambi, bamfwulumende bakasya miswaangano yaabuleya mipati, calo capa kuti mutabi umwaye miswaangano yabbazu. Kuyungizya waawo, mbungano zyacinca bubambe bwakukambauka akuswaangana mumasena aamwi. Pele nokuba kuti kuli buyumuyumu oobu, bakwesu bazumanana kuliyaka kumuuya akuyumya bamwi.—Juda 20, 21.

Mubukkale oobu, bakwesu bagwasyigwa anjiisyo eezyi zitobela. Twaambo ootu tulakonzya kumugwasya nywebo amukwasyi wanu ikuti mwasikilwa bulwazi oobu kubusena nkomubede.

• Mutayoowi. Nokuba kuti cilayandika kupakamana ciindi nokwabbuka malwazi alimwi akulikwabilila, taciyandiki kuyoowa.—Tusimpi 14:15; Isaya 30:15.

• Amutobele Malailile Ngoipa Mfwulumende. Kanji-kanji bamfwulumende balabikka malailile aayelede kutobelwa abanamaleya. Cilayandika kwaazyiba alimwi akwaatobela malailile aaya.—Baroma 13:1.

• Mweelede Kuba Balondo. Cilayandika kapati kusamba kumaanza lyoonse ansipa naa kunana sanitizer. Alimwi tweelede kusalazya masena ngotujata-jata kapati kumaanda eesu alimwi aku Ŋanda ya Bwami. Kuyungizya waawo, basilisi balakasya kujatana mumaanza, nkaambo eeci inga capa kuti bulwazi buyambukile bamwi. Kujatikizya bulwazi bwa coronavirus, ba World Health Organization bapa malailile aayungizyidwe kubanamaleya.

• Amutondezye Luyando Kuli Bamwi. Nokuba kuti cilayandika kapati kujanika kumiswaangano ya Bunakristo akutola lubazu mubukambausi, ikuti kamucisidwe, amukkale kuŋanda kutegwa mutayambukizyi bamwi. Eeci citondezya luyando lwabunyina alimwi cikwabilila bakwesu abacizyi abasimukoboma batali Bakamboni.—Matayo 22:39.

• Amutobele Bubambe Bwabikkwa Ambungano. Kumasena amwi ikuli bulwazi, bakuofesi yamutabi balakonzya kwiimika miswaangano yambungano, miswaangano yabbazu, amilimo imwi iicitwa ambunga. Eeci ncicacitika kumasena aamwi aajatikizyigwa kapati a COVID-19 mbuli ku Italy, Japan, alimwi aku South Korea. Kweelana abukkale bwakubusena ooko, baalu balakonzya kulekkooda miswaangano, kutegwa basikumwaya kabeebelela kumaanda aabo. Basikumwaya balakonzya kutola lubazu mubukambausi kwiinda mukubelesya fooni, mameseji, ma e-mail, naa magwalo.

Ansi aawa kuli malifalensi aajisi njiisyo zigwasya kulikwabilila kumalwazi.

• “Mbomukonzya Kulikwabilila Kumalwazi” Sinsimuka! No. 6 2016, peeji 4-6

• “Nzyomukonzya Kucita Kusumpula Buumi Bwanu” Sinsimuka! June 2015, peeji 2-7

• “Mulakonzya Kupa Kuti Buumi Bwanu Bubote: Nzila 4—Amubukwabilile Buumi Bwanu” Sinsimuka! March 2011, peeji 7