Mumwaka wa 33 C.E., Jesu wakafwa, akubuka kuzwa kubafwu, mpoonya wakaunka kujulu. Mukuya kwaciindi, Jesu wakapegwa nguzu zyakweendelezya kali Mwami. (Daniele 7:13, 14) Kumbele, Jesu kali Mwami uyoobweza ntaamu yakuleta luumuno anyika alimwi akumana bucete.—Amubale Intembauzyo 72:7, 8, 13.

Jesu uyoocita zintu zibotu kapati kali Mweendelezi wabantu. Uyoobelesya nguzu nzyobakamupa Bausyi kupa kuti bantu balondoke. Bayookkomana abuumi anyika kakunyina kucembaala alimwi akufwa.—Amubale Johane 5:26-29; 1 Bakolinto 15:25, 26.

Jesu lino usololela mulimo wakukambauka munyika yoonse uucitwa abasikumutobela bakasimpe. Balabaswaya bantu kutegwa babatondezye ncolyaamba Bbaibbele kujatikizya Bwami bwa Leza. Jesu wakaamba kuti wakali kuyoozumanana kugwasyilizya mumulimo ngobacita basikwiiya bakwe kusikila Bwami bwa Leza bukagwisye mfwulumende zyabantu.—Amubale Matayo 24:14; 28:19, 20.

Kwiinda mumbungano ya Bunakristo yakasimpe, Jesu usololela bantu kubuumi bubotu. Uyoozumanana kubasololela kuya munyika mpya njaakasyomezya Leza bwaakunyonyoonwa bweende bwazintu oobu.—Amubale 2 Petulo 3:7, 13; Ciyubunuzyo 7:17.