Banabukwetene banji cilabayumina kubandika, nokuba kuti bali antoomwe. Ino ncinzi cipa boobo?

•  Nkaambo nzi banabukwetene bamwi ncobalimvwa kuti tabayandani, nokuba kuti inga bali antoomwe?

•  Ncomweelede kucita

•  Nzyobaamba banabukwetene

•  Nzyomukonzya kubandika

•   Kukatala kapati

   “Ikuti twajana ciindi cakubandika, inga kujanika kuti mebo naa balumi bangu balikatede kapati. Ciindi nondikatede, ndilafwambaana kunyema atuntu tutayi koomoonga. Cili kabotu ikuti tweebelela buyo TV.”—Ba Anna.

•   Kunyonganizyigwa amafooni naa matabbuleti

   “Social media alimwi azyakulikondelezya zijanika aintaneti zilakonzya kutumanina ciindi. Mulakonzya kutola mawoola manji aali nzizyo, kakunyina kubandika angomukwetene limwi. Inga mbuli kuti tamuli muluumu yomwe.”—Ba Katherine.

•   Kukkomanina zintu ziindene

   “Balumi bangu bakotoka kumulimo, kanji-kanji ciindi bacimanina kukucita zintu zibakkomanisya. Balabeleka kapati aboobo baleelede kuba aciindi cakucita zintu nzyobayanda. Pele ndilombozya kuti katujisi ciindi cinji cakuba antoomwe.”—Ba Jane.

•   Mulimo

   “Akaambo kakuba amafooni, tulakonzya kuzumanana kubeleka nokuba kuti tulaaŋanda abanamukwasyi. Kanji-kanji ndilaakulemba ma e-mail aakumulimo atumeseji muciindi cakuba abakaintu bangu.”—Ba Mark.

•   Amubone ciindi cakuba antoomwe kuti cilayandika, kutali kuti ncintu buyo ncomweelede kucita ikuti kamutajisi cakucita.

   Njiisyo yamu Bbaibbele: ‘Amusinizye zintu ziyandika kapati.’—Bafilipi 1:10.

   Ncomweelede kuyeeya: Sena nzyomucita zilatondezya kuti mubona cikwati canu ikuti cilayandika kapati kwiinda mulimo wanu naa zintu nzyomukkomanina kucita? Sena ngomukwetene limwi mumubikkila buyo maano ikuti kunyina ncomucita?

   Muzeezo: Mweelede kuba aciindi. Amulibikkile mulongo wakuba antoomwe kakunyina cimunyonganya.

   “Inga ndilabotelwa ikuti balumi bangu bapulana cintu cimwi cesu buyo tobilo. Cindipa kulimvwa kuyandwa, akubona kuti balakkomana ikuti katuli buyo tobilo. Eeci cipa kuti kandibayanda kapati.”—Ba Anna.

•   Amulizibizye kwiibikka ambali fooni naa tabbuleti yanu.

   Njiisyo yamu Bbaibbele: “Zintu zyoonse zilijisi ciindi canzizyo.”—Mukambausi 3:1.

   Ncomweelede kuyeeya: Ino nziindi zinji buti tumeseji notupa kuti mutamubikkili maano ngomukwetene limwi?

   Muzeezo: Amusole kulida antoomwe ciindi comwe abuzuba alimwi akusiya mafooni aanu muluumu iimbi. Kulida antoomwe nciindi cibotu cakubandika kujatikizya nzyomwacita buzuba oobo.

•   Ikuti kacikonzyeka, amuunke antoomwe kukuula zintu naa kucitila antoomwe milimo yaaŋanda.

   Njiisyo yamu Bbaibbele: “Bobilo bali kabotu kwiinda omwe, nkaambo balijisi bulumbu bubotu kumilimo njobabeleka canguzu.”—Mukambausi 4:9.

   Ncomweelede kuyeeya: Ino nziindi zinji buti umwi akati kanu naunka alikke kuyakuula zintu?

   Muzeezo: Amubelekele antoomwe alimwi akugwasyanya, noiba milimo iitayandiki bantu bobilo.

   “Amusole kubelesya ciindi ncomubelesya kuula zintu, kusanzya mitiba, kusalazya alubuwa, alimwi akuwasha zisani kuba antoomwe.”—Ba Nina.

•    Amunyoneke

   Njiisyo yamu Bbaibbele: “Bantu boonse abazyibe kuti mulanyoneka.”—Bafilipi 4:5.

   Ncomweelede kuyeeya: Ino inga mwatondezya buti kuti mulanyoneka kuzintu nzyomulangila kuli ngomukwetene limwi?

   Muzeezo: Amubandike kutegwa muzyibe nzyomuyandika nyoonse. Amumvwane ciindi ncomunooba antoomwe nyoonse kamukkomene.

   “Balumi bangu balijisi nguzu kapati, pele mebo tazili zinji boobo akaambo kakuciswa-ciswa. Kanji-kanji ndilabaambila kuti bakeendeende, akuti tulabonana bapiluka. Mebo ndilasyaala aŋanda kutegwa ndipumune ciindi balo nobatako. Eeci cipa kuti toonse tulimvwe kabotu akaambo kakucita zintu nzyotukonzya.”—Ba Daniela.

 Kusaanguna, umwi aumwi ailange-lange mibuzyo iitobela kali alikke. Mpoonya mubandike bwiinguzi kamuli antoomwe.

•    Sena lino muyeeya kuti nywebo angomukwetene limwi mulajana ciindi cinji cakuba antoomwe?

•   Ino nimbazu nzi nzyomukonzya kumulumba ngomukwetene limwi akaambo kakusolekesya kujana ciindi cakuti mube antoomwe?

•   Ino nkucinca kuli buti nkomuyanda kubona?

•   Ino nziindi zinji buti fooni naa tabbuleti yanu noipa kuti mutamubikkili maano ngomukwetene limwi ciindi nomubandika?

•   Ino mbuti nyoonse mbomukonzya kutondezya kunyoneka kuzintu nzyomulangila kuli umwi aumwi?

•   Ino nkucinca nzi nkomukonzya kucita nsondo iino kutegwa mube antoomwe kakunyina kunyonganyizyigwa?