Mucelo uutegwa Pomelo, mucelo uukomena kapati alimwi uulweela. Nokuba kuti mucelo ooyu waloka mamita ainda ku 10 kuzwa mucisamu, taukonzyi kupwasyuka! Ino ncinzi cipa kuti mucelo ooyu kautanyonyooki waloka?

Amulange-lange: Basikuvwuntauzya bakajana kuti mukati mwamakamba aamucelo ooyu muli cikanda cituba cili mbuli nsinsa cipangwa kwiinda mukutantaana kwamaseelo. Kutantaana ooku kulakomena mbociyaabuya mukati cikanda eeci alimwi kunjila muwo amaanzi. Ikuti mucelo ooyu waloka ansi kuzwa mucisamu, maanzi aaya acita mbuli nsinsa kukwabilila mucelo. Cikanda eeci inga cilaceya akuyuma kutegwa cikwabilile mucelo oonse wauma anyika.

Basayaansi balimukusola kupanga nsinsa yacibulo iitakonzyi kunyonyooka iikozyenye acikanda camucelo ooyu uutegwa Pomelo. Basyoma kuti zibulo zili boobu zilakonzya kubelesyegwa mukupanga zimpoompo zyaba sikweenzya honda, kukwabilila myootokala alimwi akukwabililwa kumabwe aaloka kuzwa kujulu.

Ino muyeeya buti? Sena makamba aamucelo uutegwa Pomelo akabako akaambo kakusanduka? Naa akalengwa buya?