Amube Acilongwe a Leza

Imubetesi Uucita Zyintu Ziluzi Lyoonse

Matalikilo 18:22-32

BULULAMI. Kucita zyintu munzila iiluzi. Kutasalulula. Sena tabumukondi bube oobu? Lyoonse tulaakuyanda kucitilwa zyintu zibotu. Nokuba boobo, mazuba aano kuli kutalulama munyika. Pele, kuli mubetesi ngotweelede kusyoma—Jehova Leza. Lyoonse ucita zyintu ziluzi. Jehova wakatondezya kuti lyoonse ulacita zyintu ziluzi ciindi naakali kubandika a Abrahamu kweelana ambokulembedwe kulugwalo lwa Matalikilo 18:22-32. *

Jehova naakaambila Abrahamu makanze ngaakajisi kujatikizya minzi ya Sodoma a Gomora, Abrahamu wakalibilika kujatikizya lufwutuko lwabaluleme bakali kukkala muminzi eeyi kubikkilizya amujwa wakwe Loti. Abrahamu wakamubuzya Jehova kuti: “Sa ncobeni uyoomanisya baluleme antoomwe abasizibi? Ambweni nkubali baluleme bali makumi osanwe mukati kamunzi. . . . Sa tokonzyi kufwida munzi luzyalo akaambo kabaluleme bali makumi osanwe bakede mulinguwo?” (Tupango 23, 24) Jehova wakaingula kuti kunyina naakali kuya kwiinyonyoona minzi eeyi nokuba kuti kakuli buyo baluleme bali makumi osanwe. Abrahamu alimwi wakamukombelezya Jehova kwaziindi zyosanwe, kayaabucesya mweelwe wabaluleme kusikila kukkumi. Muziindi eezyi zyoonse, Leza wakali kwiingula kuti naakaifwida luzyalo minzi eeyi ikuti nokwakajanika baluleme bali boobo.

Sena Abrahamu wakali kukazyanya a Leza? Peepe! Ooku nokwakaba kulisumpula kapati. Abrahamu wakali kwaambaula munzila yabulemu alimwi wakali kulicesya. Mane wakali kulyaamba kuti wakali “bulongo atwe” buyo. Alimwi Abrahamu wakabelesya mabala aakuti “ndakomba” alimwi akuti “akaka” ikutondezya bulemu. (Tupango 27, 30-32, BT) Kuyungizya waawo, nzyaakali kwaamba Abrahamu zitondezya kuti wakali alusyomo lwakuti Jehova ulacita zyintu munzila iiluzi. Kwaziindi zyobile Abrahamu wakaamba kuti “cilatondwa” kuli Leza ikunyonyoona baluleme antoomwe abasizibi. Sikale ooyu uusyomeka wakatondezya lusyomo lwakwe kwiinda mukwaamba kuti: ‘Oyo uubeteka nyika uyoocita cakululama.’—Kapango 25.

Sena nzyaakaamba Abrahamu zyakaliluzi? Munzila iimwi zyakali luzi, pele munzila imwi tiizyakaluzi. Mucikozyanyo, wakalubizya naakaamba kuti kwakali bantu baluleme basika kukkumi mu Sodoma a Gomora. Pele wakaliluzi naakaamba kuti Leza takonzyi “kujaya uululeme antoomwe asizibi.” Leza naakainyonyoona minzi eeyo mibi, Loti abana bakwe basimbi bobilo bakafwutuka kwiinda mukugwasyigwa abangelo.—2 Petro 2:7-9.

Ino makani aaya atuyiisya nzi kujatikizya Jehova? Jehova naakamwaambila Abrahamu makanze aakwe kujatikizya minzi eeyi, wakali kumulomba kuti aambe mbwalimvwa kumakani aaya. Mpoonya wakali kuswiilila ciindi Abrahamu naakali kwaamba mbwalimvwa. (Isaya 41:8) Eeci cituyiisya kuti Jehova mubombe moyo alimwi ulabalemeka babelesi bakwe bali aanyika. Aboobo eeci citupa kuti katumusyoma Jehova cakumaninina, imubetesi uucita zyintu ziluzi lyoonse.

Bupanduluzi buyungizidwe

[Cifwanikiso icili apeeji 20]

Abrahamu wakamulomba Jehova kuti atainyonyooni minzi ya Sodoma a Gomora