Bantu boonse balijisi zyina libageme. Sena inga tiiceelela kuti awalo Leza abe azyina? Kuba azyina alimwi akulibelesya cilayandika kapati muzilongwe zyabuntu. Sena ceelede kwiindana caboola kucilongwe cesu a Leza?

 Mu Bbaibbele, Leza waamba kuti: “Ndime Jehova. Ndezina lyangu.” (Isaya 42:8) Nokuba kuti ulijisi amazyina aamwi aabulemu, mbuli “Leza Singuzuzyoonse,” “Mwami Wakoonse-koonse,” alimwi a “Mulengi,” waambila bakombi bakwe kubelesya zyina lyakwe limugeme.—Matalikilo 17:1; Milimo 4:24; 1 Petulo 4:19.

 Ma Bbaibbele manji alijisi zyina lya Leza mulugwalo lwa Kulonga 6:3. Lugwalo oolu lwaamba kuti: “Ndakalibonya kuli-Abrahamu akuli-Izaka akuli-Jakobo mbuli Leza Singuzuzyoonse, pele izina lyangu lya-Jehova teelyakazibwa kulimbabo.”

 Jehova ndizyina lya Leza lyalikubelesyegwa kwamyaanda yamwaka. Nokuba kuti basyaazibwene balikuyanda kuti kalilembwa kuti “Yahweh” mu Cingisi, Jehova ndezyina lizyibidwe kapati. Cibeela cakusaanguna ca Bbaibbele tiicakalembwa mu Cingisi, pele mu Chihebrayo, mwaambo ngobabala kutalikila kululyo kuya kulumwensyi. Mumwaambo oomu, izyina lya Leza lijisi buyo tubala tone, nkokuti, יהוה. Mabala aaya one aa Chihebrayo—kwaasandulula mbwaabede, nkokuti YHWH—aitwa kuti Tetragrammaton.