IBBAIBBELE LILAKONZYA KUBACINCA BANTU

“Ndakatalika kuyeeyesya kapati kujatikizya buumi bwangu bwakumbele”

Akaluulwa aba Allan Hancock

MWAKA WAKUZYALWA: 1941

KUCISI NKWAZWA: AUSTRALIA

MBWAAKABEDE KAINDI: KUFWEBA, KUNYWA KAPATI BUKOKO

MBONDAKABEDE KAINDI: Ndakakomenena ku Warialda, kadolopo kasyoonto kali mu New South Wales. Ku Warialda kuli milimo yabulimi iindene-indene, balavwuba mbelele, ŋombe, alimwi balalima maila, azisyango zimwi. Idolopo eeli talijisi tombe pe, alimwi bugwebenga mbusyoonto.

Mbokunga ndime mupati akati kabana bali 10, ndakatalika kubeleka kandili amyaka iili 13 yakuzyalwa kutegwa ndijane ziyandika zyamukwasyi. Mbokunga tiindakaiya kapati, ndakatalika kubeleka mumafaamu. Nondakaba amyaka iili 15 yakuzyalwa, ndakazooba mweembezi wazivwubwa, akuyiisya mabbiza.

Kwakali bubotu abubi mbondakajana nondakali kubelekela afaamu. Mulimo ooyu abusena zyakali kundibotela. Ndakali kukkala acuuno masiku kumwi kandiyota mulilo akweebelela mwezi anyenyeezi kujulu alimwi kandimvwide kununkilila kwamaluba-luba. Ndakali kulyaambauzya kuti kweelede kuti kuli Muntu wakalenga zyintu eezyi zibotu. Kulubazu lumwi, afaamu mpondakali kubeleka kwakali bantu batakali kulilemeka. Ziindi zinji ndakali kumvwa bantu kabaamba majwi mabi, alimwi cakali cuubauba kujana tombwe. Tiikwakainda ciindi andime ndakatalika kufweba alimwi akwaamba majwi mabi.

Nindakaba amyaka iili 18 yakuzyalwa ndakalongela ku Sydney. Ndakali kuyanda kunjila mulimo wabusikalumamba pele bakandikakila akaambo kakuti tiindakayiide. Ndakajana mulimo alimwi ndakakkala mudolopo lya Sydney mwaka omwe. Eeci nceciindi cakusaanguna ncondakaswaigwa a Bakamboni ba Jehova. Ndakazumina nobakanditamba kuyoojanika kumiswaangano yambungano, alimwi mpoonya-mpoonya ndakazyiba kuti nzyobakali kuiisya zyakali zyamasimpe.

Pele tiilyakalampa, ndakajokela kumafaamu. Ndakaakulijana mudolopo lya Goondiwindi, Queensland. Ndakajana mulimo, alimwi ndakakwata, pele mukubula coolwe ndakatalika kunywa bukoko.

Twakaba abana bobilo. Kuzwa ciindi nobakazyalwa bana, ndakatalika kuyeeyesya kapati kujatikizya buumi bwangu  bwakumbele. Ndakayeeya nzyondakamvwa kumuswaangano waba Kamboni ku Sydney, mpoonya ndakabona kuti ndeelede kucinca.

Ndakajana Ngazi Yamulindizi yakaindi, yakajisi kkeyala yaofesi yamutabi wa Bakamboni ba Jehova ku Australia. Ndakalemba lugwalo kulomba lugwasyo. Kweelana akulomba kwangu, kwakaboola Kamboni umwi siluse alimwi siluyando. Tiilyakalampa, wakatalika kundiyiisya Bbaibbele.

IBBAIBBELE MBOLYAKANDICINCA: Nondakali kuyaabwiiya Bbaibbele, ndakabona kuti ndakeelede kucinca buumi bwangu. Lugwalo ilwakandisika amoyo, ndugwalo lwa 2 Bakolinto 7:1. Kapango aaka katukulwaizya kuti ‘tulisalazye kuzyintu zyoonse zisofwaazya mubili amuuya.’

Ndakayeeya kuti ndileke kufweba alimwi akunywa bukoko cakuciindizya. Tiicakali cuubauba kucinca, nkaambo kwaciindi cilamfwu cakali ciyanza cangu cakufweba akunywa. Pele ndakali kuyandisisya kupona buumi bumukkomanisya Leza. Ndakagwasyigwa kapati akaambo kakutobela njiisyo iili mulugwalo lwa Baloma 12:2: lwaamba kuti “Amuleke kutobela ziyanza zyabweende bwazyintu obuno, pele amusandulwe kwiinda mukucinca mizeezo yanu.” Ndakabona kuti kutegwa ndileke ziyanza zyangu zibi, ndakeelede kucinca mizeezo yangu alimwi akuzibona ziyanza eezyi mbuli mbwazibona Leza kuti tazili kabotu. Kwiinda mulugwasyo oolu ndakacileka kufweba akuciindizya kunywa bukoko.

Nokuba boobo, kuleka kwaamba majwi mabi ncecintu cakandiyumina kapati. Ndakaliluzyi lulayo lwamu Bbaibbele lujanika mulugwalo lwa Baefeso 4:29 lwaamba kuti: “Kutazwi jwi libolede neliba lyomwe mukanwa mwanu.” Nokuba boobo, tiindakafwambaana kuleka kwaamba majwi mabi. Cintu cakandigwasya nkuzinzibala kuyeeya majwi aajanika mulugwalo lwa Isaya 40:26. Kujatikizya julu lijisi nyenyeezi, kapango aaka kaamba kuti: “Amuululale mubone kujulu. Ezi zyoonse nguni wakazilenga? Ulapozya makamu aazyo cakubala mweelwe wazyo. Zyoonse buyo ulaziita mazina. Mubupati bwakwe bugambya, mbwali singuzu, taakwe niiba yomwe iibulika.” Ndakatalika kuyeeya kuti, ikuti Leza kajisi nguzu zyakulenga bubumbo bupati oobu—mbondakali kuyandisya kweebelela—masimpe wakali kukonzya kundipa nguzu zyakuti ndicince kutegwa ndimukkomanisye. Kwiinda mumupailo buce-buce ndakatalika kwaambaula munzila iili kabotu.

MBONDAGWASYIGWA: Mbokunga ndakali mweembezi, tiindakajisi coolwe cakwaambaula abantu banji, nkaambo bantu bakali basyoonto afaamu mpondakali kubelekela. Nokuba boobo, kwiinda mulwiiyo ndondakapegwa kumiswaangano ya Bakamboni ba Jehova, ndaiya mbondeelede kwaamba majwi mabotu. Cimwi ncakuti, lwiiyo ndondakapegwa lwakandigwasya kuti kandaambila bantu makani mabotu aa Bwami bwa Leza.—Matayo 6:9, 10; 24:14.

Kwamyaka iili mbwiibede, ndilikkomene kubeleka kandili mwaalu mumbungano. Ndicibona kuba coolwe cipati kucita cili coonse ncendikonzya kutegwa ndigwasye bakombima. Aboobo, cileleko cipati ncondijisi ncakubelekela Jehova antoomwe amukaangu uusyomeka alimwi mubotu moyo alimwi abana besu babotu.

Ndilamulumba Jehova akaambo kakundipa coolwe cakuyiisyigwa anguwe nokuba kuti tandiiyide kapati. (Isaya 54:13) Ndilaazumina majwi aali mulugwalo lwa Tusimpi 10:22, aamba kuti: “Lulongezyo lwa-Jehova lulavubya.” Mebo amukwasyi wangu tulangila kwiiya zinji kumbele kujatikizya Jehova akumubelekela kukabe kutamani.

[Majwi aakwelelezya sikubala aali apeeji 9]

“Ndakabona kuti kutegwa ndileke ziyanza zyangu zibi, ndakeelede kucinca mizeezo yangu”