Ino Bwami bwa Leza Ninzi?

AMULIZYE

Bwiinguzi bwamu Bbaibbele

Bwami bwa Leza nimfwulumende ini yakatalisyigwa a Jehova Leza. Mu Bbaibbele, “Bwami bwa Leza” alimwi bwiitwa kuti “Bwami bwakujulu,” nkaambo bweendelezya kuzwa kujulu. (Maako 1:14, 15; Matayo 4:17) Bulikozyenye munzila zinji amfwulumende zyabantu, pesi bulaziinda mfwulumende zyabantu mumbazu zyoonse.

Baleli. Leza wakasala Jesu Kristo kuba Mwami wa Bwami oobu alimwi wamupa nguzu zinji kwiinda nguzu nzyobakonzya kuba anzizyo baleli bantunsi. (Matayo 28:18) Jesu ubelesya nguzu zyakwe kucita buyo zyintu zibotu, nkaambo wakatondezya kale kuti Musololi uusyomeka alimwi uujisi lweetelelo. (Matayo 4:23; Maako 1:40, 41; 6:31-34; Luka 7:11-17) Ansi abweendelezi bwa Leza, Jesu wasala bantu kuzwa kumisyobo yoonse kuti bakabe “bami ibayoolela nyika” anguwe kujulu.—Ciyubunuzyo 5:9, 10.
Bulamfwu bwaciindi. Kwiindana amfwulumende zyabantu zitalika kulela mpoonya akumana, Bwami bwa Leza mbwami “butakooyoonyonyoonwa abuniini.”—Daniele 2:44.
Balelwa. Muntu uuliwoonse uucita nzyayanda Leza ulakonzya kuba mulelwa wa Bwami bwa Leza, tacikwe makani amusyobo wakwe naa busena nkwaakazyalilwa.—Milimo 10:34, 35.
Milawo. Milawo ya Bwami bwa Leza taikasyi buyo kucita zyintu zibi, pele ipa kuti balelwa kabalilemeka kabotu. Mucikozyanyo, Ibbaibbele lyaamba kuti: “‘Weelede kuyanda Jehova Leza wako amoyo wako woonse abuumi bwako boonse amizeezo yako yoonse.’ Ooyu ngomulawo mupati alimwi wakusaanguna. Alimwi ngooyu wabili uuli mbuli yooyu: ‘Weelede kuyanda simukobonyoko mbubonya mbuli mboliyanda omwini.’” (Matayo 22:37-39) Kuyanda Leza alimwi asimukobonyoko kupa kuti balelwa ba Bwami bwa Leza kabacitila bantunyina zyintu zibotu.
Lwiiyo. Nokuba kuti Bwami bwa Leza bubikkila balelwa zyeelelo zisumpukide kapati, pele alimwi bulabayiisya bantu mbobakonzya kusika azyeelelo eezyo.—Isaya 48:17, 18.
Mulimo. Bwami bwa Leza tabuvwubyi baleli bambubo akupa balelwa kucetaala. Muciindi caboobo, buyoozuzikizya kuyanda kwa Leza, kubikkilizya acisyomezyo cakuti aabo bamuyanda bayoopona kukabe kutamani muparadaiso anyika.—Isaya 35:1, 5, 6; Matayo 6:10; Ciyubunuzyo 21:1-4

Makani Aayendelana Ayaaya

Bwami bwa Leza Mibuzyo Yamu Bbaibbele Yaingulwa

Andiza Inga Mwaakkomanina Ayaaya

NJIISYO ZYAMU BBAIBBELE ZIYANDIKA

Ino Bwami bwa Leza Ninzi?

Mumulimo wakwe woonse, Jesu wakayiisya kapati kujatikizya Bwami bwa Leza kwiinda makani aambi. Kwamyaka minji, basikumutobela balikubupailila Bwami oobo kuti buboole.

NGAZI YAMULINDIZI

Ino Nguni Mwami wa Bwami bwa Leza?

Balembi ba Bbaibbele banji bakalemba makani aajatikizya mbotukonzya kumuzyiba ooyo iwakali kuyooba Mwami wa Bwami bwa Leza. Kuli buyo muntu omwe iweelela bupanduluzi oobu.