Katanalenga bantu, Jehova wakalenga mamiliyoni aabangelo. (Jobu 38:4, 7) Bangelo aaba nzilenge zyamuuya zilaanguzu kapati zibelekela Leza, zimwi ziindi Leza ulabatuma bangelo kusololela alimwi akukwabilila babelesi bakwe anyika. (Intembauzyo 91:10, 11) Mazuba aano, bangelo bagwasyilizya bantu kutegwa bajane mpindu kumakani mabotu ngobakambauka basikutobela ba Jesu.—Amubale Ciyubunuzyo 14:6, 7.

Sena tweelede kupaila kubangelo kutegwa batugwasye? Peepe. Mupailo ncibeela cabukombi calo ceelede kupegwa buyo kuli Leza alikke. (Ciyubunuzyo 19:10) Mbwaanga bangelo mbabelesi ba Leza, batobela malailile aazwa kulinguwe ikutali kubantu pe. Aboobo, tweelede kugamika mipailo yesu kuli Leza alikke kwiinda muli Jesu.—Amubale Intembauzyo 103:20, 21; Matayo 26:53.

Mbubwenya mbuli bantu, bangelo bakalengwa anguzu zyakulisalila alimwi balakonzya kusala kucita ciluzi naa citaluzi. Cuusisya ncakuti, bangelo banji bakamuzangila Leza. (2 Petulo 2:4) Akati kabangelo aaba kwakali Saatani; bamwi bakamusangana akuba madaimona. Mumyaka misyoonto yainda, Saatani alimwi amadaimona aakwe bakatandwa kuzwa kujulu alimwi akuwaalwa anyika.—Amubale Ciyubunuzyo 12:7-9.

Kuyungizika kwabubi alimwi ankondo kuzwa mu 1914 ncitondezyo cakuti ino-ino Leza uyoomunyonyoona Saatani amadaimona aakwe. Kumane Leza uyoobambulula nyika kutegwa ibe mboyakabede kumatalikilo.—Amubale Ciyubunuzyo 12:12; 21:3, 4.