Myaka buyo misyoonto kuzwa nondakazyalwa, bamukwasyi wangu bakali kukkala munsi-munsi adolopo lya Leipzig, kujwe aacisi ca Germany, afwaafwi amunyinza wa Czech alimwi a Polish. Nondakali aamyaka iili cisambomwe, bataata bakalonga kuyoobelekela ku Brazil mpoonya kwiinde ciindi bakalongela ku Ecuador.

Nondakakkwanya myaka iili 14, bakandituma kucikolo ku Germany. Akaambo kakuti bazyali bangu bakali kukkala ku South America, ndakatalika kulilela. Akaambo kakuzyibila kukkala ndelikke, tiindakali kubikkila maano kujatikizya mbobakali kulimvwa bamwi akaambo kamicito yangu.

Nondali aamyaka iili 17, bazyali bangu bakapiluka ku Germany. Kusaanguna ndakali kukkala ambabo. Pele akaambo kabube bwangu bwakutayanda kweendelezyegwa, ndakaalilwa kukkala abamukwasyi wangu. Nondakakkwanya myaka iili 18, ndakazwa aŋanda.

Ndakapenga kapati mumizeezo, eelyo ndakatalika kuyandaula kaambo ncotuponena. Nondakamana kulanga-langa bukkale bwiindene-indene alimwi ambunga ziindeene-indene, ndakabona kuti cintu cibotu ncondikonzya kucita mubuumi bwangu, nkuyaabulanga-langa nyika eeyi mbotu kapati kabatanainyonyweeda limwi bantu.

Ndakazwa ku Germany, kumane ndakaula honda, mpoonya ndakagama ku Africa. Kakutanainda ciindi, ndakapiluka ku Europe kuyoobambya honda yangu. Tiilyakalampa, ndakalijana kunkomwe yalwizi ku Portugal. Ndakayeeya kucileka kubelesya honda akutalika kubelesya bwato.

Ndakabasangana balombwana abasimbi ibakali kulibambila lweendo lwakuzabuka lwaanje lutegwa Atlantic Ocean. Akati kambabo, ndakaswaangana aba Laurie, imukaintu ngondakazookwata. Kusaanguna twakaunka kunsumbu ya Caribbean. Kumane twakakkala buyo asyoonto ku Puerto Rico, mpoonya twakapiluka ku Europe. Twakali kulombozya kuba abwato bwakeendela akunookkala mumo. Pele nokwakainda buyo myezi yotatwe yakweendeenda, bubambe oobu bwakazoomana cakutayeeyela. Ndakalaililwa kunjila mulimo wabusikalumamba.

Ndakatola myezi iili 15 munkamu yabasikalumamba yamumaanzi yabana German. Aciindi eeco, mebo aba Laurie twakakwatana,  kumane twakalibambila kuzumanana amulimo wesu wakweendeenda. Kakusyeede buyo ciindi cisyoonto kuti ndinjile mulimo wabusikalumamba, ndakaulide bwato bwatakajisi zintu zyoonse ziyandika. Ciindi nondakali kubeleka mulimo wabusikalumamba, bwato oobo twakabupanga kuba bwato busyoonto bujisi zyoonse ziyandika kutegwa bube bwakweendela. Twakajisi makanze aakukkala mumonya oomo akuzumanana amulimo wakweendeenda kulanga-langa nyika eeyi mbotu. Cakali ciindi eeci—nondakaleka mulimo wabusikalumamba pele bwato kabutana mana kupangwa—notwakaswaigwa a Bakamboni ba Jehova akutalika kwiiya Bbaibbele.

Kumatalikilo tiindakali kuyeeya kuti ndakeelede kucinca mubuumi bwangu. Ndakamukwata mukaintu ngondakali kukkala limwi alimwi aciindi eeco, ndakalilekede kale kufweba. (Baefeso 5:5) Kweelana amakanze eesu akweendeenda munyika, ndakazooyeeya kuti ikubelesya buumi bwesu kwiinda mukulanga-langa zilenge zibotu, akali makanze mabotu kapati.

Mubwini, ndakali kuyandika kucinca—ikapati kujatikizya bube bwangu. Akaambo kakulisumpula cakuzwa munzila alimwi akulisyoma, ndakabikkila kapati maano kuzintu nzyondakali kukonzya kucita akuzuzikizya. Buumi bwangu bwakali bwakuliyanda.

Buzuba bumwi, ndakabala kujatikizya mulumbe wa Jesu waacilundu. (Matayo, caandano 5-7) Kumatalikilo tiindakali kumvwisya ncaakali kwaamba Jesu kujatikizya kuba alukkomano. Mucikozyanyo, wakaamba kuti lukkomano ndwabaabo bafwide nzala alimwi anyota. (Matayo 5:6) Ndakakatazyigwa akulibuzya kuti, ino muntu uuli mumapenzi inga wakkomana buti? Nondakazumanana kwiiya, ndakazoozyiba kuti toonse tulijisi nzala yakumuuya, pele tweelede kuzumina kuti tulijisi nzala katutanaimanizya. Eeci cileendelana ancaakaamba Jesu naakati: “Balikkomene aabo bazyi kuti bayandika zyintu zyakumuuya.”—Matayo 5:3.

Katutalikide kale Ciiyo ca Bbaibbele ku Germany, mebo aba Laurie twakalongela ku France, kwiinde ciindi twakaunka ku Italy. Kufwumbwa nkotwakali kuunka twakali kubajana Bakamboni ba Jehova. Ndakakkomana kapati kubona lukamantano alimwi aluyando lwini-lwini ndobajisi kuli umwi aumwi. Ndakabona kuti Bakamboni ncobeni mbabunyina banyika yoonse. (Johane 13:34, 35) Mukuya kwaciindi, mebo aba Laurie twakabbapatizigwa kuba Bakamboni ba Jehova.

Nondakabbapatizigwa, ndakazumanana kucinca bukkale bwangu. Mebo aba Laurie twakamvwana kweenda kuzwa kunkomwe yaku Africa mpoonya akuzabuka lwaanje lwa Atlantic Ocean kuya ku United States. Twakeenda mulwaanje katuli tobilo buyo, twakali kubona buyo maanzi koonse koonse, aciindi eeco ndendilyo nondakabona kuti mebo ndili kantu kasyoonto buyo ndalyeelanya a Mulengi wesu mupati. Mbokunga ndakajisi ciindi cinji, tiindakajisi zinji zyakucita mulwaanje mutwakabede, aboobo ndakajana ciindi cinji cakubala Bbaibbele. Ndakakkomana kapati kubala makani aamba zyabuumi bwa Jesu naakali anyika. Wakali muntu uulondokede iwakali kukonzya kucita zyoonse ziyandika, nokuba boobo, tanaakalisumpula pe. Mubuumi bwakwe tanaakacita nzyakali kuyanda mwini, pele wakacita kuyanda kwa Bausyi bakujulu.

Nindakazinzibala kuyeeya kujatikizya cikozyanyo ca Jesu, ndakabona kuti ncamaano kubikka Bwami bwa Leza mubusena bwakusaanguna mubuumi bwangu muciindi cakubikka ambele zintu nzyondakali kuyanda kucita. (Matayo 6: 33) Notwakasika ku United States, mebo aba Laurie twakamvwana kuti tukkale okuya akubikkila maano kubukombi bwesu.

Kandicili mubukkale bwangu bwakaindi bwakuliyanda, cakali kundikatazya kusala camaano. Nokuba boobo, lino ndilijisi kasensa kabusongo ikakonzya kundisololela. (Isaya 48:17, 18) Alimwi lino ndakazyiba kaambo ncotuponena—nkokuti kukomba Leza alimwi akugwasya bantu kwiiya zinji kujatikizya nguwe.

Kwiinda mukutobela njiisyo zyamu Bbaibbele, cikwati cesu cayuma kapati. Alimwi twalelekwa kuba amwana musimbi walo uumuyanda kapati Jehova.

Eeci tacaambi kuti buumi bwesu bwali buuba-uba lyoonse pe. Pele kwiinda mukugwasyigwa a Jehova, tukanzide kuzumanana kusyoma mulinguwe akutajoka musyule.—Tusimpi 3:5, 6.