MAKANI AAYEEME AMUTWE UULI ACIVWUMBYO
Ino Bakamboni ba Jehova Mbaani?
“Kwainda myaka minji kuzwa nindakabazyiba ba Mike. Mbaakamboni ba Jehova. Pele cikombelo cabo cakali kundikatazya kumvwisya. Ino Jehova nguni? Nkaambo nzi Bakamboni ncobatasekeleli mazuba aakulyookezya? Sena ba Mike bakali mukabunga kabazangi?”—Ba Becky, baku California, U.S.A.
“Ciindi basimukoboma nobakatalika kwiiya Bbaibbele a Bakamboni ba Jehova, ndakatalika kulibuzya kuti: ‘Ino zina eelyo lyakuti Bakamboni ba Jehova lyaamba nzi? Eelo kaka zina eeli lilagambya kuba zina lyacikombelo!’”—Ba Zenon, baku Ontario, Canada.
“Mebo abakaintu bangu twakali kuyeeya kuti Bakamboni ba Jehova bakatuswaya kutegwa batulye coolwe nkaambo twakalilekede kuunka kucikombelo. Twakali kuyeeya kuti mbwaanga zikombelo izyakazyibidwe kapati tiizyakajisi eeco ncotwakali kuyandaula, nkokuti akalo kabunga ka Bakamboni ba Jehova ikatakazyibidwe kabotu tiikakali kukonzya kuba ancico.”—Ba Kent, baku Washington, U.S.A.
“Kwaamba masimpe tiindakabazyi Bakamboni ba Jehova alimwi tiindakazyi anzyobasyoma.”—Ba Cecilie, baku Esbjerg, Denmark.
Ambweni mwakababona kale kabakambauka kuŋanda aŋanda naa mumasena aabuleya, kabayabwaabila mabbuku aamba zyamu Bbaibbele, alimwi akutalisya ziiyo zya Bbaibbele zitabbadelelwi. Andiza magazini eeyi mwakaitambula kuli umwi wambabo. Nokuba boobo, ambweni noliba lino tamunabazyiba kabotu Bakamboni ba Jehova kuti naa mbaani. Ambweni mizeezo njomujisi ilikozyenye anjobakaamba bamwi atala aawa.
Ikuti kamujisi mibuzyo iili boobu, ino inga mwabujana kuli bwiinguzi? Ino inga mwazizyiba buti nzyobasyoma Bakamboni ba Jehova, nkobaajana mali ngobabelesya mumulimo wabo alimwi angobabelesya kuyaka maanda aabo aakukombela, ikaambo ncobamuswaila kuŋanda yanu alimwi amumasena aabuleya?
Ba Cecilie, ibaambwa kumatalikilo bakaamba kuti, “Ndakali kubala makani manji a Intaneti aajatikizya Bakamboni ba Jehova. Ndakamvwa twaambo tumwi twakubeja kujatikizya mbabo mpoonya ndakamvwida. Akaambo kaceeci, tiindakali kubayanda Bakamboni ba Jehova.” Nokuba boobo, mukuya kwaciindi ba Cecilie bakabandika a Bakamboni ba Jehova kubagama alimwi bakajana bwiinguzi bwakabasika amoyo kumibuzyo njobakajisi.
Sena inga mwayanda kujana bwiinguzi bwakasimpe kumibuzyo njomujisi kujatikizya Bakamboni ba Jehova? Tumukulwaizya kubuzya baabo bazyi masimpe kujatikizya mibuzyo eeyo
