Amubayiisye Bana Banu

Jesu Wakaiya Kumvwida

SENA ziindi zimwi cilaakukukatazya kumvwida?— * Tacigambyi ikuti naa mbolimvwa oobo. Toonse cilatuyumina kumvwida zimwi ziindi. Sena ulizyi kuti awalo Jesu wakayiya buya kumvwida?—

Sena ulimuzyi ngobeelede kumvwida bana boonse?—Inzya, bamaama abataata. Ibbaibbele lyaamba kuti: “Amulemeke bazyali banu mu-Mwami.” (Ba-Efeso 6:1) Ino bausyi Jesu mbaani?— ngu Jehova Leza alimwi andiswe tumwiita kuti ngu Taata. (Matayo 6:9, 10) Pele ikuti naa waamba kuti bausyi mba Josefa akuti banyina mba Mariya, bwiinguzi oobo buliluzi abwalo. Sena ulizyi mbobakaba bazyali bakwe?—

Mungelo Gabrieli wakaambila Mariya kuti uya kuzyala mwana nokuba kuti kunyina naakoonana amusankwa. Jehova nguwakapa kuti eeci cicitike kwiinda mukucita maleele mapati. Gabrieli wakaambila Mariya kuti: “Enguzu zya-Sijulu lyamajulu zikuvunikile, ayooyo Uusalala uti tumbukwe uzooambwa kuti Mwana a-Leza.”—Luka 1:30-35.

Leza wakalonzya buumi bwa Mwanaakwe kuzwa kujulu akububikka mwida lya Mariya. Mpoonya wakatalika kukomena mwida lya Mariya mbubonya mbobakomena bana bamwi mwida lyabanyina. Nokwakainda myezi iili fwuka, Jesu wakazyalwa. Aciindi eeci, Josefa a Mariya bakalikwetene, aboobo bantu bakazyi kuti ba Josefa mbabakali bausyi beni-beni ba Jesu. Mubwini, ba Josefa mbabakamukomezya. Aboobo tulakonzya kwaamba kuti Jesu wakajisi bausyi bobilo!

Jesu naakajisi myaka yakuzyalwa iili 12, wakacita cintu cimwi citondezya mbwaakali kubayanda Bausyi bakujulu, Jehova. Aciindi eeco, bamukwasyi wa Jesu, mbuli cilengwa, bakeenda lweendo lulamfwu lwakuunka ku Jerusalemu kwaakusekelela pobwe Lyakwiindilila. Nolyakamana pobwe eeli, Josefa a Mariya nibakali kuunka kuŋanda ku Nazareta nibakabona kuti Jesu wacaala. Sena ulizyi cakapa kuti bamulube?—

Aciindi eeci, Josefa a Mariya bakajisi bana bambi. (Matayo 13:55, 56) Alimwi ambweni bakalijisi bamukwasyi mbobakali kweenda limwi mbuli Jakobo a Johane alimwi abausyi ba Zebadayo abanyina ba Salome ibayeeyelwa kuti bakazyalwa da lyomwe a Mariya. Aboobo, kweelede kuti Mariya wakali kuyeeya kuti Jesu wakali abamukwasyi bamwi.—Matayo 27:56; Marko 15:40; Johane 19:25.

Josefa a Mariya nibakazyiba kuti Jesu tako, bakajokela ku Jerusalemu. Bakamuyandaula kwaciindi cilamfwu mwanaabo. Buzuba bwatatu bakamujana mutempele. Mariya wakamwaambila kuti: “Nkaambonzi ino ncootucitila obuya? Bona, uso amebo twali kukulangaula akukatazigwa.” Pele Jesu wakaingula kuti: “Ino kai mundiyandawidanzi? Sena tamuzi kuti ndileelede kuba muŋanda ya-Taata?”—Luka 2:45-50.

Sena uyeeya kuti Jesu wakabaingula kabotu banyina?— Bazyali bakwe bakalizyi  kuti wakalijisi luyandisisyo lwakukomba kuŋanda ya Leza. (Intembauzyo 122:1) Aboobo, sena Jesu wakaliluzi ikwaamba kuti bakeelede kusaanguna kumuyandauda mutempele ya Leza?— Mukuya kwaciindi, Mariya wakatalika kuyeeya majwi ngaakaamba Jesu.

Ino Jesu wakali kubabona buti bazyali bakwe ba Josefa a Mariya?— Ibbaibbele lyaamba kuti: “Nkabela [Jesu] wakeenda abo, waboola ku-Nazareta, wababombela.” (Luka 2:51, 52) Ino ncinzi ncotukonzya kwiiya kucikozyanyo ca Jesu?—Inzya, tweelede kubamvwida bazyali besu.

Nokuba boobo, tiicakali cuuba-uba kuli Jesu ikumvwida—nobaba Bausyi bakujulu.

Imasiku katanafwa, Jesu wakalomba kuti Jehova acince nzyaakali kuyanda kuti acite ikuti kacikonzyeka. (Luka 22:42) Nokuba boobo, Jesu wakamumvwida Jehova nokuba kuti tiicakali cuuba-uba. Ibbaibbele lyaamba kuti “wakaiya kumvwa mumapenzi aakwe.” (Ba-Hebrayo 5:8) Sena uyeeya kuti andiswe tulakonzya kwiiya ciiyo eeci?—

Bupanduluzi buyungizidwe

MIBUZYO:

▪ Ino mbuti Mariya mbwaakaba banyina Jesu, alimwi ino mbuti Jesu mbwaakaba abausyi bobilo?

▪ Ino ncinzi cakapa kuti bazyali bakwe batazyibi kuti Jesu wacaala?

▪ Ino nkuli Jesu nkwaakaamba kuti bazyali bakwe bakeelede kumuyandauda?

▪ Ino ncinzi ncokonzya kwiiya kucikozyanyo ca Jesu?

[Cifwanikiso icili apeeji 31]

Ino nkaambo nzi ncoyeeya kuti Josefa a Mariya bakeelede kusaanguna kumuyandauda mutempele Jesu?