BAKUBUSI BALABUZYA

Ino Ndiboneka Buti?

AMULIZYE

Ino Ndiboneka Buti?

Ino nkaambo nzi ncomweelede kubikkila maano nzyomusama? Akaambo kakuti zisani zitondezya buyo mbotubede. Ino zisani zyanu zitondezya nzi?

Twaambo totatwe tulubide kujatikizya mafasyoni ambomukonzya kulikwabilila

Kaambo kalubide #1: Kulekela nzyomumvwa naa nzyomweebelela muli sikapepele kumweendelezya.

Mukubusi wazina lya Theresa waamba kuti: “Zimwi ziindi icindipa kunyomenena zintu zimwi nkubona zintu eezyo kazyaambilizyigwa abasimakwebo. Kuti lyoonse koyeeya mafasyoni aazisani nzyobasama bantu bamwi inga cakuuba-ubila kubatobela.”

Bakubusi basimbi tabali buyo balikke ibajatikizyigwa azintu izyaambilizyigwa mumakwebo. Bbuku litegwa The Everything Guide to Raising Adolescent Boys lyaamba kuti “Bana basankwa abalo balayungwa azintu zyaambilizyigwa mumakwebo. Basikwaambilizya makwebo balaambilizya zintu zikwelelezya nokuba kuli baabo bacili baniini kapati.”

Cikonzya kumugwasya: Bbaibbele lyaamba kuti: “Muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.” (Tusimpi 14:15) Kweendelana anjiisyo eeyi, mweelede kuzilanga-langa zintu zyaambilizyigwa mumakwebo. Mucikozyanyo, kuti mwabona zisani nzyobaambilizya kazilembedwe kuti “sassy,” “hot,” naa “sexy,” amulibuzye kuti:

‘Ino nguni uujana mpindu kuti ndaula cisani cili boobu?’
‘Ino bantu inga bandiyeeyela kuti ndijisi bukkale buli buti?’
‘Sena bukkale oobo butondezya bwini mbondibede alimwi azintu nzyondisyoma?’

Kaambo nkomweelede kuzyiba kujatikizya mafasyoni: Kwansondo yomwe, amulange-lange nzyobaambilizyigwa basimakwebo kujatikizya zisani alimwi amakwebo buyo aamwi aabikkila maano kumafasyoni. Ino mbukkale buli buti mbobakulwaizya? Sena zijisi mulumbe uubambilidwe kumupa kulimvwa kuti mweelede kutobela nzila imwi yansamino? Mukubusi wazina lya Karen waamba kuti: “Kuli sunko pati lyakuyanda kuboneka kabotu akutondezya mbouli mubotu mubili ngwajisi muntu. Basikwaambilizya makwebo ibaazyi makani aaya inga babikkila kapati maano kwaambilizya nzyobakonzya kukkomanina bakubusi.”

Kaambo kalubide #2: Kuyanda kulibonya mbuli bamwi kutegwa mutaboneki kucaalila.

Mukubusi uutegwa Manuel waamba kuti: “Kuti musyobo umwi wazisani uli mufasyoni, nkokuti boonse inga bayanda kusama kweelana afasyoni eeyo. Kuti tiiwasama boobo, bantu inga batalika kukugambwa.” Awalo mukubusi wazina lya Anna ulaazumina makani aaya naamba kuti: “Kaambo takayeeme kapati afasyoni pe, kayeeme akutayanda kucaalila.”

Cikonzya kumugwasya: Bbaibbele lyaamba kuti: “Amuleke kutobela ziyanza zyabweende bwazintu obuno.” (Baroma 12:2) Kweelana alulayo oolu, amulange zisani nzyomujisi akulibuzya kuti:

‘Ino ncinzi cindipa kusala musyobo wazisani ooyu?’
‘Sena kuba amusyobo umwi wazisani uudumide kapati ndicibona kuba cintu ciyandika kapati?’
‘Sena makanze aangu ngakukkomanisya buyo bantu azisani zyangu?’

Kaambo nkomweelede kuzyiba kujatikizya mafasyoni: Muciindi cakubona buyo zisani zili mufasyoni (nzyobayanda banji) naa izitali mufasyoni (nzyobatayandi banji), kamubikkila maano kubona naa zili kabotu kulindinywe alimwi zimupa kubona kuti mwasala kabotu. Kuti kamulimvwa kuti mwasala kabotu, nkokuti tamukapengi asunko lyakutayanda kucaalila.

Kaambo kalubide #3: Kuyeeya kuti kusama zisani zipa muzeezo wakoonana nkokuyandika.’

Musimbi wazina lya Jennifer wakaamba kuti: “Kwaamba masimpe, zimwi ziindi ndibaasunko lyakuyanda kusama cisani citali kabotu, andiza cifwaafwi naa cijata kapati.”

Cikonzya kumugwasya: Bbaibbele lyaamba kuti: “Kulisakatizya kwanu kutabi buyo kwaatala . . . pele akube kulisakatizya kwamuntu wamukati kamoyo.” (1 Petro 3:3, 4) Kweelana alulayo oolu, ncili ciboneka kabotu, zisani zitondezya mbolibonya naa bube bwamumoyo.

Kaambo nkomweelede kuzyiba kujatikizya mafasyoni: Kusama cabulemu njefasyoni iinda kubota. Masimpe, kusama cabulemu takudumide mazuba aano. Pele amuciyeeyele boobu:

Sena kuli nomwakajisi mubandi amuntu waambaula kapati alimwi waamba buyo makani aajatikizya nguwe? Cuusisya ncakuti, muntu ooyu tazyi kuti upa kuti mubandi utazumanani!

Mbubwenya mbuli mubandi uuyeeme alindinywe nyolikke, nsamino ilakonzya kupa bamwi kumutantamuka

Kuti kamutasami cabulemu, muba mbuli muntu ooyu. Zisani nzyomusama zipa kuti muntu uuli woonse kamulanga, alimwi zilakonzya kupa kuti kamutaliibi naa kulisenda. Kuyungizya waawo, zilakonzya kumupa kulibonya mbuli kuti muyandaula basankwa naa basimbi.

Muciindi cakusama zisani zitondezya mubili wanu, kamusama cabulemu. Mukubusi wazina lyakuti Monica waamba kuti: “Kusama cabulemu tacaambi kusama mbuli mucembele, citondezya buyo kuti mulalilemeka alimwi mulabalemeka abamwi.”