Mulakonzya kulibuzya kuti, ‘Nkaambo nzi ncondeelede kupaila ikuti naa Leza ulizizyi kale nzyondiyeeya alimwi anzyondiyanda?’ Ooyu mubuzyo uli buyo kabotu, nkaambo Jesu wakaamba kuti Leza “ulizyi zyintu nzyomuyandika kamutana kumulomba.” (Matayo 6:8) Mwami Davida wamu Israyeli yansiku wakalaazyi makani aaya, aboobo wakalemba kuti: “Nkaambo taakwe ijwi lyalulimi lwangu ndotezi loko, O Jehova.” (Intembauzyo 139:4) Aboobo, nkaambo nzi ncotweelede kupaila kuli Leza? Kutegwa twiingule mubuzyo ooyu, atulange-lange Bbaibbele ncolyaamba kujatikizya mipailo yabakombi ba Leza. *

Nokuba kuti Bbaibbele lyaamba kuti Jehova * Leza ulizizyi zintu zyoonse, pele alimwi litondezya kuti tali buyo sikuyanda kuzyiba nzyobacita bakombi bakwe. (Intembauzyo 139:6; Baloma 11:33) Mizeezo yakwe iiteeli taili mbuli kkompyuta yalo iiyobola buyo makani aajatikizya muntu umwi aumwi. Masimpe, Leza ulazibikkila maano kapati zintu nzyotuyeeya nkaambo uyanda kuti tuswene kulinguwe. (Intembauzyo 139:23, 24; Jakobo 4:8) Nkakaambo kaako Jesu wakakulwaizya basikumutobela kuti kabapaila nokuba kuti Usyi ulizizyi nzyotuyandika. (Matayo 6:6-8) Ikuti naa twazumanana kumwaambila nzyotuyeeya Mulengi wesu, cilongwe cesu anguwe ciyooyuma.

Zimwi ziindi tulakonzya kwaalilwa kuzyiba cini ncotweelede kulomba mumupailo. Mubukkale buli boobu, Leza ulakonzya kuzyiba naaba makani ngotwataamba alimwi akubelesya luzyibo lwakwe lulondokede kujatikizya bukkale bwesu kutegwa atupe nzyotuyandika. (Baloma 8:26, 27; Baefeso 3:20) Ciindi notwazyiba kuti Leza watugwasya mubuumi bwesu, nomuba munzila iikatazya kuzyiba, cilongwe cesu anguwe cilayuma.

Ibbaibbele litusyomezya kuti Leza Singuzuzyoonse ulaingula mipailo yababelesi bakwe basyomeka, pele alimwi lilapa twaambo ncataiswiilili mipailo imwi. Mucikozyanyo, ciindi bujayi nobwakavwulide kapati mu Israyeli yansiku, Leza wakalailila musinsimi Isaya kwaambila bantu kuti: “Nekuba kuti mwakomba zikombyo zinji, nsikooyooswiilila. Maanza aanu alizwide bulowa.” (Isaya 1:15) Tacidoonekwi kuti aabo bataitobeli milawo ya Leza alimwi abaabo bapaila kabajisi makanze mabyaabi, Leza takonzyi kwiiswiilila mipailo yabo.—Tusimpi 28:9; Jakobo 4:3.

Kulubazu lumwi, Bbaibbele lyaamba kuti: “Kufwumbwa cintu ncotumulomba ceendelana akuyanda kwakwe, ulatumvwa.” (1 Johane 5:14) Pele sena eeci caamba kuti Leza uyakubapa zyoonse nzyobalomba babelesi bakwe akaambo buyo kakuti bamulomba? Peepe. Amulange-lange cikozyanyo camwaapostolo Paulo, walo ziindi zyotatwe iwakalomba Leza kuti amugwisye “bumvwa mumubili.” (2 Bakolinto 12:7, 8) Ambweni Paulo wakali kuciswa bulwazi bwameso butaponi. Kweelede kuti eeci cakali kumutyompya kaka! Paulo wakalipedwe cipego cakuponya bantu alimwi buya cimwi ciindi wakabusya muntu wakafwide, pele walo wakeelede kuliyumya kubulwazi mbwaakajisi. (Milimo 19:11, 12; 20:9, 10) Nokuba kuti mipailo yakwe tiiyakaingulwa kweelana ambwaakali kuyanda, Paulo wakalutambula lugwasyo lwa Leza.—2 Bakolinto 12:9, 10.

Masimpe, mipailo yabantu bamwi baambidwe mu Bbaibbele yakaingulwa camaleele. (2 Bami 20:1-7) Pele kwiingulwa munzila iili boobu tiikwakali kucitika-citika nokuba kaindi. Basyomi bamwi bakatyompwa ciindi nobakabona mbuli kuti Leza tainguli mipailo yabo. Mwami Davida wakabuzya kuti: “O Jehova, ulaleka lili kundiluba lyoonse?” (Intembauzyo 13:1) Pele ciindi Davida iwakali kusyomeka naakabona mbwaakali kugwasyigwa a Jehova, wakabukulusya lusyomo lwakwe muli Leza. Mumupailo nguwenya ooyo, Davida wakayungizya kuti: “Mebo ndasyoma luzyalo lwako.” (Intembauzyo 13:5) Mbubwenya mbuli Davida, bakombi ba Leza mazuba aano inga bayandika kuzumanana kupaila kusikila mane Leza akaingule mipailo yabo.—Baloma 12:12.

Leza ulatupa zintu nzyotuyandika ncobeni.

Akaambo katwaambo tumwi, bazyali ibabikkila maano talili lyoonse nobabapa bana babo zintu nzyobalomba aciindi nciconya eeco. Mbubwenya buyo, awalo Leza ambweni inga takonzyi kwiingula kulomba kwesu munzila njotuyeeyela naa aciindi ncotuyanda. Pele tulijisi lusyomo lwakuti Mulengi wesu, mbubwenya mbuli usyi siluyando, uyootupa zintu nzyotuyandika ncobeni aciindi ceelede alimwi amunzila yeelede.—Luka 11:11-13.

Leza ulakonzya kwiingula mipailo yesu munzila iikatazya kuzyiba.

Pele ino mbuti kuti katupailila kuti tugwasyigwe kupenzi limwi lyatola ciindi cilamfwu kalitamani? Sena tweelede kuyeeya kuti Jehova taaingula mipailo akaambo kakuti kunyina naatwiingula munzila yamaleele? Muciindi caboobo, tweelede kubona naa Leza waingula mipailo yesu munzila njotutakonzyi kuzyiba. Mucikozyanyo, ambweni mulongwe uubikkila maano wakacita zyoonse nzyaakali kukonzya kucita kutegwa atugwasye aciindi ceelede. (Tusimpi 17:17) Sena cileelela kwaamba kuti Jehova ngowatuma mulongwe ooyo kutugwasya? Kuyungizya waawo, bwiinguzi bwa Leza kumipailo yesu bulakonzya kuzwa mu Bbaibbele. Mulindilyo tulajana busongo mbotuyandika kutegwa tuliyumye mubukkale bukatazya.—2 Timoteyo 3:16, 17.

Muciindi cakuligusya penzi litugeme, kanji-kanji Leza ulabapa bantu bakwe nguzu ziyandika kutegwa bakonzye kuliyumya. (2 Bakolinto 4:7) Mucikozyanyo, ciindi Jesu naakalomba Bausyi kuti bagwisye penzi ndyaakajisi, kayoowede kuti lilakonzya kuleta masampu kuzina lya Leza, Jehova wakatuma mungelo kuyumya-yumya Mwanaakwe. (Luka 22:42, 43) Mbubwenya buyo, Leza ulakonzya kubelesya mulongwe ngomumvwana kapati kumukulwaizya. (Tusimpi 12:25) Akaambo kakuti bwiinguzi buli boobu bulakatazya kuzyiba, tweelede kubikkila kapati maano kuzyiba nzila Leza nzyabelesya kwiingula mipailo yesu.

Mipailo imwi iingulwa buyo aciindi ncabikkide Leza.

Ibbaibbele lyaamba kuti Leza Singuzuzyoonse ulatondezya luse kubantu balicesya “kuciindi ceelede.” (1 Petulo 5:6) Aboobo, ciindi nocalibonya mbuli kuti Leza wamuka kwiingula mipailo yesu iizwa aansi amoyo, tatweelede kuyeeya kuti Jehova tatulanganyi. Muciindi caboobo, mbwaanga Mulengi wesu siluyando ulizyi zintu zyoonse kwiinda mbotuzizyi, tacidoonekwi kuti ulakulanga-langa kulomba kwesu munzila njabona kuti ilakonzya kutugwasya.

Mucikozyanyo: Amweezyeezye kuti mujisi mwana musankwa uulomba kuti mumuulile ncinga. Sena inga mwamuulila ncinga eeyo mbwaamanina buyo kumulomba? Ikuti mwabona kuti mwanaanu takonzyi kwiilanganya kabotu ncinga, inga mwasala kutamuulila aciindi eeco. Aboobo mukuya kwaciindi, ikuti mwabona kuti cileelela kumuulila ncinga, inga mwacita oobo. Mbubwenya buyo, awalo Leza ulakonzya kutupa ‘nzyouyanda moyo wesu’ aciindi ceelede kuti twazumanana kupaila.—Intembauzyo 37:4.

Ibbaibbele likulwaizya Banakristo bakasimpe kuzumanana kubona kuti mupailo ulayandika. Bamwi balakonzya kwaamba kuti ‘eeci ncuuba kwaamba kwiinda kucita.’ Masimpe, ikuti naa twali kuliyumya kupenzi limwi naa kudyaamininwa, cilakonzya kutuyumina kulindila kuti Leza aingule. Nokuba  boobo, amuyeeye kuti Jesu wakatuyiisya kuti tweelede kuzumanana kupaila.

Jesu wakapa cikozyanyo camukamufwu mucete walo iwakazumanana kuunka kumubetesi mubyaabi kuti amukoswede makani aakwe cabululami. (Luka 18:1-3) Nokuba kuti mubetesi ooyu kumatalikilo wakakaka kumugwasya, kumamanino wakalyaambauzya, ategwa: “Ndilamukosweda cabululami makani aakwe ikutegwa atazumanani kuboola akundikatazya akulomba kwakwe kutamani.” (Luka 18:4, 5) Ikuti mubetesi mubyaabi wakagwasya mukamufwu mucete akaambo kakuyoowa kuti mpuwo yakwe ilabija, nkokuti Leza walo uutubikkila maano uyoobacitila cakululama aabo “bamukwiilila isyikati amasiku.” Mbubwenya mbwaakaamba Jesu, Leza “uyoobona kuti bakoswedwa makani cabululami cakufwambaana.”—Luka 18:6-8.

Nokuba kuti zimwi ziindi tulakonzya kukatala kulomba lugwasyo, tatweelede kucileka pe. Kwiinda mukuzumanana kupaila, tutondezya kuti tuyandisisya ncobeni kuti Leza katugwasya mubuumi bwesu. Alimwi tulazyiba Leza mbwaingula mipailo yesu calo citupa kuswena kulinguwe. Aboobo, tulakonzya kuba alusyomo lwakuti Jehova uyakwiingula mipailo yesu ikuti twazumanana kumulomba calusinizyo.—Luka 11:9.