“Lemeka bauso abanyoko kutegwa upone mazuba manji munyika Jehova Leza wako njaakupa.”—Kulonga 20:12, Busanduluzi Bwanyika Mpya.

 “Lemeka uso abanyoko, kuti mazuba aako avule munyika Jehova Leza wako njakupa.”—Kulonga 20:12, The Bible in Tonga Lyamu 1963.

 Leza wakalailila bana Israyeli bansiku kulemeka bazyali babo. Alimwi Leza wakaamba kaambo ncobakeelede kuutobela mulawo ooyu. Nokuba kuti Mulawo wa Leza kubana Israyeli, nkokuti Mulawo wa Musa, taucibeleki, zyeelelo zyakwe tazicincide pe. Mulawo ooyu wakayeeme atwaambo twamasimpe tucibeleka, aboobo ulayandika ku Banakristo mazuba aano.—Bakolose 3:20.

 Ibana—baniini abapati—balabalemeka bazyali babo ciindi nobabamvwida. (Levitiko 19:3; Tusimpi 1:8) Nokuba kuti mwana wakomena akuba amukwasyi awalo, ulazumanana kulanganya bazyali bakwe. Mucikozyanyo, balabona kuti bazyali babo balanganizyigwa kabotu noliba leelyo nobacembaala, akubapa mali nokwayandika.—Matayo 15:4-6; 1 Timoteyo 5:4, 8.

 Amubone kuti bana Israyeli ibakacili bana bakeelede kulemeka kutali bausyi pele abanyina, kutondezya kuti baluuzyi mulimo wabanyina mumukwasyi. (Tusimpi 6:20; 19:26) Abalo bana mazuba aano mbobeelede kucita oobo.

 Pele mulawo ooyu wakulemeka bazyali wakali ampougolela. Bana bana Israyeli tiibakeelede kumvwida bazyali babo, naa muntu umwi, ikuti kucita oobo kwakali nkutamvwida Leza. (Deuteronomo 13:6-8) Ncimwi buyo amazuba aano, Banakristo beelede “kumvwida Leza mbwali mweendelezi kutali bantu.”—Milimo 5:29.

 Mu Mulawo ngwaakapa bana Israyeli Leza wakasyomezya kuti bana ibakali kuyoolemeka bazyali babo bakali ‘kuyoopona mazuba manji akuti zintu ziyoobeendela kabotu’ munyika njaakabapa. (Deuteronomo 5:16) Tiibakali kuyoopegwa cisubulo cakali kuyoopegwa bana bapati ibakali kuunduluzya mulawo wa Leza akuzangila bazyali babo. (Deuteronomo 21:18-21) Njiisyo eezyi tiizyacinca pe nokuba kuti kwainda ciindi. (Baefeso 6:1-3) Kufwumbwa naa tuli bana naa tuli bapati, tuyoolyaambilila ku Mulengi wesu. Masimpe, kweelana acisyomezyo cakwe, bana ibakali kuyoomumvwida akumvwida bazyali babo bakali kuyoopona mazuba manji anyika. Mane buya, bajisi bulangizi bwakuyoopona kukabe kutamani.—1 Timoteyo 4:8; 6:18, 19.

 Tulakonzya kwiiya kaambo kakkomanisya kuzwa mpoulembedwe mulawo ooyu mumulongo wa Milawo Iili Kkumi, njotubala kulugwalo lwa Kulonga 20:12. (Kulonga 20:1-17) Milawo yakasaangunina mulawo ooyu ipandulula nzyobeelede kucita bana Israyeli kuli Leza, mbuli kukomba nguwe alikke. Mpoonya milawo yakalembwa kumamanino aamulawo ooyu, ipandulula nzyobeelede kucita kubantunyina, kubikkilizya akusyomeka kumuntu ngobakwetene limwi alimwi akutabba. Aboobo, mulawo ‘wakulemeka bauso abanyoko’ ulibonya kuti uswaanganya milawo iili atala aanguwo aili aansi aanguwo.