Musa Muntu Wakali Aalusyomo

INO LUSYOMO NINZI? Kweelana ambolwaambidwe mu Bbaibbele, “lusyomo” lubikkilizya lusinizyo luyeeme aabumboni bukkwene. Muntu uujisi lusyomo muli Leza ulisinizyide kuti Leza uyoozizuzikizya zisyomezyo zyakwe zyoonse.

INO MUSA WAKALUTONDEZYA BUTI LUSYOMO? Buumi bwa Musa bwakatondezya kuti wakajisi lusyomo muzisyomezyo zya Leza. (Matalikilo 22:15-18) Wakalijisi coolwe cakupona buumi bubotu alimwi akuba azyakulikondelezya zinji mu Egepita, pele wakacilanga buyo coolwe eeco ‘akusala kupenzyegwa antoomwe abantu ba Leza muciindi cakulikkomanisya acibi muzyakulikondelezya zyakaindi kaniini buyo.’ (Bahebulayo 11:25) Sena wakafwambaana kusala cakuti wakali kuyoousa kumbele? Peepe, nkaambo Bbaibbele lyaamba kuti Musa “wakazumanana kuzyandamana mbuli kuti wakali mubwene Ooyo uutalibonyi.” (Bahebulayo 11:27) Musa taakwe naakausa akaambo kakusala nkwaakasala kuyeeme mulusyomo lwazisyomezyo zya Leza.

Musa wakayumya lusyomo lwabamwi. Mucikozyanyo, amulange-lange cakacitika ciindi bana Israyeli nibakayeeya kuti basinkilwa akati kampi ya Farao alimwi a Lwizi Lusalala. Akaambo kakuyoowa ntenda yakali kulibonya mbuli kuti iyanda kubacitikila, bana Israyeli bakakwiilila Jehova alimwi a Musa. Ino Musa wakacita buti?

Ambweni Musa tanaakalizyi kuti Leza wakali kuyanda kwaandaanya Lwizi Lusalala kutegwa abajalwide nzila bana Israyeli. Nokuba boobo, Musa wakajisi lusyomo lwakuti Leza ulacita cintu cimwi kutegwa akwabilile bantu bakwe. Alimwi Musa wakali kuyanda kuti abalo bana Israyelinyina babe alusyomo mbuli nguwe. Tubala kuti: “Musa wakaambila bantu kuti: ‘Mutayoowi, amwiime, mubone lufutuko Jehova ndwasi mucitile buzuba obuno.’” (Kulonga 14:13) Sena Musa wakacikonzya kubagwasya bana Israyeli kuyumya lusyomo lwabo? Tacidoonekwi nkaambo Bbaibbele lyaamba boobu kujatikizya Musa alimwi abana Israyeli boonse: “Akaambo kalusyomo bakainda mu Lwizi Lusalala mbuli kuti bakali kwiinda anyika njumu.” (Bahebulayo 11:29) Lusyomo lwa Musa lwakagwasya kutali buyo nguwe alikke pe, pele abaabo boonse ibakamwiiya.

INO TWIIYA NZI? Tulakonzya kumwiiya Musa kwiinda mukubikkila maano kuzisyomezyo zya Leza. Mucikozyanyo, Leza usyomezya kutupa nzyotuyandika zyakumubili ikuti bukombi bwesu twabubikka mubusena bwakusaanguna mubuumi bwesu. (Matayo 6:33) Masimpe, tulakonzya kuyungwa amuuya wakubikkila maano zyintu zyakumubili nkaambo bantu banji mbobacita. Pele tulakonzya kuba masimpe kuti ikuti naa twasoleka canguzu kuubya-ubya buumi bwesu akubikkila maano kubukombi bwesu, Jehova uyootupa zyoonse nzyotuyandika. Usyomezya kuti: “Ziyume zitete, tandikakusiyi pe alimwi tandikakulekelezyi pe.”—Bahebulayo 13:5.

Alimwi tulasola kugwasya bamwi kuti bakomene mulusyomo. Mucikozyanyo, bazyali basongo balizyi coolwe cipati ncobajisi icakugwasya bana babo kuba alusyomo muli Leza. Mbobayaabukomena, bana bayandika kuzyiba kuti Leza nkwali ncobeni alimwi akuti ulatuyiisya kuzyiba cibi acibotu. Kuyungizya waawo, bazyali beelede kusinizya kuti bana balamvwisya akusyoma kuti ikutobela zyeelelo zyakwe njenzila iinda kubota. (Isaya 48:17, 18) Bazyali bapa bana babo cipego cilibedelede ciindi nobabagwasya kusyoma kuti Leza “nkwali ncobeni akuti uba sikupa bulumbu kuli baabo bamuyandaula cabusungu.”—Bahebulayo 11:6.