“INO nkaambo nzi eeci ncocacitikila ndime? Nkaambo nzi Leza ncaalekela kuti cintu eeci cindicitikile?” Eeyi njemibuzyo yakamukatazya kapati Sidnei waku Brazil, uujisi myaka yakuzyalwa iili 24. Naakacitikilwa ntenda yamumaanzi, wakatalika kweendela akacinga kabalema.

Kupenga ikuboola akaambo kakucitikilwa ntenda, kuciswa, kufwidwa muyandwa, ntenda zilicitikila, alimwi ankondo kulakonzya kupa bantu kulimvwa kuti Leza wabalekelezya. Eeci tacili cintu ceenzu pe. Sinsiku Jobu wakasikilwa mapenzi aaindene-indene mukutobelana. Cakutazyiba wakapa Leza mulandu, akwaamba kuti: “Ndakukwiilila kuti undigwasye, pele tondivwiili pe; ndaimikila, pele yebo wiile kundilanga buyo. Wacinca akuba silunya kulindime; wanduuma ajanza lyako lyanguzu kapati.”—Jobu 30:20, 21.

Jobu tanaakazyi nkwaakali kuzwa mapenzi aakwe, alimwi akaambo ncaakamusikila naa kuzumizyigwa kuti amusikile. Cikkomanisya ncakuti, Bbaibbele lilatwaambila kaambo zintu eezyi ncozicitikila alimwi ambotweelede kuzibona.

Kujatikizya Leza, Bbaibbele lyaamba kuti: “Milimo yakwe ililondokede, nkaambo nzila zyakwe zyoonse zililuleme. Ngu Leza uusyomeka, uutaciti zitaluleme; uliluleme alimwi uliluzi.” (Deuteronomo 32:4) Ikuti naa mbocibede oobo, sena masimpe kuti Leza ‘uululeme alimwi uuluzi’ inga wayanda kuti bantu kabapenga naa kuti inga wabelesya mapenzi kubasubula naa kubasalazya?

Mukwiimpana, Bbaibbele litwaambila kuti: “Ciindi muntu nasunkwa, ataambi kuti: ‘Ndili mukusunkwa a Leza.’ Nkaambo kunyina muntu uunga wasunka Leza azintu zibyaabi alimwi walo mwini tasunki muntu uuli woonse azintu zibyaabi.” (Jakobo 1:13) Alimwi buya Bbaibbele litwaambila kuti Leza kumatalikilo wakapa bantu buumi bulondokede. Wakapa bantu bakusaanguna ba Adamu a Eva munzi mubotu kapati, zintu zyoonse ziyandika mubuumi, alimwi amulimo mubotu wakubeleka. Leza wakabaambila kuti: “Amuzyalane muvwule, muzuzye nyika akuyeendelezya.” Cakutadooneka, ba Adamu a Eva bakanyina kaambo kakulimvwa kuti Leza wabalekelezya.—Matalikilo 1:28.

Pele mazuba aano, buumi buliindene kapati ambobwakabede kumatalikilo. Kuzwa kaindi, bantu bali kupenga kapati. Majwi aaya ngamasimpe aakuti: “Zilenge zyoonse zilatongela lyoonse alimwi zilaamacise caantoomwe kusikila lino.” (Baroma 8:22) Ino ncinzi cakacitika?

Kutegwa tumvwisye kaambo ncokuli mapenzi, tweelede kuyeeya nkwaakatalikila. Akaambo kakuyungwa amungelo muzangi, iwakazikwiitwa kuti Saatani Diabolosi, ba Adamu a Eva bakakaka zyeelelo zya Leza zyakuzyiba ciluzi acitaluzi kweelana amulawo ngobakapedwe wakutalya ‘kucisamu cakuzyiba bubotu abubi.’ Diabolosi wakaambila Eva kuti tabakonzyi kufwa ikuti basotoka mulawo wa Leza, aboobo wakatamikizya Leza kuti ulabeja. Alimwi Saatani wakatamikizya Leza kuti ukasya balelwa bakwe lwaanguluko lwakulisalila cibi acibotu. (Matalikilo 2:17; 3:1-6) Saatani wakali kwaamba kuti bantu balakonzya kupona kabotu kakunyina kweendelezyegwa a Leza. Zyoonse eezyi zyakatalisya kaambo kapati kakuti, Sena Leza wakali kweelela kweendelezya?

Diabolosi wakatalisya kaambo akambi. Wakatamikizya bantu kuti balamubelekela Leza akaambo kazintu nzyobakonzya kujana. Kujatikizya Jobu muntu uusyomeka, Diabolosi wakaambila Leza kuti: “Sena yebo tonoomuyakila lukwakwa lwakumukwabilila ilumuzingulukide walo abamuŋanda yakwe kubikkilizya azintu zyoonse nzyajisi? . . . Pele lino, kotandabika janza lyako unyonyoone zintu zyoonse nzyajisi, ulabona ulakutukila kolangilila.” (Jobu 1:10, 11) Nokuba kuti majwi aa Saatani akali kujatikizya Jobu, wakali kwaamba kuti bantu boonse babelekela Leza akaambo kazintu nzyobakonzya kujana.

Ino ninzila nzi yakali kunoobota kapati yakumana twaambo ootu tupati? Leza mbwali sibusongo wakalijisi nzila mbotu kapati—nzila iitatupi kulimvwa kuti watulekelezya. (Baroma 11:33) Wakasala kuti abaleke bantu kuti balyeendelezye kwaciindi cili mbocibede kutegwa balibonene naa mbweendelezi bwani buluzi.

 Bukkale bukatazya ibuli munyika mazuba aano, mbumboni busalede bwakuti bweendelezi bwabantu bwaalilwa. Mfwulumende zyamunyika tiizyaalilwa buyo kuleta luumuno, kuliiba, alimwi alukkomano, pele alimwi zyainyonyoona nyika citaambiki. Eeci cisinizya kaambo kamasimpe kaambidwe mu Bbaibbele kakuti: “Muntu weenda tapedwe nguzu zyakusololela noziba ntaamu zyakwe.” (Jeremiya 10:23) Bulikke bweendelezi bwa Leza mbobukonzya kuleta luumuno lutamani, lukkomano, alimwi alusumpuko kubantu nkaambo aaya ngamakanze aa Leza.—Isaya 45:18.

Pele ino Leza uyakwaazuzikizya buti makanze aakwe kujatikizya bantu? Amuyeeye kuti Jesu wakayiisya basikumutobela kupaila kuti “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:10) Inzya aciindi ceelede, Leza kwiinda mu Bwami bwakwe uyoozigwisya zintu zyoonse ziletela kupenga. (Daniele 2:44) Bucete, kuciswa, alimwi akufwa ziyoomana. Kujatikizya bacete, Bbaibbele litondezya kuti Leza “uyoovwuna mucete uukwiilila lugwasyo.” (Intembauzyo 72:12-14) Kujatikizya baciswa, Bbaibbele lisyomezya kuti: “Taakwe muntu naba omwe uukkala munyika uuyakwaamba kuti: ‘Ndaciswa.’” (Isaya 33:24) Nobaba baabo bafwide mbayeeyede Leza, Jesu wakaamba kuti: “Ciyoosika ciindi eelyo aabo boonse ibali muzyuumbwe nobayoomvwa ijwi lyakwe akuzwa mulinzizyo.” (Johane 5:28, 29) Eelo kaka zilakkazika moyo zisyomezyo eezyi!

Nokwakainda myaka iibalilwa ku 17 kuzwa ciindi naakacitikilwa ntenda, Sidnei, iwaambwa kumatalikilo aacibalo eeci wakati: “Tandimupi mulandu Jehova Leza akaambo kantenda yakandicitikila, pele ndilazumina kuti kumatalikilo ndakali kulimvwa kuti Leza wandilekelezya. Kuli mazuba amwi nondilimvwa kutyompwa ncobeni, alimwi ndilalila ndayeeya bulema bwangu. Nokuba boobo, kwiinda mu Bbaibbele ndazyiba kuti ntenda yakandicitikila tiicakali cisubulo kuzwa kuli Leza. Kweelana ambolyaamba Bbaibbele, “boonse buyo balasikilwa ziindi zyamapenzi akucitikilwa zintu zitalangilwi.” Kupaila kuli Jehova alimwi akubala magwalo amwi kwandigwasya kuyuma kumuuya alimwi akuzilanga munzila yeelede zintu.—Mukambausi 9:11; Intembauzyo 145:18; 2 Bakorinto 4:8, 9, 16.

Kuyeeya kaambo Leza ncalekelede kupenga alimwi ambwaayoogwisyigwa mapenzi kulatugwasya kuzunda penzi lyakulimvwa kulekelezyegwa a Leza nkotukonzya kuba ankuko. Tulisinizyide kuti Leza ‘ngusikupa bulumbu kuli baabo bamuyandaula cabusungu.’ Kunyina muntu uumusyoma antoomwe a Mwanaakwe uuyootyompwa.—Bahebrayo 11:6; Baroma 10:11.