Musa Muntu Wakali Aaluyando

INO LUYANDO NINZI? Luyando lubikkilizya kubabikkila maano kapati bantu. Muntu uujisi luyando ulalitondezya mbwalimvwa kubantu aabo mbayanda kwiinda mumajwi aakwe amumicito, noliba leelyo nokuyandika kulyaaba kucita boobo.

INO MUSA WAKALUTONDEZYA BUTI LUYANDO? Musa wakatondezya kuti ulamuyanda Leza. Munzila nzi? Amuyeeye majwi aalembedwe kuli 1 Johane 5:3 aakuti: “Nkaambo kuyanda Leza caamba kuti katubamba milawo yakwe; alimwi buya milawo yakwe tiiminyi.” Mbwaanga Musa wakali kumuyanda Leza, wakaitobela milawo yakwe. Zyintu zyoonse Leza nzyaakamwaambila kuti acite—kutalikila kumulimo uuyoosya alimwi uukatazya wakusikila Farao singuzu kusikila kumulimo wakali kulibonya mbuli kuti taukatazyi iwakutandabikka nkoli yakwe a Lwizi Lusalala—Musa wakazicita zyoonse. Kufwumbwa naa malailile akali mauba-uba naa akali kukatazya kwaazuzikizya, Musa wakaatobela. “Musa wakacita obo.”—Kulonga 40:16.

Musa wakatondezya luyando kubana Israyelinyina. Bakazyiba kuti Jehova wakali kubelesya Musa kusololela bantu bakwe, aboobo bakali kumwaambila Musa mapenzi woonse ngobakajisi. Tubala kuti: ‘Bantu bakaliimvwi kunembo lya Musa kuzwa cifumofumo kusikila igoko.’ (Kulonga 18:13-16) Amuyeeye buyo mbwaakali kukatala Musa amana kuswiilila bana Israyeli kabamwaambila mapenzi aabo buzuba boonse. Pele Musa wakali kubayanda bantu, aboobo wakali kukkomana kubagwasya.

Kunze lyakubaswiilila, Musa alimwi wakali kubapailila bayandwa bakwe. Mane wakabapailila aabo bakali kumupenzya. Mucikozyanyo, ciindi Miriamu, mucizyi wa Musa, naakatongooka kujatikizya Musa, Jehova wakamupa kuti aciswe cinsenda. Muciindi cakukondwa akaambo kacisubulo ncaakapegwa Miriamu, Musa cakufwambaana wakamukombelezyezya kuli Leza kwiinda mumupailo naakati: “O Leza, aponesyegwe!” (Myeelwe 12:13) Luyando lulikke ndolwakapa kuti Musa apaile mupailo uuli boobu.

INO TWIIYA NZI? Tulakonzya kumwiiya Musa kwiinda mukuyanda Leza kuzwa ansi amoyo. Luyando luli boobu lutupa kumvwida milawo yakwe “kuzwa ansi amoyo.” (Baloma 6:17) Ikuti twamumvwida Jehova kuzwa ansi amoyo, tumupa kukondwa mumoyo wakwe. (Tusimpi 27:11) Alimwi tulagwasyigwa. Kayi, ikuti twamubelekela Leza akaambo kaluyando lwini-lwini kulinguwe, tatukaciti buyo zyintu ziluzi, pele alimwi tuyookkomana kuzicita!—Intembauzyo 100:2.

Nzila imwi motukonzya kumwiiya Musa nkwiinda mukuba aluyando lwakulyaaba kulibamwi. Ciindi balongwe naa bamukwasyi nobatwaambila mapenzi aabo, luyando luyootupa (1) kubabikkila maano kuzwa ansi amoyo; (2) kubeetelela, naa kulimvwa mbobalimvwa; alimwi (3) akubatondezya kuti tulababikkila maano.

Mbubwenya mbuli Musa, tulakonzya kubapailila bayandwa besu. Zimwi ziindi tulatyompwa kubona kuti tatukonzyi kubagwasya kumapenzi ngobatwaambila. Ambweni tulakonzya kwaamba kuti, “Cabija kuti cilikke ncondikonzya kucita nkumupailila buyo.” Pele kamuyeeya: “Mupailo wakukombelezya wamuntu mululami uli anguzu kapati alimwi ulabeleka.” (Jakobo 5:16) Mipailo yesu inga yapa kuti Jehova amucitile cintu cimwi muntu ooyo, calo ncaatali kukonzya kumucitila. Aboobo, cintu ciinda kubota ncotukonzya kubacitila bayandwa besu nkubapailila. *

Sena tamuzumini kuti nzinji nzyotunga twaiya kuli Musa? Nokuba kuti wakali muntu buyo, wakasiya cikozyanyo calusyomo, kulicesya, alimwi aluyando. Ikuti twaiya cikozyanyo cakwe, tuyoogwasyigwa kapati alimwi akugwasya bambi.—Baloma 15:4.

[Bupanduluzi buyungizidwe]