Basicikolo Bakajaigwa—Mbobakaumbulizyigwa Bakacaala

Apeeji yakusaanguna lyamuteende taaku cimbi cakalembedwe, kwakalembedwe buyo bbala lyakuti “Nkaambo nzi?” Ooyu ngomubuzyo ngubakali kubuzya bantu cakwiinduluka-induluka ciindi musankwa uujisi myaka yakuzyalwa iili 17 naakajaya bantu ibali 15, amane awalo wakalijaya mudolopo lyaku Winnenden mucisi ca Germany nkocili kumusanza. Ndembela mucisi ca Germany bakazyiselezya munsi alimwi makani aajatikizya ntenda eeyi akamvwugwa nyika yoonse.

 Idolopo lya Winnenden lileebeka akaambo kakuti kuli myuunda yazisamu zyamisaansa azyamicelo alimwi bantu bakkala mumo balivwubide kapati. Mu March 11, 2009, kucikolo ca Albertville bwakaca mbukuca lyoonse pele cakutayeeyela, aciindi ca 9:30 kwakabuka manyongwe.

Musankwa ooyo wakasika kucikolo nkwaakali kwiiya kanyemede kumwi kajisi antobolo njaakabweza kubulo kwabazyali bakwe. Muciindi buyo cisyoonto wakajaya basicikolo bali fwuka abamayi botatwe bakali mumakkilasi otatwe abakali kweendeenda anze, ibamwi wakabacisa buyo. Mumaminiti buyo masyoonto, bamapulisa bakasika. Musankwa ooyu wakaccijila kucibbadela cabantu bacinkukide. Okuya wakaakujaya muntu wakali kubeleka nkuko. Amane wakajana sikweenzya mootokala akumunyanga mootokala kumwi kamutondekede ntobolo. Nibakeenda kwamakkilomita aali 40, mukamwini mootokala wakaccija. Naakasika nkobasambala myootokala, wakajaya sikusambala asikuula alimwi wakabacisa bamapulisa bobilo bakali kuyanda kumujata. Nibakali kuyanda kumujata bamapulisa, wakaliddubula kumutwe.

Bantu ibakamuzyi kabotu musankwa ooyu, bakaamba kuti tanaakajisi luta pele wakali kuyanda buyo kupona kabotu abeenzyinyina. Ino ncinzi cakamunjila? Kuboneka kuti wakali tyompedwe, alimwi wakali kusobanya ntobolo azisobano zimwi zyaavidiyo zyankondo. Pele bamwi baamba kuti tali alikke pe, nkobali abamwi bana bacita zyintu zyamusyobo ooyu. Ino bantu mbaakajaya? Sena wakali kusala buya naa wakali kujaya cijaye-jaye? Bantu bakali kwaamba twaambo twiindene-indene cakapa kuti ajaye basimbi bali lusele amusankwa buyo omwe. Kunyina wakaamba kaambo keni kakapa kuti acite boobu.

Mbobakacita Bantu

Ba Heike bakaamba kuti: “Mwaneesu naakatwaambila kuti kuli muntu wakali kudubula kucikolo, tiindakamusyoma. Pele nindakamvwa myootokala yabamapulisa ayakucibbadela kailila, ndakanyongana.” Bamapulisa bakacita kabotu kusika kufwaambana nkaambo naakajaya bana bacikolo banji. Nibakabagusya akubatola ambali bana bacikolo, kwakaboola basilisi, basikulaya abakuzikombelo kuzyi kubagwasyilizya.

Nokwakainda ciindi cisyoonto, basimubweza twaambo bakaboola akutalika kubuzya-buzya bana bacikolo, nokuba kuti banji bakali nyongene. Mwana wacikolo umwi wakaibala myootokala yakajisi basimubweza twaambo ibakali kubweza zifwanikiso iisika ku 28 yakazwa kumasena aaindene-indene aali 26. Kwakali mwiindilanwa kuli basimubweza twaambo calo cakapa kuti bamwaye twaambo tutali twamasimpe. Simubweza twaambo umwi wakabaumina luwaile bazyali bamwana wacikolo wakajaigwa kuti bamupe cifwoto camwana alimwi bana bacikolo bamwi bakali kupegwa mali kutegwa bafwotolwe. Akaambo kakuti kwakali gwete, basimubweza twaambo bamwi cakali kubakatazya kubweza twaambo tuluzi alimwi tiibajisi bulemu kuli bana bacikolo.

Kwacitika mapenzi aali boobu, bantu balaakuunka kuli basizikombelo kutegwa babaumbulizye akubaambila cipa kuti kakuba manyongwe. Nibakajaigwa bana bacikolo, bazikombelo ziindene-indene bakabungana. Bantu banji bakalumba kumulimo ngobakoonda. Pele aabo ibakali kuyanda luumbulizyo kuzwa mu Jwi lya Leza naa kujana bwiinguzi  bwamibuzyo njobakajisi bakatyompwa kapati. Mukwasyi umwi wakajanika kudilwe lyamweenzyinyina wamwanaabo musankwa ngobakali kwiiya limwi. Banyina bakaamba kuti: “Bapati bacikombelo bakaamba mbwaakapenga Jobu. Ndakali kuyeeya kuti balaamba ncotukonzya kwiiya kumakani aaya naa kutuumbulizya, pele tiibakaamba cili coonse. Kunyina nibakaamba cakapa kuti Jobu apenge naa ambwaakamana mapenzi.”

Musankwa umwi wakanyema kapati akaambo kakuti majwi ngaakamvwa taakamugwasya pe. Musankwa ooyu kwakainda myaka iili 30 naakaiide Bbaibbele a Bakamboni. Lino wakatalika kujanika kumiswaangano ya Bakamboni alimwi.

Valisa, musimbi uujisi myaka yakuzyalwa iili 14 ulaakwiiya Bbaibbele a Bakamboni ba Jehova wakali mukkilasi ciindi bana bacikolo nibakajaigwa. Naakamvwa ntobolo kazilila, wakatalika kupaila kuli Jehova. Nibakamubuzya mbwaakali kulimvwa, wakaamba kuti izyakacitika zitondezya zyintu nzyaakaiya mu Bbaibbele kujatikizya mazuba aakumamanino. (1 Timoteo 3: 1-5) Bakamboni bobilo bakali kukambauka makani aaumbulizya kuli basimukobonyina. Bacembele bamwi bakabaambila kuti, “Bantu banji beelede kucita mulimo ngomucita.” Nokuba kuti cakacitika cakali cibi kapati, bamwi bakayanda kuswiilila mulumbe uumbulizya wamu Bbaibbele alimwi uupa bulangizi.

Mbobakali kulimvwa

Masimpe ngakuti, kunyina majwi aali oonse aakali kukonzya kubaumbulizya bakafwidwa. Naa majwi aakali kukonzya kumukkazyika moyo muzyali wakafwidwa mwana naba mupulisa wakaunka kucikolo kwalo nkwakaile kujana kuti mukaintu wakwe wajaigwa.

Bana bacikolo ibakafwutuka abamikwasyi yabo, aumwi kuli mbocakali kumukatazya. Vassilios wakazwida ampulungwido sintobolo naakatalika kudubula basicikolo. Wakaamba kuti: “Nindakasotoka ampulungwido, ndakapaila kuli Jehova. Ndakali kuyeeya kuti ndilafwa. Ndakali kuyeeya kuti ooyu nguwakali mupailo wangu wamamanino.” Nsondo zyakaccilila, wakali kulota zyintu ziyoosya akaambo kakuyeeya zyakacitika alimwi tanaakali kuyanda kwaambaula amuntu uuli woonse. Wakalinyemede akaambo kambobakali kwaamba makani aakujaigwa basimubweza twaambo. Mukuya kwaciindi, wakaleka kukatazyigwa kapati mumizeezo.

Jonas iwakali kwiiya mukkilasi yomwe a Vassilios, awalo wakaliko nibakajaigwa basicikolo bali bosanwe mbaakali kwiiya limwi. Wakaamba kuti: “Nicakacitika buyo, ndakali kucikonzya kupandulula zyoonse zyakacitika, alimwi cakali kwiile kube ndeebelela cisobano ciyoosya camucipekupeku. Pele lino cilandikatazya kwaamba mbondilimvwa. Ziindi zimwi tandiyandi kuzyaamba zyakacitika, pesi zimwi ziindi ndilaakuzyaamba zyakacitika.” Alimwi ulaakuba acilabila pele ati azyibone ngozi ulota zyintu ziyoosya akaambo kazyintu zyakacitika.

Nikwakainda mazuba, bana bacikolo bakapegwa zyintu zyabo nzyobakasiide mumakkilasi. Bantu bakaiya muntu mbwaba naa kuli canyongana bakaamba kuti bana bacikolo bazyibona zyintu zyabo, zilabapa kuyeeya zyakacitika. Kusaanguna, Jonas wakakaka kucibweza cibaki abbeeke lyakucikolo acingundu cakwe. Lyoonse wakali kuyoowa ikuti wabona muntu iwakali kuboneka mbuli musankwa iwakajaya basicikolo naa uunyamude cibbeeke cikozyenye acamusankwa uulya. Ibazyali bakwe nibakali kweebelela cisobano cankondo cakali kutondezyegwa acipekupeku, wakayoowa kapati naakamvwa ntobolo  kazilila. Basilisi balaakubagwasya bana bacikolo kuti batani kuyeeyi zyintu zyakacitika.

Bausyi Jonas ba Jürgen, babeleka kucibbadela nkwaakajailwa mubelesi omwe. Bakaamba kuti, bazyali banji abantu mbobabeleka limwi bakali kulibuzya kuti, ino nkaambo nzi? akuti, ino mbuti kuti? Mucikozyanyo, umwi uubeleka kucibbadela eeci, iwakamubona musankwa ooyu iwakajaya bantu, wakayoowa kapati akuyeeya kuti awalo naakajaigwa, aboobo wakatalika kusilikwa akaambo kakuti wakali kuyeeya zyakacitika.

Mbobakagwasyigwa Bamwi

Ino ncinzi cabagwasya bamwi ikutegwa baliyumye? Ba Jürgen bakaamba kuti: “Nokuba kuti cilakatazya zimwi ziindi, ndilimvwa kabotu ikuti kandili abantu bamwi. Ndilakulwaizyigwa kapati ikuzyiba kuti bamwi balandibikkila maano.”

Awalo Jonas ulikkomene ikuzyiba kuti bamwi balamubikkila maano. Wakaamba kuti: “Banji baalakunditumina magwalo. Ibamwi bandikulwaizya kubala magwalo aamu Bbaibbele ngobandilembela. Eeci cilandikkomanisya kapati.” Ino ncinzi cimwi cimugwasya? Wakaamba kuti: “Ndatalika kuyeeya zyakacitika, ndilaakupaila. Zimwi ziindi ndilaakuswiilila nyimbo naa majwi aakalekkoodwa aamu magazini ya Sinsimuka!” * Alimwi wakaamba kuti, Ibbaibbele lilatwaambila cipa kuti zyintu eezyi zyoonse kazicitika: Saatani ngomuleli wanyika, alimwi tupona mumazuba aakumamanino. Bausyi bakaamba kuti kuzyiba kaambo aaka nkokubapa kuliyumya.

Kupenga Iino-Iino Kuya Kumana

Mumazuba buyo masyoonto, bantu bakali kuleta makkendulo, maluba, amagwalo kucikolo. Kerstin wakabona kuti bantu banji bakali kulemba tugwalo twakali kutondezya kuti bantu tabazyi icakapa kuti manyongwe aali boobu acitike akaambo Leza ncalekelede kuti kazicitika zyintu zili boobu. Naakabona kuti mibuzyo eeyi yakeelede kwiingulwa, Kerstin a Bakamboni bamwi bobilo bakalemba lugwalo akulubikka akali magwalo amwi.

Buzuba bwaciibalusyo, basikapepele bakalubweza lugwalo akubala mabala akusaanguna, akali kwaamba kuti: “Ino nkaambo nzi? Bantu banji balaakubuzya mubuzyo ooyu kumazuba aakumamanino, ikapati mibuzyo yakuti: Ino Leza wakali kuli? Alimwi kuti ino nkaambo nzi ncapa kuti zyintu eezyi kazicitika?” Pele cuusisya ncakuti kuzubulula kwakamanina aawa,

Ino nkaambo nzi ncotwaambila kuti cilausisya? Nkaambo kakuti mulugwalo kwakali lembedwe twaambo tupa kuti katupenga alimwi lwakali kwaamba kuti Leza “uyakugusya zyoonse ziletela bantu mapenzi.” Mpoonya lulazumana kwaamba kuti: “Bbuku lyamamanino lyamu Bbaibbele lyaamba kuti, Leza uyoosindula misozi yoonse kumeso aabantu, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” Jehova Leza uyakubabusya bantu bakafwa. Mu Bwami bwakwe, kunyina nikuya kuba kujayana amapenzi. Leza wakasyomezya kuti: “Amubone, ndalengulula zintu zyoonse, zibe zipya.”—Ciyubunuzyo 21:4, 5.

Bupanduluzi buyungizidwe

[Cifwanikiso icili apeeji 29]

Jonas wakatambula kkaadi ilembedwe kuti, “Tulakuyeeya”

Nkotwakajana cifwanikiso icili apeeji 26]

Focus Agency/WPN

Nkotwakajana cifwanikiso icili apeeji 26]

© imagebroker/Alamy

Nkotwakajana cifwanikiso icili apeeji 27]

Foto: picture alliance

Nkotwakajana cifwanikiso icili apeeji 28]

Foto: picture alliance