MAKANI AAYEEME AMUTWE UULI ACIVWUMBYO: INO BBAIBBELE LIJISI MULUMBE NZI?

Nkaambo Nzi Ncomweelede Kulikkomanina Bbaibbele?

Bbaibbele ndebbuku lizyibidwe kapati nyika yoonse. Nkaambo nzi? Akaambo kakuti talikatazyi kumvwisya. Lijisi makani aakacitika ncobeni alimwi lilaamba bantu mbobakali kweendelezyanya balo, alimwi a Leza mbwakali kubeendelezya. Zibalo eezyi zilayiisya kubelesya majwi aatakatazyi kumvwisya, aakonzya kusandululwa mumyaambo minji alimwi akumvwugwa abantu bali boonse aciindi cili coonse. Alimwi njiisyo zili mu Bbaibbele zilabeleka lyoonse.

Kaambo kapati nkakuti Bbaibbele talili buyo bbuku lyaamba zya Leza, pele ndibbuku lyakazwa kuli Leza. Lilaamba zyina lya Leza, mbwabede, alimwi amakanze aakwe aatacinci kujatikizya nyika abantu. Alimwi Bbaibbele lilaamba kujatikizya Saatani mbwaali kulwana Jehova kwaciindi cilamfwu. Mpoonya lilaamba Jehova mbwayootondezya kuti Saatani taluzi alimwi abubi mbobuyoomana. Kubala Bbaibbele katujisi mizeezo iili kabotu cipa kuti tube alusyomo alimwi abulangizi.

Mu Bbaibbele tujana makani ngotutakonzyi kujana kumbi. Mucikozyanyo, Bbaibbele lilatwaambila makani aamasimpe kujatikizya twaambo mbuli tootu:

▪ Nkotwakazyila alimwi akaambo ncotupenga

▪ Bubambe bwa Leza bwakunununa bantu

▪ Zyintu nzyaatucitila Jesu

▪ Mboiyooba nyika kumbele alimwi abantu

Tumukulwaizya kuvwununa mapeeji aatobela akulanga-langa mulumbe uuli mu Bbaibbele.

[Cifwanikiso icili apeeji 3]

[Kabbokesi kali apeeji 3]

MAKANI MUBUFWAAFWI AAJATIKIZYA BBAIBBELE

Mutwe: Bwami bwa Leza bwakujulu mbobuyooleta bululami alimwi aluumuno anyika

Zili Mukati: Mabbuku aali 39 ali mu Chihebrayo (azibalo zimwi mu Chiaramu) alimwi aali 27 ali mu Chigiliki

Kulembwa: Lyakalembwa abantu bali 40 mumyaka iibalilwa ku 1,600, kutalikila mu 1513 B.C.E. kusikila kuma 98 C.E.

Myaambo: Lino lilisandulwidwe, lyoonse naa cibeela buyo mumyaambo iinda ku 2,500