“Leza Uyanda Muntu Uupa Kumwi Kakkomene”
AMUBE ACILONGWE A LEZA
“Leza Uyanda Muntu Uupa Kumwi Kakkomene”
Ino ncipego cili buti cikonzya kumupa kukkomana kapati? Cakutadooneka bunji bwesu tulakonzya kukkomana kutambula cipego kuzwa kumuntu waliyandila kutupa, ikutali buyo kuzuzikizya mulawo. Caboola kumakani aakupa, makanze aatupa kupa cintu, alaakaambo kulindiswe, ikapati kuli Leza. Amulange-lange majwi aamwaapostolo Paulo aakasololelwa amuuya aalembedwe mulugwalo lwa 2 Bakolinto 9:7.
Nkaambo nzi Paulo ncaakalembela majwi aaya? Wakali kuyanda kukulwaizya Banakristo baku Korinto kuti batole lubazu mumulimo wakugwasya basyominyina bakapengede baku Judaya. Sena wakabasinikizya bana Korinto kupa? Muciindi caboobo, wakalemba kuti: “Umwi aumwi acite mbuli mbwaasala mumoyo wakwe, ikutali kupa kumoyo kakusiide naa cakusinikizyigwa, nkaambo Leza uyanda muntu uupa kumwi kakkomene.” Atwaalange-lange majwi aaya.
“Mbuli mbwaasala mumoyo wakwe.” Paulo wakaamba kuti Munakristo wakasimpe ulapa akaambo kakuti wasala “mumoyo wakwe” kucita oobo. Aciindi nciconya, Munakristo ulayeeyesya kujatikizya nzyobayandika bakombinyina. Umwi syaazibwene wakaamba kuti bbala lyamumwaambo wakusaanguna lyaambwa kuti “mbwaasala,” “lijisi muzeezo wakuba amakanze.” Aboobo Munakristo ulayeeyesya kujatikizya nzyobayandika basyominyina alimwi akujana nzyakonzya kucita kutegwa abagwasye.—1 Johane 3:17.
“Ikutali kupa kumoyo kakusiide naa cakusinikizyigwa.” Paulo waamba misyobo yobilo yakupa njobateelede kucita Banakristo bakasimpe—kumoyo kakusiide alimwi cakusinikizyigwa. Bbuku limwi lipandulula kuti, muntu uupa kumoyo kakusiide naa cakusinikizyigwa ulapa “amoyo uuside akaambo kakuzyiba kuti lino mali aunka.” Muntu uupa cakusinikizyigwa ulapa akaambo kakuti ulimvwa kuti ino ndicite buti. Nguni akati kesu uuyanda kutambula cipego kuzwa kumuntu wasinikizyigwa buya?
“Leza uyanda muntu uupa kumwi kakkomene.” Paulo wakaamba kuti Munakristo ayanda kupa, weelede kucita oobo kumwi kakkomene. Mubwini, lukkomano lulaboola akaambo kakupa kumwi kamujisi makanze mabotu. (Milimo 20:35) Muntu uupa kumwi kakkomene, ulalibonya. Ncobeni, bbala lyakuti “kakkomene” lilakonzya kwaamba muntu mbwalimvwa alimwi ambwaboneka. Muntu uupa kumwi kakkomene ulatukkomanisya, alimwi ulamukkomanisya Leza. Busanduluzi bumwi bwaamba kuti: “Uupa calumwemwe nguuyandwa kwa-Leza.”—BIT.
Majwi amwaapostolo Paulo aakasololelwa amuuya alatugwasya kuzyiba mbwayelede kupa Munakristo. Kufwumbwa naa tubelesya ciindi cesu, nguzu, naa zyintu nzyotujisi, atucite oobo akaambo kakuliyandila alimwi akaambo kakuti tulakkomana ikuba baabi, ikapati kubantu bapengede. Kupa kuli boobo takutupi buyo kukkomana, pele alimwi kutupa kumvwana a Leza, nkaambo “uyanda muntu uupa kumwi kakkomene.”
Magwalo Aamu Bbaibbele Aasalidwe Kubalwa mu September
[Majwi aakwelelezya sikubala aali apeeji 13]
“Uupa calumwemwe nguuyandwa kwa-Leza”
