MAKANI AAYEEME AMUTWE UULI ACIVWUMBYO | LEZA MBWAKUBONA KUFWEBA
Penzi Lyanyika Yoonse
Kufweba kulajaya bantu cakuteengelela.
Kwakajaya bantu bali 100,000,000 mumwaanda wamyaka wainda.
Kulajaya bantu basika ku 6,000,000 amwaka.
Muntu omwe ulafwa akaambo kakufweba mutuvwalu-vwalu tuli cisambomwe tuli toonse.
Alimwi taakwe citondezya kuti kulakonzya kuba kucinca.
Beendelezi baamba kuti, ikuti bukkale buliko lino bwazumanana, kuzoosika mumwaka wa 2030, mweelwe wabantu ibafwa amwaka akaambo kakufweba uyakwiinda a 8,000,000. Alimwi bayeeyela kuti kuzoosika kumamanino amwaanda wamyaka wa 21, kufweba kunooli kwajaya bantu bali 1,000,000,000.
Aabo bafwa akaambo katombwe tabali buyo basikufweba. Balabikkilizya abanamukwasyi basyaala kabapona, ibapenga mumyoyo alimwi akubula mali alimwi akubikkilizya abantu bali 600,000 ibatafwebi ibafwa amwaka akaambo kakuyoya busi bwabasikufweba. Penzi eeli lilabajatikizya boonse nkaambo cipa kuti misamu kaidula.
Mukwiindana amalwazi alo bamadokota ngobasola kujanina musamu, penzi lyakufweba lilijisi musamu; alimwi musamu ulizyibidwe kabotu. Ba Margaret Chan, badokota alimwi bapati mukabunga ka World Health Organization bakaamba kuti: “Penzi lyakufweba lyakatalisyigwa abantu, alimwi lilakonzya kumanizyigwa kuti mfwulumende zyabelekela antoomwe abantu.”
Zisi zinji zyasola canguzu kumana penzi eeli. Mumwaka wa 2012, zisi izibalilwa ku 175 zyakazumina kuti zilabweza ntaamu yakucesya penzi eeli lyakufweba tombwe. * Nokuba boobo, kuli zintu zipa kuti kufweba tombwe kuzumanane. Mwaka amwaka, makkampani aapanga tombwe alabelesya mali manji kwaambilizya makwebo aabo kutegwa babe abasikufweba bapya, ikapati kuli bamakaintu alimwi abakubusi bakkala muzisi ziyaabusumpuka. Akaambo kakuti cilakatazya kuleka kufweba, eeci caamba kuti mbasyoonto bayoocileka kufweba akati kabantu basika kubbiliyoni yomwe ibafweba kale. Mweelwe wabantu ibafwa ulangilwa kuti ulazumanana kutanta mumyaka iili 40 iibola kuti naa bantu ibafweba lino tiibacileka kufweba.
Kwaambilizya makwebo alimwi akuba acizibilizi cakufweba, zyapa bantu banji kucegwa muciyanza ncobalombozya kuleka. Oobu mbocakabede kuli Naoko. Wakatalika kufweba naakacili mukubusi. Kwiiya ciyanza cakufweba mbocakali kutondezyegwa muli sikapepele, cakali kumupa kulimvwa kuti ulicenjede kapati. Nokuba kuti wakalibonena bazyali bakwe boonse bobilo mbobakafwa abulwazi bwakkansa, pele wakazumanana kufweba nociba ciindi naakali kukomezya bana bakwe basimbi bobilo. Wakaamba kuti: “Ndakali kulibilika kuti inga ndaba abulwazi bwakkansa alimwi akulibilika kujatikizya buumi bwabana bangu, nokuba boobo tiindakacileka. Ndakali kuyeeya kuti inga tiindacikonzya kuleka kufweba.”
Pele, Naoko wakacileka. Icakamukulwaizya kucileka ciyanza cakwe cakufweba nceeco icagwasya mamiliyoni aabantu kucileka kufweba. Ino lugwasyo oolo luzwa kuli? Twamulomba kuti muzumanane kubala.
^ par. 11 Ntaamu eezyi zibikkilizya kuyiisya bantu kujatikizya ntenda ziboola akaambo kakufweba, kucesya-cesya kwaambilizya makwebo aatombwe, kuyungizya mutelo watombwe, alimwi akubikka bubambe bwakugwasya bantu kucileka kufweba.
