Nkaambo nzi Ncotweelede Kupona Kweelana Azyeelelo Zyamu Bbaibbele?
Nkaambo nzi Ncotweelede Kupona Kweelana Azyeelelo Zyamu Bbaibbele?
SENA ncolyaamba Bbaibbele kujatikizya makani aakoonana tacicibeleki alimwi taciyandiki kutobela? Peepe. Mukwiimpana, ncolyaamba Bbaibbele kujatikizya makani aakoonana cilakonzya kutugwasya kweeleba:
▪ Malwazi aayambukila kwiinda mukoonana
▪ Kumitila musyokwe
▪ Mapenzi aaboola akaambo kakumana kwazikwati
▪ Kukatazyigwa amanjezyeezya
▪ Kulimvwa kubula mpindu akaambo kakubelesyegwa abamwi bayanda buyo kulikkomanisya
Mulengi wesu, Jehova Leza, * uyanda kuti katukkomene alimwi akugwasyigwa kwiinda mukubelesya zipego zyakwe. Leza ‘nguutuyiisya kuti tugwasigwe.’ (Isaya 48:17) Muntu uutobela malailile aamu Bbaibbele kujatikizya makani aakoonana ulajana mpindu ya:
▪ Kukkomaninwa a Leza
▪ Kuliiba mumizeezo
▪ Kumvwana mumukwasyi
▪ Kuba ampuwo mbotu
▪ Kulemekwa
Pele, ino kuti cino ciindi kamutaponi kweelana azyeelelo zyamu Bbaibbele zyakulilemeka? Sena cilakonzyeka kuti inga mwacinca bukkale bwanu? Sena Jehova uyoomubeteka akaambo kamicito yanu yakaindi?
Amuyeeye kaambo aaka: Bamwi bakali mumbungano Yabunakristo yamumwaanda wamyaka wakusaanguna bakali basibwaamu, basimamambe, alimwi bakali koonana abaaluminyina naa abamakaintunyina. Bakasala kuleka micito yabo, alimwi bakalongezyegwa citaambiki. (1 Bakolinto 6:9-11) Mazuba aano, zyuulu zyabantu munyika yoonse mboizulwa basala kucita mbubonya oobo. Baileka micito yakutalilemeka aboobo balongezyegwa akaambo kakupona kweelana azyeelelo zyamu Bbaibbele. Mucikozyanyo, amubone cakacitikila ba Sarah, ibaambwa mucibalo cakusaanguna.
“Mpoonya-mpoonya Ndakalimvwa Kulemununwa”
Ba Sarah wakazoozyiba kuti buumi bwabo mbobakali kupona bwakutalilesya tiibwakabaletela lwaanguluko akukkutila nkobakali kuyanda. Bakaamba kuti: “Ndakalimvwa kuti manjezyeezya aangu akaleka kubeleka. Ndakafwa nsoni alimwi ndakali kulibilika kuti inga ndamita naa kuciswa bulwazi bubyaabi. Kunyina nindakaleka kusyoma kuti Leza nkwali, alimwi ndakalizyi kuti buumi bwangu tiibwakali kumukkomanisya. Ndakalimvwa kuba atombe, alimwi cakali kundikatazya mumizeezo.”
Mukuya kwaciindi, ba Sarah bakacikonzya kucinca bukkale bwabo. Bakalomba lugwasyo kubazyali babo Bakamboni ba Jehova. Alimwi bakalomba lugwasyo kuzwa kubaalu Banakristo bamumbungano mobakabede. Ba Sarah bakaamba kuti: “Ndakagambwa mbobakandifwida lubomba aluyando bazyali bangu alimwi abaalu bamumbungano. Mpoonya-mpoonya ndakalimvwa kulemununwa.”
Mazuba aano, ba Sarah bajisi bana bobilo. Ba Sarah bakaamba kuti: “Cakutainda mumbali, ndilabaambila bana bangu kujatikizya zyintu nzyondakali kucita. Ndiyanda kuti bazyibe mbondakajatikizigwa akaambo kakutatobela zyeelelo zya Leza. Makanze aangu ngakubagwasya kuzyiba kuti kupona kweelana azyeelelo zya Leza zijatikizya koonana kulagwasya kumubili, alimwi amumizeezo. Ndasyoma kuti Leza ulatupa zyeelelo zyakulilemeka nkaambo tayandi kutubona kuti katupenga.”
Andinywe mulakonzya kulongezyegwa akaambo kakutobela malailile a Leza aaluyando. Ibbaibbele lisyomezya kuti: “Milao ya-Jehova ililuleme, ilatangaazya moyo; milumbe ya-Jehova ilasalala, ilamunikila meso . . . . Akuzibamba nkokuleta bulumbu bupati.”—Intembauzyo 19:8, 11. *
[Bupanduluzi buyungizidwe]
^ munc. 8 Kweelana ambolyaamba Bbaibbele, Jehova ndizyina lya Leza limugeme.
^ munc. 20 Kutegwa muzyibe zinji kujatikizya lulayo lwamu Bbaibbele lugwasya, amwaambile Bakamboni ba Jehova kubusena nkomukkala, naa amubalembele kwiinda mukubelesya kkeyala iili apeeji 4 naa kkeyala yaa Intaneti ya www.watchtower.org.
[Majwi aakwelelezya sikubala aali apeeji 8]
Aabo batayandi kutobela zyeelelo zyamu Bbaibbele kanji-kanji balapenga mumizeezo
[Majwi aakwelelezya sikubala aali apeeji 9]
Aabo batobela zyeelelo zyamu Bbaibbele balijisi manjezyeezya aasalala alimwi balamvwana mumukwasyi
