“Kunyina sunko lyakamucitikila nywebo litabacitikili bamwi. Pele Leza ulasyomeka, aboobo takamulekeli kuti musunkwe kwiinda nguzu zyanu pe, pele mwanoosunkwa uyoomupa anzila yamatijilo kutegwa mukonzye kuliyumya musunko eelyo.”—1 Bakorinto 10:13, Bbaibbele lya Busanduluzi Bwanyika Mpya.

 “Taakwe lutepauzyo lumusikila cita mbuli matepauzyo ngibajana bantu lyoonse, alimwi Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.”—1 Bakorinto 10:13, The Bible in Tonga Lyamu 1963.

 Lugwalo oolu lwaamba bube mbwajisi Leza bwakusyomeka bwalo butupa kumuyanda kapati. Bakombi ba Leza basyomeka balakonzya kusyoma kuti ulakonzya kubagwasya kwaambisya ciindi nobajana mapenzi naa masunko.

 “Kunyina sunko lyakamucitikila nywebo litabacitikili bamwi.” Bakombi ba Leza balakonzya kusunkwa kucita cintu cimwi citamukkomanisyi walo. Nokuba kuti masunko aali boobu alakatazya pesi taali meenzu pe, nkaambo banji akabacitikila kale. a Aboobo, bakombi ba Leza balakonzya kuba masimpe kuti abalo balakonzya kwaajana masunko aali boobu.

 “Leza ulasyomeka.” Jehova b Leza ulasyomeka lyoonse, alimwi usyomezya kuti kunyina nakonzya kubalekelezya aabo basyomeka kulinguwe alimwi abaabo ibamumvwida. (Deuteronomo7:9; Intembauzyo 9:10; 37:28) Aboobo, aabo bamusyoma balakonzya kusyoma kuti uyakwaazuzikizya majwi aakwe aatobela.

 “Takamulekeli kuti musunkwe kwiinda nguzu zyanu pe.” Leza ulatondezya kusyomeka kwakwe kwiinda mukutazumizya mapenzi kuti atuyumine kapati cakuti twaalilwa kuliyumya. Ulizyi kulezya kwamubelesi wakwe umwi aumwi.—Intembauzyo 94:14.

 “Mwanoosunkwa uyoomupa anzila yamatijilo kutegwa mukonzye kuliyumya musunko eelyo.” Leza ulakonzya kwiigwisya sunko naa kubapa nzyobayandika bakombi bakwe kutegwa bakonzye kuliyumya. Mucikozyanyo, ulakonzya kupa busolozi kwiinda mumuuya wakwe uusalala, luumbulizyo luzwa mu Bbaibbele, naa lugwasyo kuzwa kubasyomima.—Johane 14:26; 2 Bakorinto 1:3, 4; Bakolose 4:11.

 Kapango aaka kajanika mulugwalo mwaapostolo Paulo ndwaakalembela mbungano ya Banakristo baku Korinto. Mulugwalo oolu, Paulo wakabelesya makani aakaindi abana Israyeli kupa ncenjezyo kubana Korinto. (1 Bakorinto 10:11) Paulo wakabandauka masunko bana Israyeli ngobakajana alo abikkilizya kukomba mituni alimwi akutalilemeka mumakani aakoonana. (1 Bakorinto 10:6-10) Bamwi bakaalilwa kwaazunda masunko. Aboobo kwiinda mucikozyanyo eeci, Paulo uyeezya Banakristo kuti tabeelede kuciindizya kulisyoma, akuyeeya kuti tabakonzyi kuzundwa amasunko. (1 Bakorinto 10:12) Muciindi caboobo, ulabakulwaizya amajwi aali kulugwalo lwa 1 Bakorinto 10:13. Bakombi ba Leza basyomeka balakonzya kuliyumya musunko aali oonse.

 Amweebelele kavidiyo aaka kutegwa mubone mubufwaafwi izili mubbuku lya 1 Bakorinto.